Čatyrochdzionny pracoŭny tydzień: čamu ŭsio bolš kampanij iduć na hety niestandartny krok

Dla niekatorych kampanij čatyrochdzionny pracoŭny tydzień źjaŭlajecca pryvablivaj prynadaj, kab pryciahnuć maładoje pakaleńnie, jakoje addaje pieravahu bałansu miž pracoŭnym i asabistym žyćciom.

Źmieny ŭ myśleńni i ekanamičnyja realii ŭ svoj čas spryjali pierachodu ad siamidzionnaha pracoŭnaha tydnia da šaści-, a potym i da piacidzionnaha. A voś pandemija kavidu paskoryła pierachod da čatyrochdzionnaha pracoŭnaha tydnia.

U studzieni Abjadnanyja Arabskija Emiraty stali pieršaj krainaj, u jakoj pracoŭny tydzień składaje 4 z pałovaj dni. Bielhija ŭ lutym dazvoliła rabočym vybirać čatyrochdzionny tydzień, ale z bolšaj kolkaściu hadzin u dzień. U červieni ŭ Vialikabrytanii pačaŭsia šaścimiesiačny ekśpierymient z čatyrochdzionnym pracoŭnym tydniem z udziełam bolš čym 3300 supracoŭnikaŭ u 70 kampanijach.

Kolkaść «čatyrochdzionnych» štatnych supracoŭnikaŭ u ZŠA patroiłasia ŭ pieryjad z 1973 pa 2018 hod i skłała kala 8 miljonaŭ čałaviek. Značny ich rost taksama naziraŭsia ŭ Niderłandach, Hiermanii i Paŭdniovaj Karei.

Ale hety trend pakul zusim nie mejnstrym. Niekatoryja z najbujniejšych i samych viadomych u śviecie karparacyj, jakija padčas pandemii dazvalali svaim supracoŭnikam pracavać z domu pa hibkich hrafikach, ciapier vyklikajuć ich nazad u ofis z adnaŭleńniem tradycyjnaha piacidzionnaha hrafika.

Taksama pierachod na trochdzionnyja vychodnyja ŭ niekatorych krainach možna ličyć pakul zanadta ŭmoŭnym.

U toj čas jak pierachod da čatyrochdzionnaha pracoŭnaha tydnia zvyčajna aznačaje pierachod na 32-hadzinny hrafik, niekatoryja kampanii namahajucca ŭkłaści tradycyjnyja 40 hadzin u čatyry dni. 

Padčas pandemii kampanija Enterprise Rent-A-Car u aeraporcie Łohan u Bostanie prapanavała adnamu z svaich supracoŭnikaŭ pracu, jakaja raźmiarkuje 42 hadziny na čatyry dni zamiest piaci. Novyja 10,5-hadzinnyja načnyja źmieny mohuć vymotvać, ale akazałasia, što taki hrafik bolš pasuje hetamu supracoŭniku.

«Ź piacidzionnym tydniem ty stomleny, — kaža jon. — Ciapier ja adčuvaju, što ŭ mianie jość adzin dzień, kab adpačyć, a potym dva inšyja, kab pa-sapraŭdnamu atrymać asałodu ad dvuch vychodnych». 

Prychilniki skaročanaha pracoŭnaha tydnia kažuć, što klučom da pośpiechu źjaŭlajecca «hłybokaja praca» — čas, adviedzieny na toje, kab zasiarodzicca, nie adciahvajučysia. Jany kažuć, što mieniedžary pavinny razumieć, što dla bolšaści pracaŭnikoŭ «sapraŭdnaja hłybokaja praca» doŭžycca ŭ lepšym vypadku ad dvuch da troch hadzin kožny dzień. 

Paviedamlajecca, što adna brytanskaja kampanija pryniała sistemu «śviatłafora», kab pamienšyć pieraškody. U kaleh na stale haryć zialony indykatar, kali jany mohuć razmaŭlać, žoŭty, kali jany zaniatyja, ale hatovy havaryć, i čyrvony, kali jany nie chočuć, kab ich pierapyniali. Inšyja kampanii vyjavili, što, kab atrymać ekvivalentnuju pradukcyjnaść za čatyry dni, treba pryznačyć mienš schodaŭ i narad, i rabić ich karaciejšymi.

U novaziełandskaj kampanii Perpetual Guardian vyrašylisia na ekśpierymient paśla taho, jak pračytali spravazdačy ab tym, što kahnityŭnaja pradukcyjnaść rezka padaje ŭžo paśla niekalkich hadzin pracy.

Kiraŭnik skaraciŭ tydzień pracy ŭsich svaich 240 supracoŭnikaŭ da 30 hadzin, nie skaračajučy apłaty pracy i lhot. U vyniku pradukcyjnaść pavialičyłasia na 20%, vydatki na balničnyja źnizilisia ŭdvaja, a supracoŭniki paviedamili pra bolšaje pačućcio bałansu i zadavolenaści.

Ale ž strach straty pradukcyjnaści prymušaje niekatorych pracadaŭcaŭ viartać svaich pracaŭnikoŭ nazad da tradycyjnaha piacidzionnaha ofisnaha režymu. Hienieralny dyrektar Tesla Iłan Mask, naprykład, zajaŭlaŭ supracoŭnikam, što jany pavinny znachodzicca ŭ ofisie nie mienš za 40 hadzin u tydzień abo pakinuć kampaniju. 

Prablema z takimi ultymatumami ŭ tym, što najbolš talenavityja pracaŭniki mohuć pajści ŭ inšaje miesca, dzie prapanujecca bolš hnutki hrafik.

Roznyja startapy, kampanii, jakija zajmajucca prahramnym zabieśpiačeńniem, dyzajnam ci kansałtynham časta bolš achvotna prymajuć čatyrochdzionny tydzień, čym bolš bujnyja i viadomyja arhanizacyi. 

U pieryjad z 1979 pa 2020 hod pradukcyjnaść pracy rasła značna bolš, čym pahadzinnaja apłata. U toj ža čas kolkaść adpracavanych hadzin zastavałasia niaźmiennaj i časta pavialičvałasia.

Uvieś čas refarmatary nastojvali na ŭsio bolš karotkich pracoŭnych hadzinach. Jašče ŭ 1784 hodzie Biendžamin Franklin u liście svajmu siabru pisaŭ: «Kali kožny mužčyna i žančyna buduć pracavać nad čymści karysnym pa čatyry hadziny kožny dzień, hetaj pracy budzie dastatkova dla vytvorčaści ŭsich vyhod i pradmietaŭ žyćciovaj nieabchodnaści». 

Jak ni paradaksalna, ale siońnia mienavita pandemija vyhladaje jak padzieja, jakaja moža paskoryć hetuju tendencyju. I zaraz hramadstva znachodzicca ŭ etapie aŭtamatyzacyi pracy, jakaja zrobić hetaje pytańnie jašče bolš aktualnym.

• 19
• 0
• 1
• 0
• 1
• 1
• 3
• 0