«Uvieś čorny». Što apošniaje było viadoma pra Viktara Babaryku ŭ navapołackaj kałonii
Tyja, chto ź im siadzieŭ, raskazvali, što da palityka nikoha nie padpuskajuć, a sami supracoŭniki bajacca jaho čapać. «Jon kali idzie, to jak ledakoł — usie rasstupajucca». Ale pry hetym jaho adpraŭlali na samyja ciažkija pracy i treciravali pakarańniami.
27.04.2023 / 14:20
Viktar Babaryka padčas suda ŭ 2021 hodzie. Fota: BiełTA
Paplečniki Viktara Babryki paviedamlali, što ad palityka kala dvuch miesiacaŭ niama karespandencyi.
Takoje samaje — ź Mikałajem Statkievičam, Iharam Łosikam i Maksimam Znakam, inšymi viadomymi palitviaźniami.
Advakat apošni raz sustrakaŭsia ź Viktaram Babarykam bolš za miesiac tamu.
«Zdaroŭje było narmalnym, ale pachudzieŭ. Ale ciapier vidavočna ŭsio źmianiłasia. Kali ŭ balnicy — jość surjoznaja pahroza», — ličyć Ivan Kraŭcoŭ, kaardynatar kamandy Viktara Babaryki.
Advakat Babaryki Ivan Čyžyk bolš nie moža pracavać ź im. Jaho zatrymlivali padčas abłavy na advakataŭ, jakaja była 20 sakavika (tady było viadoma pra zatrymańnie jašče čatyroch abaroncaŭ viadomych palitviaźniaŭ).
Pa słovach Kraŭcova, z byłym pretendentam na prezidenckuju pasadu listavałasia vialikaja kolkaść ludziej, ale ŭžo paŭhoda, jak pačalisia prablemy.
«2 miesiacy zusim ničoha», — padkreślivaje jon.
Niadaŭna Babaryku źmiaścili ŭ pamiaškańnie kamiernaha typu (siudy pieravodziać złosnych parušalnikaŭ), paviedamlajuć pravaabaroncy. Kali dakładna heta adbyłosia — nieviadoma. Taksama paviedamlajecca, što doŭhi čas zimoj Babaryka pravioŭ u ŠIZA.
Viktara Babaryku ŭtrymlivajuć u navapołackaj kałonii. Były jaje siadzielec błohier Alaksandr Kabanaŭ nazvaŭ viaźnicu adnoj z najhoršych pa ŭmovach.
«Načalnik na vačach padnačalenych źbivaje ludziej, ździekujecca ź ich. Pry hetym, dumaju, jon atrymlivaje ad svaich dziejańniaŭ asałodu. Heta bačna pa jaho tvary», — kaža błohier pra pavodziny Andreja Palčyka, užo byłoha načalnika kałonii.
Viktar Babaryka, 2020 hod
Alaksandr Kabanaŭ u «Toku» adznačaŭ, što bačyŭsia ź Viktaram Babarykam štodnia, ale pahavaryć ź im nie ŭdavałasia.
Inšym źniavolenym kamunikacyju z eks-pretendentam na pasadu prezidenta stroha zabaraniajuć.
«Jak z Babarykam, to adrazu prablema. Aŭtamatam ciabie zanosiać u čorny śpis. Ciabie pačynajuć adstrelvać. Pačynaješ u ŠIZA jeździć. Kali ź im kryminalniki sprabavali havaryć, to im adrazu prafulik mohuć ulapić. Jaho izalujuć maksimalna», — padkreślivaŭ Alaksandr Kabanaŭ.
Na pytańnie, ci bajacca supracoŭniki kałonii čapać Babaryku, bo dapuskajuć, što jon moža stać prezidentam, Alaksandr Kabanaŭ adkazvaŭ nastupnaje:
«Adzin supracoŭnik mnie ŭ hutarcy kazaŭ: kab nie nastupić nahami ŭ brud, dyk nu jaho nafih, jašče prezidentam stanie. Z supracoŭnikaŭ ź im nie kamunikuje nichto. Jon kali idzie, to jak ledakoł — usie rasstupajucca. Supracoŭniki da jaho staviacca narmalna — niejtralna».
Kabanaŭ piša, što ŭ PK-1 prosta tak u haradski špital nie vyvoziać.
«Zvyčajna sprabujuć zamiać usio ŭ łahiery, adpraŭlajučy ŭ sančastku. Značyć, vypadak ekstranny», — miarkuje jon.
Viktar Babaryka spačatku pracavaŭ u kałonii apalščykam u piakarni. Zatym jamu dali pracu ŭkładčyka chlebabułačnych vyrabaŭ. Uvieś pracoŭny čas jon znachodziŭsia ŭ pamiaškańni bieź vientylacyi, z tempieraturaj plus 30 hradusaŭ.
U śniežni rodnyja daznalisia, što źniavoleny palityk užo vypalvaje draŭniany vuhal. Poŭny pracoŭny dzień (9 hadzin) 6 dzion na tydzień jon znachodzicca na vulicy. U jaho nie było dostupu da bytavoha pamiaškańnia, dzie była b mahčymaść sahrecca padčas źmieny. Hetuju pracu nazyvajuć adnoj z samych ciažkich u kałonii.
Rodnyja byli zaniepakojenyja tym, što, niahledziačy na miedycynskija supraćpakazańni, praca źviazanaja z padniaćciem ciažaru, a taksama vysokim uzroŭniem zadymlenaści.
U studzieni 2023 hoda ad jašče adnaho niavolnika połackaj kałonii stała viadoma, što Viktara Babaryku pastavili na prafulik za narezku sała na padvakońni.
«Za Babarykam zaŭsiody ŭzmocnieny kantrol. Jak praviła, dzie jon pracuje, tam staviać vielmi šmat kamier, dziela taho, kab jon nie pakidaŭ pracoŭnaje miesca nie pavodle raskładu. Taksama na Babaryku paviesili prafiłaktyčny ŭlik jak na «schilnaha da zachopu zakładnikaŭ, prajaŭleńnia ahresii i napadu na administracyju», — raskazaŭ vyzvaleny mužčyna.
Ź Viktaram Babarykam bačyŭsia ŭ kałonii i ciapier užo były palitviazień Valancin Łabačoŭ. Jon paćvierdziŭ «Biełsatu», što palityk «pracuje na vuhali, uvieś čorny» i znachodzicca na prafiłaktyčnym uliku jak «schilny da napadu na administracyju i zachopu zakładnikaŭ».
Pa słovach Łabačova, z traŭnia 2022 hoda Babaryku zabaranili ŭsiu pierapisku i tolki rodnaj siastry jon telefanuje. U ŠIZA na 10 dzion trapiŭ u mai, vosieńniu taksama byŭ kinuty ŭ štrafny izalatar. Pry kancy hoda jaho pazbavili spatkańniaŭ i pasyłki.
Były viazień kazaŭ, što Babaryka trymajecca badziora, ale da ludziej stavicca naściarožana, bo ŭ kałonii chapaje stukačoŭ. Prasiŭ pieradać na volu, što nie vałodaje poŭnaj infarmacyjaj pra toje, što adbyvajecca, bo jamu imknucca pierakryć usie mahčymaści atrymańnia infarmacyi.
Viktara Babaryku, jaki, miarkujučy pa apytańniach hramadskaj dumki, napiaredadni prezidenckich vybaraŭ 2020 hoda byŭ samym papularnym sapiernikam Alaksandra Łukašenki, źniavolili 18 červienia 2020 hoda, a ŭ lipieni 2021 hoda jamu prysudzili 14 hadoŭ pazbaŭleńnia voli nibyta za «lehalizacyju srodkaŭ, atrymanych złačynnym šlacham» i «atrymańnie chabaru».
26 krasavika 2023 hoda «Rabočy ruch» raspaŭsiudziŭ infarmacyju pra toje, što źniavoleny palityk trapiŭ u balnicu.
27 krasavika ŭ navapołackaj centralnaj haradskoj balnicy «Radyjo Svaboda» paćvierdzili, što Viktar Babaryka ŭ ich.
«Babaryka ŭ chirurhii», — adkazali ŭ špitali.
«Miedyjazonie» ŭ balnicy dadali, što stan palityka zadavalniajučy.
Śviatłana Cichanoŭskaja zapatrabavała, kab Babaryku publična prademanstravali, pakazaŭšy, u jakim jon stanie, i dapuścili da jaho advakataŭ i svajakoŭ.
«Lubyja inšyja dziejańni, — zajaŭlaje Cichanoŭskaja, — buduć traktavacca jak naŭmysnaje pryčynieńnie škody žyćciu i zdaroŭju».
Hladzicie taksama:
U Viciebsku masava zvalniajuć ludziej, jakija padpisvalisia za Viktara Babaryku — pravaabaroncy
Mianiajuć kiraŭnika navapołackaj kałonii, dzie siadziać Babaryka i Łosik