«Mnie ŭžo pastavili dyjahnaz». Palicyja źmiaściła Ihara Bancara ŭ psichijatryčnuju balnicu
Muzyku i byłoha palitviaźnia Ihara Bancara źmiaścili ŭ Varšavie ŭ psichijatryčnuju balnicu. Fotazdymak z hieałakacyjaj «Psichijatryčnaja balnica» jon raźmiaściŭ u sacsietkach. U kamientaryi da adnaho z pastoŭ Bancar patłumačyŭ, što heta było nie jaho rašeńnie, piša «Biełsat».
29.04.2023 / 15:49
Ihar Bancar
«Tak, sapraŭdy ja znachodžusia ŭ varšaŭskaj psichušcy. Mała taho — mnie ŭžo pastavili dyjahnaz i pačali faršyravać niejkaj narkatoj, pihułkami niejkimi, biez majoj zhody. Jaki dyjahnaz? Štości tam niejkaja šyzafrenija manijakalnaja. I ja mahu pahražać žyćciu i zdaroŭju inšych ludziej praz svaju ahresiju. Mianie zabrali za biełaruski akcent, maje čornyja paznohci, moj ružaniec i maje tatuiroŭki. Nibyta z-za ahresiŭnych pavodzinaŭ», — raspavioŭ «Biełsatu» pa telefonie Ihar Bancar.
Ź jahonych słovaŭ, jaho pazaŭčora zabrała palicyja i pryviezła ŭ špital u kajdankach. Zatrymali Bancara ŭ Varšaŭskim centry siamiejnaj dapamohi. Jon śćviardžaje, što nikoha navat palcam tam nie kranuŭ, ale niekalki «vulharnych frazaŭ» skazaŭ. Kaža, što nie byŭ pad upłyvam ałkaholu i narkotykaŭ, bo ŭžo daŭno ad ich admoviŭsia. Test, jaki zrabili ŭ špitali, najaŭnaść ałkaholu ŭ kryvi nie vyjaviŭ.
Ihar Bancar znachodzicca ŭ pieršym adździele psichijatryčnaha špitala na vulicy Novaviejskaj, 27 (Nowowiejska 27) u Varšavie. Jaho možna naviedać.
«Ja pajdu z hetym u sud. Adnaznačna! Ja prosta tak hetaha nie adpušču. I heta budzie vielmi hučnaja sprava», — abiacaje Ihar Bancar.
Ihar Bancar prosić ab jak maha šyrejšym raspaŭsiudžvańni infarmacyi.
Ihar Bancar — muzyka i vakalist hurtu «Mister X». U vieraśni 2020 hoda jon stancavaŭ biez štanoŭ pierad milicejskim aŭtamabilam i byŭ asudžany na paŭtara hoda «chimii». U śledčym izalatary 16 dzion trymaŭ «suchuju» haładoŭku. Byŭ vyzvaleny 17 śniežnia 2021 hoda. U žniŭni 2022 hoda adsiadzieŭ 45 sutak pavodle administracyjnaha artykuła, paśla čaho źjechaŭ ź Biełarusi.
Čytać taksama: