«Такое першы раз бачу». Кіроўцы скардзяцца на чэргі на мяжы пры выедзе з Беларусі ў Расію
Кіроўцы, якія ехалі па трасе з Віцебска праз пункт пропуску Язерышчы, нечакана для сябе сутыкнуліся з доўгай чаргой, піша «Фонтанка».
10.05.2023 / 09:44
Чарга на выездзе з Беларусі ў Язерышчах. Скрын відэа
«Стаю больш за 4 гадзіны, наперадзе бачная мяжа, белы знак, КПП і за ім 100 метраў прыкладна. Гэта значыць, мяркуючы па колькасці машын наперадзе, яшчэ паўтары-дзве гадзіны стаяць. Цэнзурных слоў няма», — падзяліўся чытач з карэспандэнтам.
Па словах суразмоўцы, чэргі на межах паміж Расеяй і Беларуссю пачаліся з 5 мая, калі Беларусь увяла праверку на мяжы.
«Наогул не было такога. Звычайна праязджаеш, паказваеш пашпарт — і ўсё. Было некалькі машын, можа, але такое я першы раз бачу. Хоць некалькі разоў у год езджу праз гэты пункт, і на святы езджу, але такога не было ніколі», — распавёў суразмоўца.
Паводле яго, праходжанне мяжы ў зваротным напрамку, у Беларусь, цяпер лягчэйшае: там, на яго думку, 15—20 машын, іх праверка зойме каля гадзіны.
«Мы едзем 1,5 км ужо 6 гадзін! Дасталі нарды, каб моцна не сумаваць», — распавёў «Фонтанке» іншы відавочца.
5 мая стала вядома, што на мяжы з Расіяй з'явіліся пасты беларускіх памежнікаў. Паведамлялася, што ў тых, хто ўязджае, правяраюць пашпарты. Але, як вынікае, тых, хто выязджае, таксама правяраюць.
Чытайце таксама:
Мінск хоча перастрахавацца: Беларусь увяла пагранічны кантроль на ўездзе з Расіі
На вялікія выхадныя Беларусь накрыла хваля расійскіх турыстаў