У Наваполацку прайшлі затрыманні дактароў у бальніцы, куды прывозілі Бабарыку
У цэнтральнай гарадской бальніцы Наваполацка 17 мая прайшлі масавыя затрыманні лекараў, паведаміў тэлеграм-канал «Белыя халаты».
19.05.2023 / 17:51
Сярод затрыманых называюцца хірург Міхаіл Пачкоўскі, уролаг Павел Стальмакоў, фельчар хуткай дапамогі Наталля Першынёнак, супрацоўніца УГД Ала Стальмакова, загадчыца аддзялення гінекалогіі Ірына Васільева.
Паводле звестак канала, Пачкоўскаму і Стальмакову прысудзілі па 15 сутак, Першынёнак і Васільевай — па 10 сутак, Стальмаковай — штраф 100 базавых велічынь.
Адзначым, што ўсе лекары працуюць у бальніцы, куды прывозілі палітзняволенага Віктара Бабарыку.
Масавыя палітычныя рэпрэсіі ў Беларусі працягваюцца з 2020 года, калі Аляксандр Лукашэнка, мяркуючы па звестках з участкаў, дзе выбарчыя камісіі дазволілі назіральнікам сачыць за падлікам галасоў, прайграў Святлане Ціханоўскай, але не аддаў уладу.
З 2022 года, пасля нападу Расіі на Украіну, беларусаў пачалі пераследаваць і за антываенныя выказванні або сімпатыі да Украіны.
За гэты час у краіне адбылося не менш за 50 тысяч палітычна матываваных затрыманняў, заведзена не менш за 12 тысяч палітычна-крымінальных спраў і адкінутыя базавыя нормы законнасці і маралі.
Чытайце таксама:
У Гомелі працягваюцца затрыманні па «справе Зельцэра»
У Беларусі 28 новых палітвязняў
Пачаўся судовы працэс па справе педагога-рэпетытара Яўгена Лівянта