«Група падтрымкі Украіны». У Магілёве затрымалі траіх мужчын
Відэа з затрыманымі з'явілася ў дзяржаўным канале Магілёва — «Беларусь-4».
01.06.2023 / 18:54
Уладзімір Тычынскі і двое іншых затрыманых. Фота: «Укантакце», канал ГУБАЗіК
Спачатку паказваюць кадры затрымання 53-гадовага прадпрымальніка Уладзіміра Тычынскага. Родам ён з Аршанскага раёна, але доўгі час жыве ў Магілёве.
Мужчына мае ўласны бізнэс па вытворчасці ўваходных дзвярэй, а таксама фірму ў Расіі, якая іх прадае.
На кадрах, знятых ГУБАЗіК, паказваюцца «доказы віны» Уладзіміра Тычынскага — гэта ўкраінская сімволіка ў аўто і ў хаце. Іншай канкрэтыкі па тым, што ён рабіў, там няма.
Машына Уладзіміра Тычынскага. Скрыншот з відэа «Беларусь-4»
З Уладзімірам затрымалі дваіх мужчын, якіх называюць «групай падтрымкі Украіны». Першы затрыманы кажа, што нібыта «Уладзімір прапанаваў зліць звесткі знаёмых у «Чорную кнігу Беларусі», але ён «адмовіўся і з таго часу адносіны разладзіліся». За што яго затрымалі — увогуле не ясна.
Другі затрыманы кажа, што яны з Уладзімірам аднадумцы: «ён, як і я, асуджае дзеянні Расіі ва Украіне». Іншай інфармацыі пра яго няма.
Дзяржканал сцвярджае, што «праводзіцца праверка», а дзеянням мужчынаў «даецца прававая ацэнка».
Чытайце таксама:
Лукашысты разбілі галаву мужчыне за беларускую налепку на аўто
ГУБАЗіК распавёў, у чым вінавацяць каталіцкага семінарыста Уладзіслава Беладзеда
За чатыры малюнкі. Баранавіцкага актывіста без нагі асудзілі на чатыры з паловай гады калоніі