«Na joj byli kałhotki ŭ sietačku». Chto jana, sudździa Čarapanava, — udarnica palityčnych prysudaŭ
Praz sudziejski małatok Śviatłany Čarapanavaj prajšli dziasiatki palityčnych spraŭ. Časam jaje sientencyi hučali prosta absurdna. «Skazała, što ja samaja jarkaja na fotazdymku, tamu vinavataja». Raskazvajem pra minskuju sudździu, jakaja adpraŭlaje ludziej za kraty na sutki i hady.
11.06.2023 / 18:16
Fota: «SB. Biełaruś siehodnia»
Pačynała karjeru Čarapanava ŭ sudzie Zavodskaha rajona stalicy. 15 kastryčnika 2020-ha ŭkazam Łukašenki № 364 jana była pieraviedziena na pracu ŭ Minski haradski sud.
Śviatłana Čarapanava — udarnica vyniasieńnia palityčnych prysudaŭ. Voś tolki niekatoryja ź ich.
Jana vypisała chirurhu Andreju Lubieckamu 5 hadoŭ kałonii. Advakatku Nastaśsiu Łazarenku asudziła na 6 hadoŭ kałonii.
Hramadzianina Łatvii Dźmitryjsa Michajłaŭsa — na 4 hady kałonii. Palitźniavolenamu Siarhieju Bušyku dała 2 hady kałonii.
Sudziła Čarapanava i tych, chto za kamientary prachodziŭ pa «spravie Zielcera». Hlebu Hładkoŭskamu jana dała 5 hadoŭ kałonii, Alaksandru Miłašeŭskamu pryznačyła 2 hady.
U Minskim haradskim sudzie Čarapanava taksama razhladaje i apielacyi.
Naprykład, jana razhladała apielacyjnuju skarhu žurnalista, błohiera i futbalista «Krumkačoŭ» Alaksandra Ivulina. Prysud jana pakinuła bieź źmien, jak i prysud žycharu płoščy Pieramien Ściapanu Łatypavu.
Treba adznačyć, što Śviatłana Čarapanava nie maje sacsietak. Adzinuju staronku ŭ «Adnakłaśnikach» jana daŭno vydaliła.
Biełarusy, jakich sudziła Čarpanava, raskazali «Našaj Nivie» pra ŭražańni ad jaje.
«Jašče raniej pra Čarapanavu mnie raskazvali znajomyja, jakija pracavali ŭ sudzie Zavodskaha rajona. Kazali, što jana imknułasia pabudavać karjeru, doŭha išła da taho, kab jaje pieraviali ŭ Minski haradski sud, — raskazvaje adna z surazmoŭcaŭ. —
Kazali i toje, što ŭ pryncypie jana vyklikała ŭražańnie adekvatnaha čałavieka i spraviadlivaj sudździ.
Ja čuła historyju, jak da 2020-ha jana damahałasia mienš strohich prysudaŭ. Navat telefanavała ŭ Minski haradski sud, kab atrymać dazvoł na mienš strohi vyrak. I kali joj dazvołu nie dali, doŭha spračałasia ź imi.
Viedajučy heta, znajomyja mianie navat pavinšavali, kali daviedalisia, što maju spravu budzie razhladać Čarapanava.
Kankretna na maim pasiadžeńni ad adekvatnaści, pra jakuju mnie raskazvali, mała što zastałosia. Było adčuvańnie, što joj treba było, kali nie vyraści vyšej pa karjernaj leśvicy, to chacia b zamacavacca ŭ Minskim haradskim sudzie i dakazać, što jana vartaja hetaj sistemy.
Na moj pohlad, sud jana praviała nie toje kab niespraviadliva, a nieprafiesijna.
Jana dazvalała sabie sarkazm i ironiju, samaśćviardžałasia za moj košt. Jana niekalki razoŭ źviartała ŭvahu na toje, što ja nibyta nie viedaju jurydyčnych terminaŭ ci taho, jak pracuje prava, rabiła heta naśmichajučysia. Maju advakatku jana zatykała hetak ža, jak i mianie.
Čarapanava śvidravała mianie vačyma, ale bajałasia sustrecca vačyma z maimi blizkimi, što siadzieli ŭ zale.
Prysud pakinuli ŭ sile. Maja advakatka skazała, što nikoli nie bačyła, kab sudździa tak siabie pavodziła. Ja taksama prysutničała na inšych sudach, tam sudździ pavodzili siabie etyčna, nie vykarystoŭvali sarkazmu, ironii, nie chamili».
U inšaha čałavieka Čarapanava razhladała skarhu na prysud rajonnaha suda.
«Išła jana ad dźviarej da svajho pastamienta doŭha, bo była na špilkach, jakija vielmi hučna cokali. Tufli byli łakavyja z adkrytym nosam. Na joj byli kałhotki ŭ sietačku.
Kali Čarapanava ŭžo siadzieła, ja zaŭvažyła, što ŭ jaje błakitnyja cieni i načos, jaki nie atrymaŭsia. Nie stajaŭ čub.
Na sudzie z taho, što ja zapomniła, jana razhladała fotazdymak, jaki śviedčyŭ nibyta pra maju «vinu». Skazała, što ja błandzinka, samaja jarkaja na fotazdymku, tamu vinavataja.
Čarapanava, darečy, taksama błandzinka. Prysud jana mnie vyniesła za chvilinu».
Jašče adzin čałaviek, jaki sutykaŭsia z Čarapanavaj u časie pracy, apisaŭ jaje jak «strohuju i isteryčnuju, kali ŭ jaje drenny nastroj».
Śviatłana Čarapanava taksama razhladała administracyjnuju spravu fatohrafki Šury Pilipovič-Suščyc, jakaja ŭ 2020 hodzie była fotakarespandentkaj «Našaj Nivy».
Tady žurnalistka abskardžvała prysud Pieršamajskaha suda Minska, jaki zavočna prysudziŭ joj 7 sutak aryštu — jaje aryštavali, kali jana zdymała zbor demanstrantaŭ kala mietro «Puškinskaja».
Padčas pracesu sudździa Čarapanava vučyła fatohrafku biełaruskaj movie, ale, viadoma, pa-rusku.
Sud prahledzieŭ videa, na jakim vidać, jak fotažurnalistku viaduć u aŭtazak, choć u jaje byŭ dobra bačny bejdž. Heta nijak nie paŭpłyvała na rašeńnie sudździ Čarapanavaj. Jana nie znajšła padstaŭ dla pierahladu rašeńnia Pieršamajskaha rajonnaha suda.
Śviatłanie Čarapanavaj 51 hod. Adzin z synoŭ Čarapanavaj — 28-hadovy Ivan — pracuje ŭ adździele kryminalnaha vyšuku UUS administracyi Savieckaha rajona ŭ Minsku staršym opierupaŭnavažanym.
Pra heta «Našaj Nivie» paviedamili «Kibierpartyzany».
Masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu.
Z 2022 hoda, paśla napadu Rasii na Ukrainu, biełarusaŭ pačali pieraśledavać i za antyvajennyja vykazvańni abo simpatyi da Ukrainy.
Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna-kryminalnych spraŭ i adkinutyja navat samyja bazavyja normy zakonnaści i marali. Dziasiatki tysiač ludziej vymušanyja byli pakinuć krainu, ratujučysia ad represij.
U bazie hramadzianskaha kantrolu sudovaj sistemy «Zubr» usiaho naličvajecca 68 palityčnych rašeńniaŭ, vyniesienych Čarapanavaj.
Čytajcie taksama:
Byłoj buchhałtarcy Minskaha elektratechničnaha zavoda dali piać hadoŭ kałonii
Supracoŭniku Instytuta hienietyki dali try z pałovaj hoda kałonii
Palitźniavoleny technik-prahramist Aleh Harmazinski adbyŭ termin i vyjšaŭ na volu