Jak sudździa Čarapanava žurnalistku «Našaj Nivy» biełaruskaj movie vučyła. Pa-rusku, kaniečnie
Siońnia ŭ Minskim haradskim sudzie adbyŭsia razhlad skarhi fotakarespandentki «Našaj Nivy» Alaksandry Pilipovič-Suščyc na prysud Pieršamajskaha suda Minska, jaki zavočna daŭ joj 7 sutak aryštu.
Nahadajem, što jaje zatrymali 15 listapada na mietro «Puškinskaja» padčas aśviatleńnia vuličnaj akcyi.
Heta była adna z tych spraŭ, jakija pastaŭlenyja na kanviejer. Pa niapoŭnych źviestkach, za čas pratestaŭ było zatrymana ŭžo bolš za 30 400 čałaviek, u tym liku bolš za 300 žurnalistaŭ padčas vykanańnia svaich prafiesijnych abaviazkaŭ.
Adroźnivajucca tolki pavodziny sudździaŭ padčas pracesaŭ: adny štampujuć prysudy apuściŭšy vočy, druhija sprabujuć jašče i razdušyć maralna, kab padsudny adčuŭ siabie šmakadziaŭkaj pad kołam hetaj kafkijanskaj mašyny.
Sudździa Śviatłana Čarapanava dziejničała tak: jana papraŭlała toje, što joj zdavałasia pamyłkami biełaruskaj movy ŭ słovach žurnalistki «Našaj Nivy». Jak vy možacie zdahadacca, Čarapanava pry hetym havaryła pa-rusku. Sudździa nie viedała, što Alaksandra Pilipovič-Suščyc, akramia taho što fotakarespandentka «NN», u Redakcyi jašče i maje nahruzku karektarki. A heta aznačaje, što jana vałodaje biełaruskaj movaj daskanała, da samych tonkaściej.
U svoj čas Alaksandra zdała CT pa biełaruskaj movie na 100 bałaŭ. Pieršy raz «Naša Niva» pisała pra jaje mienavita z hetaj nahody.
Čytajcie taksama: 18-hadovaja Alaksandra nabrała 100 bałaŭ na CT pa biełaruskaj movie i dzielicca historyjaj svajho pośpiechu
U inšych realijach takaja taktyka sudździ hladziełasia b kamična. U našych — siamji žurnalistki i pradstaŭnikam pracoŭnaha kalektyvu ŭ hałavu prychodzili horkija histaryčnyja anałohii.
Sud prahledzieŭ videa, na jakim vidać, jak našu fotažurnalistku viaduć u aŭtazak, choć u jaje jość bedž. Heta nijak nie paŭpłyvała na rašeńnie sudździ Čarapanavaj. Jana nie znajšła padstaŭ dla pierahladu rašeńnia Pieršamajskaha rajonnaha suda.
Usiaho za čas pratestaŭ padčas vykanańnia svaich abaviazkaŭ zatrymali bolš za 300 žurnalistaŭ. Asabliva masavymi zatrymańni žurnalistaŭ stali pačynajučy z kastryčnika.
15-ha Alaksandru zatrymali da taho, jak jana pačała zdymać.
Tut nižej vy možacie pabačyć jaje foty z raniejšych vuličnych padziej u Minsku. A jašče nižej — tłumačeńnie, jak možna padtrymać pracu žurnalistaŭ «Našaj Nivy».
Budziem spadziavacca, što Alaksandra Pilipovič-Suščyc, jak siamja i siabry, jak i radzina dy siabryna 30 tysiač inšych siamiej asudžanych, paśla sutyknieńnia z pravaachoŭnaj sistemaj Biełarusi nie straciać vieru ŭ mahčymaść i nieŭniknionaść pravasudździa.
Demanstranty i vadamiot. 1 listapada, Minsk.
Pakul reparcioraŭ uvieś čas zatrymlivajuć, my majem vostruju patrebu ŭ vašaj rehularnaj finansavaj padtrymcy, kab praciahvać pracu ŭ Telehramie i na inšych płatformach.
Heta možna zrabić dvuma sposabami:
1. Apłata praz ARIP ź luboj biełaruskaj kartki: Błahotvoritielnosť, obŝiestviennyje objedinienija — Prośvietitielskije, kulturno-dosuhovyje — Sorodiči. Albo numar pasłuhi 4346851
2. Pieraličyć hrošy praz Kłub Našaj Nivy. Treba zarehistravacca praz sacsietki ci hmejł, vybrać Hibki płan i lubuju sumu (na fota).
Kamientary