Экс-палітвязень Кабанаў вызначыўся, з якім з «Байполаў» ён будзе працаваць
«Я застаўся з калектывам, з якім працаваў да гэтага».
14.06.2023 / 09:29
Аляксандр Кабанаў. Скрыншот відэа
Экс-палітвязень Кабанаў працягне працу ў «Байполе» пасля рэарганізацыі аб'яднання. Кабанаў — прэс-сакратар аб'яднання.
Блогер паведаміў «Позірку», што будзе працаваць у камандзе Мацвея Купрэйчыка, Уладзіміра Жыгара і іншых супрацоўнікаў арганізацыі, якія маюць намер аддзяліцца ад фонду «Байпол», што ўзначальвае Аляксандр Азараў.
«Я застаўся з калектывам, з якім працаваў да гэтага, — сказаў Кабанаў. — У нас была размова з хлопцамі, яны сказалі: мы хочам, каб ты супрацоўнічаў з намі і надалей. Такую дзейнасць я лічу карыснай».
Экс-палітвязень адзначыў, што яго дзейнасць у арганізацыі застанецца ранейшай: «Удзельнічаць у расследаваннях — рабіць іх публічнымі, ствараць кантэнт і гэтак далей, займацца медыйкай, інфармацыйнай падтрымкай».
Узніклую ў «Байполе» сітуацыю Кабанаў назваў непрыемнай, паколькі яна «б'е і па арганізацыі, і па дэмсілам». «Але гэта не значыць, што трэба на ўсім паставіць крыж. Цяпер неабходна працай даказаць, што мы патрэбныя і мы важныя. Рэпутацыя ствараецца не заявамі» — падсумаваў экс-палітвязень.
Нагадаем, на мінулым тыдні ў «Байполе» адбыўся скандал. Аляксандр Азараў апублікаваў відэа, у якім заявіў, што «Байпол» страціў доступ да сваіх медыярэсурсаў, усе паролі засталіся ў распараджэнні былога супрацоўніка арганізацыі Мацвея Купрэйчыка, які адмовіўся прайсці паліграф, за што і быў звольнены з арганізацыі.
Пазней у тэлеграм-канале «Байпола» з'явіўся запіс, у якім абвінавачанні прагучалі ў адрас самога Аляксандра Азарава.
Поўную храналогію канфлікту ў «Байполе» вы можаце прачытаць тут.
Чытайце таксама:
Аб'яднаны пераходны кабінет абвясціў вынікі сустрэчы Ціханоўскай з «Байполам»