Сына Мілошавіча ўбачылі ўпершыню за больш чым 20 гадоў: ён у Маскве адкрываў помнік бацьку
Першы ў гісторыі помнік сербскаму дыктатару паставілі на плошчы Еўропы.
16.06.2023 / 06:48
Аляксандр Залдастанаў і Марка Мілошавіч. Скрыншот відэа
Сын былога прэзідэнта Сербіі Слабадана Мілошавіча Марка Мілошавіч на гэтым тыдні ўзяў удзел у адкрыцці статуі ў гонар свайго бацькі, абвінавачанага ў шэрагу ваенных злачынстваў, паведамляе «Еўрапейская праўда».
Двухметровую статую былога лідара Сербіі стварыў сербскі скульптар і па сумяшчальніцтве член Расійскай акадэміі мастацтваў Драган Радэнавіч.
У Расію скульптуру прывезлі на самалёце, дзе яе сустрэлі так званыя «Начныя ваўкі» — група набліжаных да прэзідэнта РФ Уладзіміра Пуціна байкераў.
Статую, якая, як падкрэсліваюць расійскія медыя, ёсць «першым у гісторыі» помнікам Слабадану Мілошавічу, усталявалі на плошчы Еўропы. На адкрыцці выступіў і Марка Мілошавіч, што стала яго першым з'яўленнем на публіцы за апошнія больш як 20 гадоў.
У кампаніі лідара «Начных ваўкоў» Аляксандра Залдастанава, які знаходзіцца пад санкцыямі ЕС праз падтрымку расійскай агрэсіі, Мілошавіч-малодшы зачытаў надпіс на помніку пра тое, што Сербія, маўляў, была «рэпетыцыяй таго, што адбылося з Расіяй, і таго, што цяпер адбываецца ва Украіне».
«Югаслаўскія войны — гэта тое самае, хіба што цяпер ва Украіне — паскораны варыянт. На жаль, мы прайгралі бітву і, спадзяюся, не прайгралі вайну. На нашых памылках і на нашым лёсе расіяне вывучылі ўрок, і мы пераможам», — сказаў мужчына, трымаючы ў руках сербскі сцяг.
Апошнія публічныя фота Марка Мілошавіча былі зробленыя больш за 20 гадоў таму. Ён з'ехаў з Сербіі ў Расію пасля звяржэння рэжыму бацькі ў кастрычніку 1999 года і атрымаў палітычны прытулак. На радзіме Мілошавіча-малодшага дагэтуль падазраюць у датычнасці да арганізаванай злачыннасці, таму ў выпадку вяртання дадому яго павінны арыштаваць.
Сам Слабадан Мілошавіч абвінавачаны ў ваенных злачынствах і злачынствах супраць чалавечнасці за яго ролю ў войнах у Босніі, Харватыі і Косаве ў 1990-я гады. Мілошавіч памёр у турме ў Гаазе ў 2006 годзе.
Чытайце таксама: