Łukašenka zahadaŭ usie dziaržorhany i arhanizacyi pierasadzić na «Džyli». Nie abyšłosia biez vyklučeńniaŭ
Alaksandr Łukašenka padpisaŭ ukaz, jaki zahadvaje dziaržaŭnym orhanam i arhanizacyjam zakuplać u jakaści słužbovych i śpiecyjalnych lehkavych aŭtamabilaŭ mašyny vytvorčaści SZAT «Biełdžy». Dakumient apublikavany na Nacyjanalnym pravavym internet-partale, piša «Lusterka».
29.06.2023 / 08:28
Fota: Tut.by
Chto i ŭ kaho pavinien kuplać aŭtamabili vytvorčaści SZAT «Biełdžy»?
«Dziaržaŭnymi jurydyčnymi asobami, haspadarčymi tavarystvami, bankami, sielskahaspadarčymi arhanizacyjami, a taksama ŭnitarnymi pradpryjemstvami, zasnavalnikami jakich vystupajuć arhanizacyi z dolaj dziaržavy bolš za 50 pracentaŭ dla vykarystańnia ŭ jakaści słužbovych i śpiecyjalnych lehkavych aŭtamabilaŭ, jakija nie patrabujuć daasnaščeńnia šlacham mantažu śpiecyjalnym technałahičnym abstalavańniem, ažyćciaŭlajecca zakupka lehkavych aŭtamabilaŭ ajčynnaha vytvorcy ŭ sumiesnaha zakrytaha akcyjaniernaha tavarystva «Biełdžy» abo aficyjnych handlovych pradstaŭnikoŭ z prymianieńniem pracedury zakupki z adnoj krynicy, kali inšaje nie ŭstanoŭlena častkaj druhoj sapraŭdnaha padpunkta», — havorycca ŭ pastanovie.
Jakomu čynoŭniku jaki aŭtamabil?
Ukaz taksama ŭstanaŭlivaje maksimalny pamier koštu słužbovych aŭtamabilaŭ u zaležnaści ad pasad asob, dla vykarystańnia jakimi pryznačany mašyny:
- dla kiraŭnikoŭ dziaržaŭnych orhanaŭ — 3430 bazavych vieličyń (126 190 rubloŭ);
- dla namieśnikaŭ kiraŭnikoŭ (uklučajučy namieśnikaŭ hubiernataraŭ), kiraŭnika Fondu sacyjalnaj abarony nasielnictva Ministerstva pracy i sacyjalnaj abarony, pamočnikaŭ Łukašenki, kiraŭnikoŭ rajvykankamaŭ i hetak dalej — 2200 bazavych vieličyń (81 400 rubloŭ);
- dla namieśnikaŭ kiraŭnikoŭ rajvykankamaŭ, miascovych administracyj rajonaŭ u haradach, kiraŭnikoŭ kamunalnych unitarnych pradpryjemstvaŭ, kiraŭnikoŭ biudžetnych arhanizacyj, jakija znachodziacca ŭ padparadkavańni dziaržaŭnych orhanaŭ, i hetak dalej — 1800 bazavych vieličyń (66 600 rubloŭ);
- dla kiraŭnikoŭ pasiałkovych i sielskich vykanaŭčych kamitetaŭ, strukturnych padraździaleńniaŭ rajonnych vykanaŭčych kamitetaŭ, namieśnikaŭ kiraŭnikoŭ kamunalnych unitarnych pradpryjemstvaŭ — 1465 bazavych vieličyń (54 205 rubloŭ).
Ale nie ŭsie čynoŭniki siaduć na «Džyli». Vyklučeńni zroblenyja dla hubiernataraŭ, kiraŭnikoŭ dziaržaŭnych arhanizacyj — padspravazdačnych Alaksandru Łukašenku, kiraŭnikoŭ bankaŭ i niekatorych inšych arhanizacyj, transpartnaje zabieśpiačeńnie jakich ažyćciaŭlajecca ADU «Biełtransśpiecaŭta».
Limity jość nie tolki na canu
Dla biudžetnych arhanizacyj i arhanizacyj, jakija atrymlivajuć subsidyi ź biudžetu, limit prabiehu słužbovych i śpiecyjalnych lehkavych aŭtamabilaŭ pavinien składać nie bolš za 1,7 tysiačy kiłamietraŭ u miesiac. Niavykarystany na praciahu miesiaca limit prabiehu moža być zraschodavany ŭ biahučym hodzie.
Vyklučeńni zroblenyja dla aŭtamabilaŭ miedycynskaj i chutkaj dapamohi, hazavaj słužby, inkasacyi, navučalnych aŭtamabilaŭ i niekatorych inšych katehoryj.
A kamu dazvolili kuplać inšamarki?
«Z ulikam śpiecyfiki dziejnaści i asablivaściaŭ zadač, što vykonvajucca, dla vykarystańnia ŭ jakaści słužbovych i śpiecyjalnych lehkavych aŭtamabilaŭ dapuskajecca nabyćcio lehkavych aŭtamabilaŭ zamiežnaj vytvorčaści»:
- Słužbaj biaśpieki Łukašenki;
- dziaržaŭnymi orhanami sistemy nacyjanalnaj biaśpieki;
- orhanami finansavych rasśledavańniaŭ Kamiteta dziaržaŭnaha kantrolu;
- Dziaržaŭnaj fieldjehierskaj słužbaj pry Ministerstvie suviazi i infarmatyzacyi;
- aŭtatranspartnaj dziaržaŭnaj ustanovaj «Biełtransśpiecaŭta» Kiraŭnictva spraŭ Łukašenki («Biełtransśpiecaŭta»);
- sielskahaspadarčymi arhanizacyjami, dziaržaŭnymi vytvorčymi lesahaspadarčymi abjadnańniami, dziaržaŭnymi lesahaspadarčymi ŭstanovami;
- a taksama pa rašeńni Łukašenki — inšymi dziaržaŭnymi orhanami i arhanizacyjami.
Adnak kupić aŭtamabil zamiežnaj vytvorčaści vyšej pieraličanyja arhanizacyi zmohuć pa ŭzhadnieńni ź Dziaržaŭnym sakrataryjatam Rady biaśpieki.
Usie apisanyja pałažeńni ŭkaza ŭstupajuć u siłu praz try miesiacy paśla jaho apublikavańnia.
Čytajcie taksama:
Jakija patrymanyja inšamarki ź Jeŭropy i ZŠA možna kupić pa canie novych «Łada» i kitajskich aŭto
«Dynamika pałochaje». U Biełarusi ŭstryvožylisia ekspansijaj kitajcaŭ na aŭtamabilny rynak