Jakija patrymanyja inšamarki ź Jeŭropy i ZŠA možna kupić pa canie novych «Łada» i kitajskich aŭto
Epocha, kali biełarusy mahli kuplać novyja aŭtamabili pa adnosna dastupnych cenach, skončyłasia litaralna praź niekalki miesiacaŭ paśla poŭnamaštabnaha ŭvarvańnia Rasii va Ukrainu. Ciapier zamiest aŭto suśvietnych brendaŭ, vyrablenych u Rasii, na naš rynak pačali prychodzić marki z Kitaja. Pahladzieli, kolki kaštujuć samyja tannyja novyja aŭto ŭ dyleraŭ i što za tyja ž hrošy možna nabyć z patrymanych varyjantaŭ, jakija pryvieźli ŭ Biełaruś ź Jeŭropy i ZŠA.
Samyja tanyja — Lada
Ceny na novyja aŭto ŭ Biełarusi pačynajucca z adznaki kala 13 tysiač dalaraŭ. Za hetyja hrošy možna raźličvać na takija aŭto, jak Lada Granta abo dvuchdźviernaja Lada Niva. Aproč taho, što sami madeli nie vielmi sučasnyja, treba ŭličvać, što samyja dastupnyja varyjanty buduć mieć vielmi ścipłuju kamplektacyju.
Majučy na rukach 13+ tysiač dalaraŭ, biełarusy mohuć raźličvać na kuplu 3-5-hadovych aŭto, niadaŭna pryviezienych da nas ź Jeŭropy.
U hetuju canavuju katehoryju ŭvachodzić, naprykład, Opel Astra. Vybirać možna siarod aŭto z dyzielnym abo bienzinavym ruchavikom. Jość raznastajnaść i pry vybary kuzava, čaho nielha zrabić u vypadku z «Ładaj Hranta».
Ź minusaŭ — prabieh u takich aŭto budzie nie mienšy za 150-200 tysiač kiłamietraŭ. I heta pry ŭmovie, što jon sapraŭdny, a nie skarektavany.
Aproč Opel Astra pa cenach ad 13 tysiač dalaraŭ pradajucca takija aŭto, jak Renault Megane. A voś 4-5-hadovy Renault Clio možna pačynać šukać z 10 500 — 11 000 dalaraŭ. Taksama nie našmat daražej kaštuje Fiat Tipo.
Za 11-12 tysiač možna razhladać i Ford Focus, pryviezieny sa Złučanych Štataŭ. Ale ŭ takim vypadku treba być hatovym, što heta budzie mašyna z avaryjnym minułym i ruchavikom abjomam 1 litr.
Jeŭrapiejskija Ford Focus z dyzielnym ruchavikom 1.5 pradajuć pa cenach ad 12 tysiač dalaraŭ. Pryblizna stolki ž kaštujuć Peugeot 308.
Padymajem płanku — Lada, Geely i reštki Renault logan
U nastupnaj cenavaj katehoryi siarod novych aŭto, jakija možna nabyć u biełaruskich aficyjnych dyleraŭ, iduć jašče adna Lada, Geely i reštki Renault logan.
Ceny na Lada Vesta pačynajucca z 15,5 tysiačy dalaraŭ. Aŭto ŭ kuzavie ŭniviersał pradajecca daražej — ad $18 200. Samaja tannaja ź biełaruska-kitajskich Geely kaštuje ad 16 400 dalaraŭ. Geely Emgrand u kamplektacyi Flagship kaštuje ŭžo kala 19 tysiač dalaraŭ.
Vybar śviežapryhnanych aŭto ŭ biudžecie 15,5-19 tysiač dalaraŭ značna šyrejšy.
Naprykład, za 15 tysiač dalaraŭ možna kupić 3-5-hadovy VW Golf z dyzielnym abo bienzinavym ruchavikom 1.6-2.0. Abo bienzinavym ad 1.0 i vyšej.
Z 15 tysiač dalaraŭ startujuć ceny na «amierykanskija» VW Jetta. Prabiehi ŭ aŭto sa Štataŭ zvyčajna nievialikija, ale avyryjnaha minułaha nie paźbiehnuć.
Pa canie novaha Geely možna razhladać i «narodnyja» VW Passat. Praŭda, z takim biudžetam havorka budzie iści pra aŭto z prabieham za 100-150 tysiač kiłamietraŭ.
Taksama ŭ biudžecie 16-19 tysiač dalaraŭ možna pryhladacca i da minivenaŭ. Jaskravy i davoli papularny prykład takich aŭto — Renault Grand Scenic.
Raźličvać na kuplu novaha minivena ŭ Biełarusi asabliva nie davodzicca, bo takija aŭto kali i traplajuć da dyleraŭ, to kaštujuć nieparaŭnalna bolš.
Kitajskija krasoviery VS jeŭrapiejskija
Z pavieličeńniem biudžetu ŭ 20+ tysiač dalaraŭ vybar siarod patrymanych aŭto ź Jeŭropy i ZŠA staje jašče bolš raznastajnym, čaho nielha kazać pra aŭto ŭ dyleraŭ. U bolšaści svajoj jany prapanujuć aŭtamabili kitajskich brendaŭ.
Samym tannym kitajskim aŭto paśla ajčynnaj Geely Emgrand za $16 400 źjaŭlajecca krasovier Haval Jolion, ceny na jaki pačynajucca z adznaki ŭ 65 900 rubloŭ (kala $22 000). Stolki kaštuje samy prosty aŭtamabil ź piarednim pryvadam i miechaničnaj karobkaj pieradač. Aŭtamabili z «aŭtamatam» kaštujuć daražej — ad 71 300 rubloŭ (kala $23 800). Kali dadać jašče i poŭny pryvad, to Jolion budzie ŭžo za 82 500 rub ($27 500).
Kitajski aŭtavytvorca JAC taksama maje ŭ svajoj liniejcy biudžetny krasovier JS4, jaki pradajecca za 65 900 rubloŭ ($22 000).
Kali hladzieć na rynak patrymanych aŭto, to adnym z samych dastupnych krasovieraŭ budzie Ford Escape čaćviortaha pakaleńnia, jaki pačaŭ sychodzić z kanviejera ŭ 2019 hodzie. Ceny na takija 4-hadovyja aŭto ŭ Biełarusi pačynajucca z 17 tysiač dalaraŭ. Jak i ŭsie inšyja mašyny, impartavanyja sa Štataŭ, jany buduć mieć avaryjnaje minułaje.
Ale kali havorka idzie pra 22 tysiačy dalaraŭ i vyšej, to možna raźličvać na kuplu aŭto ŭ dobraj kamplektacyi, ź minimalnym prabieham, a taksama minimalnymi paškodžańniami.
Taksama pa cenach ad 17 tysiač dalaraŭ pradajucca śviežapryhnanyja ź Jeŭropy Renault Kadjar. Krychu daražej (ad 18 tysiač dalaraŭ) pradajuć ich japonski anałah Nissan Qashqai.
Samyja tannyja aŭto ŭ liniejcy Cherry pradajucca pa cenach ad 82 500 rubloŭ (kala $27 500). Ctolki kaštujuć Tiggo 4 PRO u samaj ścipłaj kamplektacyi.
Na rynku patrymanych aŭto za takija hrošy možna vybirać siarod takich parkietnikaŭ, jak VW Tigyan, Honda CR-V, Alfa Romeo Stilvio, a kali padniać biudžet da 30 tysiač, to možna usurjoz pryhladacca i da BMW X3. Usie hetyja 3-5-hadavyja aŭto, pryviezienyja da nas ź Jeŭropy i ZŠA, možna nabyć pa canie samaj tannaj kitajskaj Cherry.
Kamientary