Выйшла першая аўдыякніга Святланы Алексіевіч на беларускай мове
Гістарычная прэм’ера на «Камунікаце»: Першая кніга серыі «Галасы Утопіі» Святланы Алексіевіч «У вайны не жаночы твар» ужо апублікаваная, паведамляе «Будзьма».
29.06.2023 / 14:49
Святлана Алексіевіч. Фота: «Наша Ніва»
Гэта не проста дакументальныя сведчанні ўдзельнікаў вайны, пра якую, здавалася б, нам расказалі ўсё і нават больш. Вы здзівіцеся, як мала мы насамрэч ведаем пра той час і як жудасна ён нагадвае цяперашні.
Праект стаўся магчымым дзякуючы супольным намаганням Міжнароднага саюза беларускіх пісьменнікаў і інтэрнэт-бібліятэкі Kamunikat.
Слухачы змогуць пазнаёміцца з аўтарскай рэдакцыяй «Галасоў Утопіі» ў найноўшым беларускім перакладзе. Пісьменніца паводле свайго творчага метаду дапрацавала хроніку: скасавала цэнзурныя праўкі, далучыла новыя эпізоды, а таксама старонкі з уласнага дзённіка.
Акцёрскі склад: Алег Гарбуз, Алена Баярава, Сяргей Чуб і Крысціна Дробыш.
Аўтарская музыка Дзмітрыя Фрыгі.
Запіс — Павел Сініла.
Прадзюсар праекта — Яраслаў Іванюк.
Дзe слухаць?
На сайце інтэрнэт-бібліятэкі Kamunikat і на буйных стрымінгавых платформах. Абсалютна бясплатна.
Чытайце таксама: