Упершыню ў гісторыі Белавежскай пушчы ў дэманстрацыйнай вальеры нарадзіліся ваўчаняты
Прэс-служба Нацыянальнага парку «Белавежская пушча» паведаміла пра нараджэнне на яго тэрыторыі пяцярых ваўчанят. Увагу гэтая навіна прыцягвае таму, што ўпершыню пара ваўкоў прывяла прыплод у дэманстрацыйных вальерах.
29.06.2023 / 19:07
«Волчата выросли немножко, а есть из блюдца не хотят», — цытуюць вядомы верш супрацоўнікі нацыянальнага парку. — Усё правільна — яны ж дзікія. І паводзяць сябе асцярожна. З логава выходзяць рэдка і пры любым гуку хаваюцца назад».
Палавой спеласці ваўкі дасягаюць у 2-гадовым узросце. Гон праходзіць у студзені-лютым, а нараджэнне дзіцянят — вясной. Цяжарнасць у ваўчыцы працягваецца крыху больш за два месяцы.
У прыплодзе бывае ад 4 да 12, звычайна 4-6 ваўчанят. Растуць яны вельмі хутка. Ваўчаняты ранніх вывадкаў ужо ў канцы жніўня важаць 10-12 кг.
У выхаванні дзіцянят бяруць аднолькава актыўны ўдзел і саміца, і самец. І хоць у першыя тыдні жыцця ваўчаняты сілкуюцца толькі матчыным малаком, ужо ў месячным узросце малыя прагна ядуць напаўператраўленую мясную ежу, якую «гатуюць» ім і маці, і бацька.
Чытайце таксама:
У Белавежскай пушчы знайшлі яшчэ адну рэдкую расліну — сібірскі касач
У Белавежскай пушчы больш чым праз 40 гадоў зноў знайшлі вельмі рэдкі від асакі
У Белавежскай пушчы абмералі дуб-волат, за 20 гадоў ён значна падрос