Сваякі не ведаюць, дзе Павел Севярынец
23 чэрвеня зняволенага апазіцыйнага палітыка і літаратара асудзілі да змены рэжыму ўтрымання па ініцыятыве шклоўскай калоніі №17, дзе палітвязень адбываў пакаранне. Паўла Севярынца вырашылі перавесці ў турму на 3 гады. Паводле заканадаўства, адміністрацыя ПК №17 павінна была цягам 10 дзён апавясціць сваякоў пра новае месца адбыцця пакарання іхнага родзіча. Аднак ніякіх звестак пра гэта няма ні з калоніі, ні ад самога Паўла.
07.07.2023 / 11:47
У фэйсбуку Таццяна Севярынец, маці палітзняволенага, мяркуе, што яшчэ да этапу ў турму яго змясцілі ў штрафны ізалятар. «Судзячы па ўсім, да этапу яго пасадзілі ў ШІЗА. Катам мала, што чалавек на ПКТ, трэба яшчэ і ШІЗА, дзе ні пісаць, ні чытаць нельга», — напісала яна на сваёй старонцы ў фэйсбуку.
У ПКТ (памяшканне камернага тыпу) Павел Севярынец трапіў у якасці чарговага спагнання: сёлета ў красавіку адміністрацыя ПК-17 паставіла палітзняволенага на ўлік як злоснага парушальніка рэжыму. Яму скарацілі дазволеную колькасць званкоў дадому і грашовых пераводаў, а пазней пазбавілі і працяглага спаткання. Яшчэ праз некалькі месяцаў кіраўніцтва калоніі звярнулася ў суд, каб перавесці Севярынца на больш жорсткі рэжым утрымання.
Шклоўскі раённы суд падтрымаў заяўнікаў: бліжэйшыя 3 гады Павел Севярынец мусіць правесці за турэмнымі кратамі, але дзе ён зараз, застаецца невядомым.
Паўла Севярынца затрымалі 7 чэрвеня 2020 года каля дома, калі ён вяртаўся з перадвыбарчага пікета Святланы Ціханоўскай на мінскай Камароўцы. З таго часу ён за кратамі.