Эрдаган запатрабаваў за падтрымку ўступлення Швецыі ў НАТА прыёму Турцыі ў Еўрасаюз
Прэзідэнт Турцыі Рэджэп Таіп Эрдаган паставіў новую ўмову для ўступлення Швецыі ў НАТА: запатрабаваў «адкрыць для Турцыі шлях у ЕС». Пра гэта ён сказаў усяго за некалькі гадзін да пачатку саміту Альянсу ў Вільні.
10.07.2023 / 17:24
Фота: Dursun Aydemir/Anadolu Agency/Bloomberg via Getty Images
Акрамя таго, Эрдаган паабяцаў агучыць гэтую самую пазіцыю на сустрэчы з прэм'ер-міністрам Швецыі Ульфам Крыстэрсанам і генеральным сакратаром НАТА Енсам Столтэнбергам.
«Я звяртаюся да тых краін, якія прымушаюць Турцыю ўжо больш за 50 гадоў чакаць перад дзвярыма ў Еўрасаюз. Спачатку адкрыйце шлях для Турцыі ў ЕС, а затым мы адкрыем шлях для Швецыі ў НАТА, як ужо зрабілі для Фінляндыі», — заявіў турэцкі прэзідэнт перад адпраўленнем у Вільню, паведамляе Reuters.
Эрдаган не ўдакладніў, што менавіта ён меў на ўвазе пад словамі «адкрыць шлях» у ЕЗ. Прэс-сакратарка Еўракамісіі Дана Спінант заявіла, што не варта звязваць два розныя працэсы: уступленне Швецыі ў НАТА і Турцыі — у Еўразвяз.
«У ЕС вельмі структураваны працэс пашырэння, і ёсць вельмі выразны набор крокаў», — заявіла яна журналістам у Бруселі, паведамляе Bloomberg.
Турцыя імкнецца ўступіць у ЕС з 1980-х гадоў. Афіцыйныя перамовы, пачаліся яшчэ ў 2005 годзе, аднак ужо даўно зайшлі ў тупік. Прычыны рознагалоссяў — правы чалавека ў Турцыі, незалежнасць судовай сістэмы і разведка Анкарой энергетычных рэсурсаў у спрэчных водах вакол Кіпра.
Швецыя падала заяўку на ўступленне ў НАТА летась разам з Фінляндыяй пасля ўварвання Расіі ва Украіну. З-за складанасцяў у дасягненні згоды паміж Анкарой і Стакгольмам Фінляндыя ўступала ў блок самастойна і стала паўнапраўным сябрам Альянсу ў красавіку гэтага года.
Чытайце таксама:
Лідары Швецыі і Турцыі сустрэнуцца напярэдадні саміту NATO