Беларускім крамам будуць даплачваць за продаж айчынных тавараў
Каб матываваць крамы актыўней прадаваць айчынныя тавары, беларускія ўлады ўвялі стымулюючыя выплаты. Адпаведная пастанова Міністэрства антыманапольнага рэгулявання і гандлю была прынята яшчэ ў чэрвені. Сёння яна была апублікавана на Нацыянальным прававым інтэрнэт-партале (і ўступае ў сілу ад сёння).
13.07.2023 / 17:39
Згодна з пастановай, стымулюючыя выплаты могуць быць дадзены прадаўцу, напрыклад, у выпадках закупкі ў вытворцы прадукцыі пэўнага аб'ёму, а таксама ў выпадку павелічэння аб’ёму закупкі такіх тавараў; у выпадку рэалізацыі тавараў на ўмовах пастаўшчыка з правядзеннем распродажаў; калі прадавец дастаўляе тавары ад пастаўшчыка да крамы ці склада за свой рахунак; калі прадавец за свой рахунак рамантуе ці праводзіць тэхнічнае абслугоўванне неспажывецкіх тавараў. Выплаты гэтыя робіць пастаўшчык.
Гаворка ідзе пра пастаўку на ўнутраны рынак тавараў, вырабленых у Беларусі, а таксама імпартаваных нехарчовых тавараў. Велічыня ўзнагароды будзе залежыць ад кошту закупленай прадукцыі (пры гэтым пры разліку выплат не ўлічваецца падатак на дабаўленую вартасць).
Атрымаць стымулюючыя выплаты аб’ект гандлю зможа толькі ў тым выпадку, калі не мае перад пастаўшчыком непагашанай пратэрмінаванай запазычанасці за набытыя раней тавары. І яшчэ адзін важны момант: гэтыя выплаты не распаўсюджваюцца на сацыяльна вялікую групу харчовых тавараў (напрыклад, мяса і субпрадукты з яго, малочныя прадукты, яйкі, крупы, мука, хлебабулачныя вырабы, цукеркі, мармелад, асобныя віды гаротніны і іншае — усяго ў спісе 71 пазіцыя).
Раней урад Беларусі падкрэсліваў, што адна з ключавых задач дзяржавы на спажывецкім рынку — максімальная падтрымка беларускіх вытворцаў.
Чытайце таксама:
Як адрозніваюцца крэдыты на жытло ў Беларусі, Польшчы і Літве?