У Магілёве адкрылі мемарыяльную дошку Барысу Маісееву
Мемарыяльную дошку адкрылі сёння на сцяне дома на вуліцы Чалюскінцаў у Магілёве, дзе нарадзіўся і 14 гадоў жыў Барыс Маісееў.
16.07.2023 / 15:27
У Магілёве адкрылі мемарыяльную дошку Барысу Маісееву. Усе фота: mogilevonline / Telegram
Мемарыяльны барэльеф прадстаўляе з сябе медаль. У цэнтры — профіль Маісеева. Па крузе размешчана цытата спевака: «Я люблю гэты горад, я люблю гэты дом».
Скульптар — Філіп Трушын, які прысутнічаў на адкрыцці мемарыяльнай дошкі.
Мерапрыемства прайшло ў рамках афіцыйнай праграмы закрыцця фестывалю «Славянскі базар» у Віцебску.
Барыс Маісееў — расійскі танцоўшчык і эстрадны спявак, які праславіўся дзякуючы эпатажным манерам. Магілёў — яго радзіма, у Беларусі ён правёў дзяцінства і раннюю маладосць. А памёр Маісееў сёлета 27 верасня на 69-м годзе жыцця ў Маскве.
Тэарэтычна перашкодай для ўшанавання памяці Маісеева ў Магілёве маглі стаць правілы ўсталявання мемарыяльных знакаў не раней за пэўны тэрмін пасля смерці асобы. У Магілёве гэты тэрмін — 5 гадоў пасля смерці знакамітага чалавека.
А таксама супраць ушанавання памяці Маісеева напярэдадні выступілі некаторыя праўладныя блогеры, для якіх танцор недастаткова шанаваў традыцыйныя скрэпныя каштоўнасці.
Маісееў на пачатку 1990-х адным з першых у Расіі зрабіў камінг-аўт і стаў прэзентаваць сябе як спевака-гомасэксуала, што знайшло адлюстраванне і ў яго рэпертуары, але гэта не перашкаджала яго вялікай папулярнасці ў 1990-я.