У Расіі вырасце ўтыльзбор на аўто — закране і беларускіх аўтаперагошчыкаў
З 1 жніўня ў Расіі будзе праіндэксаваны ўтылізацыйны збор на легкавы і грузавы транспарт. Рост складзе 1,7 — 3,7 раза ў залежнасці ад віду аўтатэхнікі і аб'ёму рухавіка. Зменяцца і некаторыя іншыя падыходы. У Беларусі ніякіх змен у стаўках утылізацыйнага збору не плануецца, але новыя правілы ў Расіі могуць адбіцца і на беларускім аўтамабільным бізнэсе.
18.07.2023 / 10:07
Ілюстрацыйны здымак. Фота: «Наша Ніва»
Што змяняецца
Пасля з'яўлення ў сакавіку 2019 года льготнай размытнёўкі на аўтамабілі для пэўнай катэгорыі грамадзян масава купляць свежапрывезеные аўто з Еўропы і ЗША ў нашай краіне пачалі і расіяне. З пачаткам поўнамаштабнай вайны ва Украіне, зыходам з Расіі сусветных аўтавытворцаў і ўвядзеннем шэрагу санкцый попыт на аўто ў Беларусі з боку расіян толькі павялічыўся. Але, як кажуць заўсёднікі бізнэсу, па машыны да нас у большасці выпадкаў ехалі не шараговыя аўтааматары, а менавіта расійскія перакупы, супраць якіх у тым ліку і накіраваныя новыя змены ў расійскім заканадаўстве.
Ад 1 жніўня ў Расіі не толькі зменяцца тарыфы на ўтылізацыйны збор для юрыдычных асоб, але і метад спагнання для фізічных.
На бягучы момант утылізацыйны збор для фізічных асоб у РФ нават меншы за той, што ёсць у Беларусі. У нас за легкавік ва ўзросце да 3 гадоў трэба заплаціць 544 рублі (каля 160 еўра). Ад 3 да 7 гадоў — 816 рублёў (каля 245 еўра) і 1225 рублёў (каля 370 еўра), калі аўто старэйшае за 7 гадоў.
У Расіі за аўто да 3 год утыльзбор для фізічных асоб складае 3400 расійскіх рублёў (каля 34 еўра), за аўто, старэйшае за 3 гады, — 5200 расійскіх рублёў (каля 52 еўра).
Так званы льготны тарыф для фізічных асоб захаваецца і пасля 1 жніўня. Але ёсць важны момант. Калі чалавек захоча прадаць увезены з-за мяжы аўтамабіль цягам першага года ад моманту ўвозу, то для таго, каб з'явілася магчымасць змяніць уласніка, яму давядзецца заплаціць утылізацыйны збор па тарыфе юрыдычнай асобы.
А гэта ўжо зусім іншыя лічбы. За аўтамабіль ва ўзросце да 3 гадоў з рухавіком да 2 літраў трэба будзе выкласці 178 400 расійскіх рублёў (амаль 1800 еўра). Калі машыне ўжо споўнілася тры гады, то ўтыльзбор складзе 313 800 расійскіх рублёў (больш за 3000 еўра).
З павелічэннем аб'ёму стаўка расце. Так, напрыклад, за 4-гадовы аўтамабіль з рухавіком да 2000 см³ жадаючаму перапрадаць аўтамабіль цягам 12 месяцаў пасля ўвозу давядзецца заплаціць 480 200 расійскіх рублёў (без малога 5000 еўра).
Такія змены ў заканадаўстве зробяць перапродаж свежапрывезеных аўтамабілей не надта выгаднай справай.
Сярод іншага варта адзначыць, што льготныя стаўкі будуць дзейнічаць толькі ў дачыненні да аўто з рухавіком да 3 літраў. Калі аб'ём будзе большым, то фізічнай асобе адразу давядзецца плаціць утыльзбор на ўзроўні юрыдычнай асобы. А гэта ўжо ад 2500 да 7000 еўра ў эквіваленце. Таму аматарам аўто з вялікім аб'ёмам у любым выпадку давядзецца раскашэліцца.
Пацерпяць і беларускія перагоншчыкі
Суразмоўца з ліку аўтабізнэсоўцаў, які займаецца перапродажам на РФ дарагіх аўто са Штатаў, лічыць, што такія змены негатыўна адаб'юцца на яго дзейнасці.
«Рэч у тым, што да нас з РФ у асноўным прыязджаюць не канчатковыя пакупнікі, якія бяруць аўто для сабе, а перакупы. Яны куплялі аўто ў Беларусі, пасля везлі яго ў Расію, дзе рэгістравалі на сваю «вешалку», рабілі электронны тэхпашпарт (ПТС), сертыфікат, усталёўвалі кнопку SOS, бо без гэтага ў РФ нельга паставіць аўтамабіль на ўлік. Нават калі ён прывезены з Беларусі», — тлумачыць суразмоўца.
Па ягоны словах, менавіта праз даволі складаную працэдуру падрыхтоўкі аўто да рэгістрацыі машыны ў большасці выпадкаў куплялі менавітая прадпрымальныя расейцы, а не канчатковыя спажыўцы.
Ілюстрацыйны здымак. Фота: «Наша Ніва»
«Расейцы ў большасці сваёй вельмі лянівыя, ім трэба, каб усё было зроблена «пад ключ». Таму самі яны рэдка да нас едуць, бо клопату з такім аўто даволі шмат. Ім лепей, каб усё за іх зрабілі, а яны толькі перааформілі ўжо цалкам гатовы аўтамабіль на сябе», — тлумачыць мужчына.
Суразмоўца лічыць, што праз змены ў расійскім заканадаўстве займацца перапродажам аўто на РФ стане значна складаней.
«І без таго не самы вялікі попыт, які мы назіраем апошнімі месяцамі стане яшчэ больш кволым. Можна чакаць, што на нейкі перыяд цікавасць да аўто з боку расіян стане блізкай да нуля», — лічыць мужчына.
«Давядзецца шукаць іншыя схемы і шляхі»
Беларускім і расійскім атабізнэсоўцам, якія займаліся перапродажам аўто з ЕС і ЗША, хутка давядзецца працаваць па новых правілах. Якія, як думае іншы суразмоўца, усё адно не спыняць гэты бізнэс.
«Давядзецца шукаць іншыя схемы і шляхі. Цяпер расійскім перакупшчыкам трэба будзе везці з Беларусі машыну, якая проста знята з уліку, але яшчэ не прададзена новаму ўласніку. У Расіі ім давядзецца прадаваць яе на беларускіх транзітах, каб першым уласнікам у РФ быў канчатковы пакупнік, які адразу зарэгіструе аўто на сябе.
Бо інакш давядзецца даплаціць некалькі тысяч еўра ўтылізацыйнага збору, што ў большасці выпадкаў зробіць здзелку невыгаднай», — лічыць суразмоўца, які прыганяе аўто з Еўропы.
Па словах перагоншчыка, праца па такой схеме мусіць аказаць пэўны негатыўны ўплыў, бо не кожны пакупнік аўто ў РФ захоча звязвацца з такой схемай. Ім трэба будзе купляць машыну, якая знаходзіцца ў Расіі, але дакументы ў яе беларускія, а дамову куплі-продажу давядзецца складаць ад імя беларускага ўласніка, які знаходзіцца невядома дзе.
Льготнікі атрымаюць дадатковыя рызыкі
Сярод іншага аўтабізнэсовец адзначае, што ад такой схемы не ў захапленні будуць і беларускія льготнікі.
«Такая машына яшчэ невядома колькі будзе фармальна заставацца ва ўласнасці беларускай «вешалкі». Адпаведна, і адказнасць будзе на юрыдычным уласніку аўто, калі нешта здарыцца ці банальна прыйдзе штраф за перавышэнне хуткасці. Бо пераход уласнасці не адбудзецца. Машына будзе знята з уліку для продажу, у яе будуць транзітныя нумары, але пакуль расійскі перакуп не прадасць яе і не зарэгіструе на канчатковага пакупніка, то фармальна машына будзе ўвесь гэты час належаць беларусу», — звяртае ўвагу суразмоўца.
Перагоншчык аўто з Еўропы, які і іншы суразмоўца, таксама лічыць, што такія змены ў РФ могуць негатыўна адбіцца на ягоным бізнэсе.
«Магчыма, праз гэта стане крыху больш тых расіян, якія самі наважацца прыехаць па аўто ў Беларусь, але не думаю, што іх колькасць моцна павялічыцца», — разважае перагоншчык.
Ёсць яшчэ адзін варыянт, як беларускія і расійскія перакупшчыкі змогуць працаваць у новых умовах.
Частка машын будзе ехаць у РФ адразу пасля размытнёўкі ў Беларусі нават без пастаноўкі на ўлік у беларускім ДАІ. Расійскі перакупшчык будзе выпісваць дагавор купні-продажу на новага ўласніка, а размытненае аўто так ніколі і не даедзе да рэгістрацыйнага аддзялення ў Беларусі.
«Некаторыя і цяпер так перапрадаюць машыны, але тут трэба разумець, што не кожны льготнік на такое пагадзіцца», — прызнаецца перагоншчык.
Варта адзначыць, што льготнікі, якія падпісваюцца на перапродаж аўто без яго рэгістрацыі ў ДАІ, могуць стаць першымі, на каго звернуць увагу кантралюючыя органы. Бо ў такім выпадку будзе значна прасцей знайсці абгрунтаванне таго, што льгота была выкарыстана не для асабістага карыстання, то-бок не па назначэнні.
Для даведкі, летась колькасць аўто, якія фізічныя асобы імпартавалі ў Беларусь з трэціх краін, вырасла ў 2,4 раза. Калі за ўвесь 2021 год гэта было 35 тысяч аўтамабіляў, то за 2022-і — больш за 80 тысяч. Амаль усе яны былі размытнены з выкарыстаннем льготы. Значная частка гэтых машын пасля апынулася ў Расіі.
Продаж новых аўтамабіляў у Беларусі ў чэрвені вырас амаль на чвэрць
«Белджы» набірае супрацоўнікаў і плануе выпускаць аўто пад уласным брэндам