Chatni varyjant chačapury — prostyja hruzinskija bliny na kiefiry

Chačapury — tradycyjnaja hruzinskaja strava, jakaja zavajavała papularnaść va ŭsim śviecie. Hety smačny piroh z syrnaj načynkaj maje doŭhuju historyju, što sychodzić u hłyb stahodździaŭ. Jaho prostuju viersiju možna lohka pryhatavać doma.

23.07.2023 / 09:28

Chačapury. Fota: Getty Images

Tradycyjnyja chačapury hatujuć z draždžavoha ciesta, jakoje zamiešvajuć i pakidajuć na peŭny čas, kab jano padniałosia. U vyniku jano stanovicca puchkim i lohkim dy stvaraje idealnuju asnovu dla syrnaj načynki, dla jakoj tradycyjna vykarystoŭvajecca hruzinski syr sułuhuni.

Jość niekalki vidaŭ chačapury, jany adroźnivajucca formaj i načynkaj. Samyja papularnyja varyjanty:

• miehrelskaje chačapury — chačapury kruhłaj abo daŭhavataj formy z načynkaj z syru sułuhuni, da jaho taksama časta dadajuć jajka;
• imieruli chačapury padobnaje da miehrelskaha, ale bieź jajek;
• adžarskaje chačapury — chačapury ŭ formie łodački z načynkaj z syru sułuhuni i jajka. Paśla vypiakańnia źvierchu kładuć kavałačak masła i jajka ŭśmiatku, jakija pierad užyvańniem źmiešvajuć.

Chačapury možna zhatavać i doma. Muka, kiefir i jajka — asnova smačnych blinoŭ, jakija možna chutka śpiačy, nie vychodziačy z ułasnaj kuchni. Ćviordy syr dla načynki — najlepšy vybar, ale, kali ŭ vas jaho niama, impravizujcie. U adroźnieńnie ad tradycyjnaha recepta, pryviedzieny nižej nie praduhledžvaje dadavańnia draždžej.

Kab pryhatavać damašniuju viersiju blinoŭ-chačapury, spatrebicca:

• 300 mł kiefiru,
• 450 hramaŭ muki,
• 2 jajki,
• 10 h razrychlalniku,
• 1 čajnaja łyžka cukru,
• 3 stałovyja łyžki aleju,
• 350 h ćviordaha syru,
• sol.

Hatavańnie:

1. U misku nalicie kiefir, uźbicie adno jajka, dadajcie čajnuju łyžku soli i čajnuju łyžku cukru i staranna źmiašajcie.
2. Zatym dadajcie alej, prasiejanuju muku i razrychlalnik i pieramiašajcie ŭsie składniki da adnastajnaści.
3. Sfarmujcie ź ciesta šar, nakryjcie jaho i pakińcie na 10 chvilin.
4. Natrycie syr na bujnoj tarcy. Źmiašajcie jaho z adnym jajkam i drobkaj soli.
5. Padrychtavanuju syrnuju masu padzialicie na čatyry častki i sfarmujcie ź ich šaryki.
6. Pasypcie stoł mukoj i pakładzicie na jaho ciesta. Padzialicie ciesta na čatyry častki i zrabicie ź ich šaryki. Raskačajcie kožny šaryk, źmiaścicie syrnyja šaryki na centr, zatym źbiarycie ciesta tak, kab atrymalisia miašečki z syrnym šarykam unutry. Źlohku razamnicie hetyja miašečki palcami, sfarmavaŭšy ź ich blincy, a zatym akuratna raskačajcie.
7. Vypiakajcie bliny z abodvuch bakoŭ na suchoj tefłonavaj patelni, nakryŭšy nakryŭkaj, na siarednim ahni.
8. Hatovyja, jašče ciopłyja blincy možna vyšmaravać źvierchu masłam.

Čytajcie jašče:

Hruzija zapatentavała «čaču», «čurčchełu», «chačapury» — i 27 inšych nacyjanalnych praduktaŭ

Śniadanak, dziela jakoha chočacca pračnucca: bliny z syram i zielaninaj

Jačedžan — chrumstkija karejskija bliny z harodninaj, jakija padymuć vam nastroj

Nashaniva.com