На Беласточчыне асвяцілі помнік 20-гадовай дзяўчыне, якая загінула ў 1946 годзе ад рук жаўнераў Бурага і была абвешчаная святой
У 2020 годзе святы Сабор епіскапаў Польскай аўтакефальнай праваслаўнай царквы ўпісаў Марыю Петручук у шэраг святых мучанікаў Холмскіх і Падляшскіх. Яна — святая праваслаўнай царквы.
31.07.2023 / 13:26
Фота: Радыё «Рацыя». Над усімі ўзвышаецца прафесар Латышонак
У нядзелю на праваслаўных могілках у Малешах на Беласточчыне прайшло асвячэнне помніка святой пакутніцы Падляшскай зямлі Марыі Петручук, піша радыё «Рацыя».
На могілках у Малешах сабралася больш за сто чалавек, сярод удзельнікаў жалобных урачыстасцяў быў старшыня Беларускага гістарычнага таварыства Алег Латышонак.
Помнік асвяціў настаяцель прыхода айцец Марк Якімюк:
«Наймалодшым [з забітых] быў хлопчык, ён меў няпоўныя чатыры гады, а тут Марыя, што аддала не сваю годнасць, а сваё жыццё. Будзе малая святыня, каторую ніхто, напэўна, не абміне, калі прыйдзе на могілкі. Хачу падзякаваць усім сябрам, што вельмі многа часу прысвяцілі адшуканню, апісанню ўсіх мучанікаў», — сказаў святар.
Фота: Радыё «Рацыя»
20-гадовая Марыя Петручук загінула ад рук жаўнераў Бурага 2 лютага 1946 года, баронячы свой дзявочы гонар. Яна ўведзеная ў лік святых пакутнікаў Падляшскай зямлі разам з усімі ахвярамі злачынстваў, учыненых аддзелам польскага ўзброенага падполля пад камандаваннем Рамуальда Райса (Бурага) у Заляшанах, Вульцы Выганоўскай, Пухалах Старых, Занях, Шпаках і Канцавізне.
Фота: Радыё «Рацыя»
У 2020 годзе святы Сабор епіскапаў Польскай аўтакефальнай праваслаўнай царквы ўпісаў Марыю Петручук у шэраг святых мучанікаў Холмскіх і Падляшскіх. Яна — святая праваслаўнай царквы.
Чытайце таксама:
Тлумачым, хто такія «праклятыя жаўнеры», Рамуальд «Буры» Райс і якое дачыненне гэта мае да Беларусі