Ministr abarony Litvy: Na kožnaha miortvaha Pryhožyna źjavicca novy Pryhožyn
Ministr abarony Litvy Arvidas Anušaŭskas, kamientujučy hibiel kamandzira PVK «Vahnier» Jaŭhiena Pryhožyna, adznačaje, što rana ci pozna jahonaje miesca budzie zaniataje. Na dumku ministra, na biaśpieku Litvy ŭpłyvaje nie śmierć Pryhožyna, a vajna va Ukrainie, piša Delfi.lt.
26.08.2023 / 08:31
Arvidas Anušaŭskas — prafiesijny historyk, daśledčyk historyi litoŭskich śpiecsłužbaŭ u mižvajennaj Litvie, historyi dziejnaści KDB u Litvie, daśledčyk stalinskich represij. Jon — dacent Vilenskaha ŭniviersiteta, aŭtar mnostva knih pa historyi i aŭtar scenaroŭ 14 dakumientalnych filmaŭ. Na fota jon z prezidentam Hitanasam Naŭsiedam, źleva — ministarka ekanomiki i navacyj Aŭšrynie Armanajcie. Fota z fejsbuka Arvidasa Anušaŭskasa.
«Na kožnaha miortvaha Pryhožyna źjavicca novy Pryhožyn. Jaho miesca mohuć zaniać inšyja asoby, na inšych padstavach, mahčyma, ź inšymi suviaziami ź Minabarony Rasii», — ministr prakamientavaŭ śmierć lidara hrupoŭki «Vahnier». Pavodle jaho, hrupa najmitaŭ niebiaśpiečnaja, ale ahulnaja situacyja ź biaśpiekaj Litvy pradyktavanaja vajnoj va Ukrainie.
«My šmat havorym ab hetaj hrupoŭcy — tak, jana niebiaśpiečnaja, tak, u niekatorych krainach jana abvieščanaja terarystyčnaj. Adnak ahulnaja situacyja ź biaśpiekaj dyktujecca vajnoj va Ukrainie, i ŭsie astatnija dziejańni źviazanyja z hetym», — skazaŭ Anušaŭskas.
Kiraŭnica litoŭskaha MUS Ahnie Biłatajcie padkreśliła, što, niahledziačy na śmierć lidara PVK «Vahnier», Litva ŭvieś čas adčuvaje pahrozu z boku ahresiŭnych režymaŭ u Biełarusi i Rasii.
«My žyviem pobač z takimi susiedziami, jak biełaruski režym i Rasijskaja Fiederacyja, tamu ŭvieś čas adčuvajem pahrozy, isnuje pastajannaja niebiaśpieka», — skazała ŭ piatnicu Biłatajcie.
«Ale my reahujem adekvatna, usie našy ŭstanovy i słužby hatovyja. A što tyčycca budučyni, to my sapraŭdy składajem roznyja scenary i razumiejem, što ŭ hetym kantekście treba być pilnymi i rassłablacca nielha», — padkreśliła ministarka.
Čytajcie taksama:
Ministr abarony Litvy: My nie źbirajemsia dryžeć pierad vahnieraŭcami ŭ Biełarusi
Premjerka Šymanicie pra vahnieraŭcaŭ u Biełarusi: «Hatoŭnaść Litvy — adekvatnaja situacyi»
Łukašenka: Ja i nie pavinien harantavać biaśpieku Pryhožyna. A vahnieraŭcy «nikudy nie biahuć»