Ватыкан удакладніў словы Папы наконт «вялікай Расіі»
Дырэктар прэс-службы Ватыкана Матэа Бруні адказаў на пытанні журналістаў, якія тычацца заключнага прывітання Папы Францішка, звернутага да маладых расійскіх католікаў, што бралі ўдзел у Х Усерасійскай сустрэчы каталіцкай моладзі, паведамляе Радыё Ватыкана.
29.08.2023 / 14:28
Фота: Andrew Medichini / AP
Падчас тэлемосту 25 жніўня Святы Айцец прачытаў прамову, адказаў на некалькі пытанняў і завяршыў сустрэчу кароткім прывітаннем.
«У словах прывітання, спантанна звернутых да некаторых маладых расійскіх каталікоў некалькі дзён таму, як відавочна вынікае з кантэксту, у якім яны былі прамоўленыя, Папа хацеў падбадзёрыць маладых людзей, каб яны захоўвалі і прасоўвалі тое, што ёсць пазітыўнага ў вялікай расійскай культурна-духоўнай спадчыне, і, безумоўна, ён не меў намеру ўсхваляць імперыялісцкую логіку і кіраўнікоў, якіх згадаў, каб паказаць на некаторыя адпаведныя гістарычныя перыяды», — растлумачыў кіраўнік прэс-службы Святога Пасаду Матэа Бруні.
Нагадаем, што Папа Францішак, звяртаючыся да ўдзельнікаў Х Усерасійскага дня каталіцкай моладзі ў Санкт-Пецярбургу, заявіў наступнае: «Ніколі не забывайце пра спадчыну. Вы — нашчадкі вялікай Расіі: вялікай Расіі святых, кіраўнікоў, вялікай Расіі Пятра I, Кацярыны II, той імперыі — вялікай, адукаванай, вялікай культуры і вялікай чалавечнасці. Ніколі не адмаўляйцеся ад гэтай спадчыны. Вы — нашчадкі вялікай Матухны Расіі, крочце наперад з гэтым. І дзякуй вам — дзякуй за ваш спосаб быць, за ваш спосаб быць рускімі».
Чытайце таксама:
Крыўдна, што з вуснаў Папы гучаць вялікадзяржаўныя ідэі Расіі — МЗС Украіны