U Minsku znoŭ pamianiali sistemu taryfaŭ na prajezd. Što źmianiłasia i kolki buduć kaštavać prajaznyja?
U Minsku znoŭ źmianili sistemu taryfaŭ na prajezd hramadskim transpartam. Taryfnuju sietku spraścili i prybrali bolš za dziasiatak raznavidnaściaŭ taryfaŭ. Vydańnie Blizko.by pahladzieła, što mienavita źmianiłasia i kolki ciapier mohuć kaštavać prajaznyja bilety.
29.08.2023 / 18:17
Što adbyłosia?
MARH vypuściŭ pastanovu ab źmienie svajho ž rašeńnia «Ab taryfach na pieravozki pasažyraŭ, bahažu i hruzabahažu čyhunačnym transpartam» ad 3 śniežnia 2020 hoda. U taryfy ŭnieśli źmieny i zaadno pierapisali instrukcyju da pastanovy. Ciapier sistema spraściłasia.
Taryfy na prajezd vyraśli?
Nie, taryfy nie vyraśli. Spraścili samu taryfnuju sietku, prytym tolki ŭ toj častcy, jakaja tyčycca prajaznych na haradski hramadski transpart, sumieščanych z prajaznymi na tak zvanyja «haradskija elektryčki». Usich astatnich taryfaŭ nie čapali zusim.
Jak było i jak stała?
Raniejšaja redakcyja pastanovy «Ab taryfach na pieravozki pasažyraŭ, bahažu i hruzabahažu čyhunačnym transpartam» dziejničała z 16 červienia hetaha hoda. Tady kvitki na ciahniki padaraželi na 20-24%.
A jašče ŭviadzieńnie tych taryfaŭ pryviało da taho, što prajazny na ŭsie vidy transpartu (uklučajučy «haradskuju elektryčku») u Minsku ŭpieršyniu staŭ kaštavać bolš za sto rubloŭ: 102 rubli 24 kapiejki.
Dyk voś, u toj pastanovie dziejničali 20 taryfaŭ na prajaznyja, jakija sumiaščajuć haradski transpart i «haradskija elektryčki». Ale paśla taho, jak 16 žniŭnia hetaha hoda ŭ Minsku ŭviali «adziny prajazny», vyjaviłasia, što častka tych taryfaŭ prosta niezapatrabavanaja.
Naprykład, prajazny na 20 sutak byŭ tolki na «haradskija elektryčki» bieź jakich-niebudź kambinacyj. A prajazny «tralejbus + tramvaj + mietro + haradskaja elektryčka» i da jaho padobnyja prosta nie pradavaŭsia, choć taryf taki isnavaŭ.
Ciapier ža MARH prosta skasavaŭ bolš za pałovu isnujučych raniej «elektryčnych» taryfaŭ i pryvioŭ taryfnuju sietku amal da takoha ž vyhladu, jaki isnuje dla prajaznych na naziemny transpart i mietro.
I jak budzie ciapier?
Ciapier buduć takija raznavidnaści taryfaŭ: abo «haradskaja elektryčka + 1 vid inšaha haradskoha transpartu», abo «haradskaja elektryčka + usie astatnija vidy transpartu».
Z 20 taryfaŭ zastałosia ŭsiaho 8: kožnaja raznavidnaść terminam na 3, 5, 10 abo 20 sutak.
Kolki buduć kaštavać prajaznyja?
Važna razumieć: u dakumiencie ad MARH pryvodziacca nie ceny na prajaznyja, a tolki taryfy na čyhunačny składnik kambinavanych prajaznych. Kab atrymać ceny na prajaznyja, treba da hetaha taryfu dadać taryfy na druhi składnik prajaznych (naziemny transpart i mietro).
Pakolki, jak my adznačali, sami taryfy nie źmianilisia, to i ceny na prajaznyja nie pavinny pamianiacca. Heta značyć, što, skažam, prajazny na 3 sutak na kambinacyju «haradskaja elektryčka + aŭtobus» budzie kaštavać, jak i raniej, 17,88 rubla, a prajazny na 30 sutak na naohuł usie vidy hramadskaha transpartu, akramia maršrutak (aŭtobusy, aŭtobusy-ekspresy, tralejbusy, tramvai, mietro, haradskaja elektryčka), — 91,19 rubla.
Ciapier stała bolš zrazumieła?
Prynamsi, pamienšyli kolkaść taryfaŭ — mahčyma, i kolkaść raznavidnaściaŭ samich prajaznych pamienšycca. Napeŭna heta možna budzie skazać, kali pastanova ŭžo ŭstupić u siłu. A ŭstupaje jana ŭ siłu paśla apublikavańnia — heta značyć na nastupny dzień, zaŭtra. Ci paśpiejuć da taho času abnavić tablicy ŭ kijoskach i kasach mietro — budzie bačna.
Ale jak minimum adzin niezrazumieły momant zastaŭsia. Prajazny na ŭsie vidy transpartu, uklučajučy «haradskuju elektryčku», kaštuje tańniej, čym prajazny na adnu tolki «haradskuju elektryčku», i značna tańniej, čym prajazny na lubuju inšuju kambinacyju «haradskich elektryčak» i astatniaha transpartu.
Čytajcie taksama:
U Minsku 1 vieraśnia startuje maštabny ekśpierymient pa apłacie hramadskaha transpartu
Dola elektratranspartu ŭ haradskich pieravozkach Minska — amal pałova
Novuju madel apłaty prajezdu dla lhotnikaŭ aprabujuć u hramadskim transparcie ŭ Minsku
Ad siońnia ŭ Minsku dziejničaje adziny prajazny
«Heta zaŭsiody tak budzie?» Minčanka ździviłasia niezvyčajnamu kantrolu ŭ aŭtobusie
U Minsku ŭvodzicca adziny prajazny. Kolki jon budzie kaštavać