У Жодзіне сталі рамантаваць памятнае месца, адкуль некалі пачынаўся горад. Перад гэтым пісалі пра яго занядбаны стан
1.09.2023 / 17:15
Чытачы аднаго з мясцовых тэлеграм-каналаў заўважылі, што ў Жодзіне на вуліцы Багуслаў Поле на памятным комплексе «Вадзяны млын» пачаліся рэстаўрацыйныя работы. На адным з будынкаў ужо з'явіўся новы дах, піша Ex-press.live.
Будынкі комплексу ў жніўні 2023 года. Фота: сацсеткі
Усталяваны помнік быў у 2008 годзе Жодзінскім гарадскім выканаўчым камітэтам. Месца для яго выбралі невыпадкова. Менавіта тут, на рэчцы Жодзінцы, у 1663 годзе быў пабудаваны першы ў Жодзіне млын. Макет меў сімвалізаваць сабой пачатак гістарычнага шляху будучага горада.
Каля брамы комплексу быў усталяваны памятны знак з надпісам: «У 1643 годзе на месцы сутыкнення рэк Плісы і Жодзінкі князем Багуславам Радзівілам было заснавана мястэчка Багуслаў Поле, якое паклала пачатак сучаснаму гораду Жодзіна. Памятны знак устаноўлены ў гонар 365-годдзя з дня заснавання Жодзіна». Распрацаваў макет комплексу Уладзімір Глазун.
Аўтар імкнуўся паказаць традыцыйную беларускую сялянскую сядзібу, каб наведвальнікі маглі лёгка ўявіць сабе, як выглядала Жодзіна некалькі соцень гадоў таму. А каб удыхнуць жыццё ў сваё тварэнне, аўтар «насяліў» сядзібу скульптурнымі персанажамі: мельнікам, яго жонкай і іх дваровым сабакам. У яго таксама ёсць свой дом. Сабачая будка размяшчаецца ля ўвахода ў гаспадарскі дом.
Хоць гэты комплекс яшчэ і не вельмі стары, яму ўсяго 15 гадоў, але за гэты час ён прыйшоў у варты жалю стан. Як напісаў чытач Ex-press.live па імені Дзяніс, «да яго ўжо не вадзілі экскурсій, ды і нага прыбіральніка-камунальніка сюды наўрад ці ступала».
«Адразу скажу: на месцы экспазіцыі мала што засталося. А вось як яго адрамантуюць, і куды «на Багуслаў Поле працэс пайшоў», паглядзець цікава», — лічыць Дзяніс.
У красавіку жыхар Жодзіна Сяргей паказаў, як выглядае гістарычнае месца — комплекс «Багуслаў Поле». Ён таксама быў абураны тым, што месца, якое калісьці абвяшчалі гістарычным, у такім жахлівым стане.
Так выглядалі будынкі комплексу ў красавіку 2023 года
У красавіку гэтага года на кепскі стан помніка, які прэзентаваўся як адзін з сімвалаў горада, звяртаў увагу іншы чытач выдання па імені Сяргей. Магчыма, менавіта тая публікацыя стала сігналам для гарадскіх уладаў, што з гэтым трэба нешта рабіць.
Чытайце таксама:
У Жодзіне «загінуў» лазеншчык, добра вядомы ў горадзе
«Зелянца для прыгажосці». Як выглядае вада на «найлепшым» пляжы Беларусі