Мядзведзь на мяжы Літвы з Беларуссю пратэсціраваў надзейнасць памежнага плоту ВІДЭА
У сацыяльных сетках стала распаўсюджвацца відэа мядзведзя, які спрабуе пералезці праз памежны плот. Не здолеўшы пералезці яго праз верх, мядзведзь спрабаваў падкапацца пад агароджу, а пасля разбурыць яе. Літоўскія памежнікі пацвердзілі, што гэты інцыдэнт сапраўды зафіксаваны ў Літве каля мяжы з Беларуссю, паведаміў літоўскі тэлеканал Tv3.lt.
02.09.2023 / 01:22
Скрыншот з відэа
У сюжэце адзначаюць, што мядзведзяў цяпер вельмі шмат жыве ў Беларусі, а таксама нямала іх у Эстоніі і Латвіі. А вось у Літве яны стала жывуць вельмі рэдка і толькі праз яе мігруюць — ці з Беларусі на поўнач, ці з поўначы ў Беларусь.
Спачатку мядзведзь, зняты на відэа, вельмі спрытна залазіць на агароджу, але пералезці праз яе на беларускі бок яму не ўдаецца — не пускае калючы дрот. Тады звер злазіць і спрабуе падкапацца пад агароджу, але і гэта плёну не дае. Урэшце, раз'юшаная жывёліна спрабуе перакуліць плот, б'е па ім даволі моцна, але плот стаіць.
Верагодна, аднак, што нейкае выйсце мядзведзь урэшце знайшоў. Напрыклад, перабраўся ў Беларусь праз раку — мядзведзі добра плаваюць, а на рэках агароджы не ставяць.
Літоўскія памежнікі пацвердзілі, што кадры былі знятыя ў Літве, у Свянцянскім раёне. Мядзведзь сапраўды спрабаваў перайсці праз агароджу ў Беларусь 18 жніўня і, напэўна, такі знайшоў дарогу і ўжо ходзіць з іншага боку.
Па словах літоўскіх памежнікаў, улетку яны бачылі на тэрыторыі Літвы двух мядзведзяў. Адзін з іх блукаў у Свянцянскім раёне, а другі — у Салечніцкім, у так званай Дзявенішскай пятлі.
Чытайце таксама:
З'явілася ВІДЭА, як у Налібоцкай пушчы сям'я ваўкоў ратуе ваўчанят ад мядзведзя
Пад Чэрвенем мядзведзь пасяліўся на кукурузным полі побач з хатамі
У Беларусі створаць новую Чырвоную кнігу і выключаць з яе некаторыя віды