Віцебскія рыбакі патрапілі пад тарнада на возеры ў Гарадоцкім раёне
Прыродны інцыдэнт адбыўся 30 жніўня. Жыхарам Віцебска, якія рыбачылі ў той дзень на возеры Вымна Гарадоцкага раёна, давялося хутка ўцякаць з гэтай мясцовасці. Такога разгулу стыхіі віцебскія рыбакі яшчэ не бачылі, некалькі хвілін ураган каля возера Вымна нішчыў лес на 35 гектарах, піша Fishingby.
02.09.2023 / 17:55
Са слоў рыбакоў, падзеі паблізу вадаёма нагадвалі зводкі з якога-небудзь паўднёваамерыканскага штата. Вецер, які падняўся пасля прыходу хмары, ператварыўся ў сапраўдны віхор. Паблізу возера пачалі лётаць дрэвы, магутныя парывы ветру вырывалі з коранем яліны і ламалі напалову хвоі. Ствалы дрэў, якія падалі, тарнада згортваў у завалы. У выніку ніхто з рыбакоў не пацярпеў, але страху яны перажылі.
Падобнае ў нашых шыротах ўбачыш не часта. Хоць у апошнія гады ўраганы ў Віцебскай вобласці не рэдкасць, усё ж уражвае маштабнасць нанесенай шкоды на адносна невялікай плошчы ляснога масіву.
Цяпер пад'езды да возера Вымна расчышчаныя, тут прыйшлося добра папрацаваць леснікам з Курынскага лясніцтва. Але сляды стыхі будуць нагадваць пра тое, што здарылася, яшчэ не адзін месяц.
Чытайце таксама:
Як паводзіцца падчас віхру і дзе небяспечна хавацца ад моцнага ветру
Падрабязнасці трагедыі на Мінскім моры, дзе ў непагадзь загінула 19-гадовая дзяўчына
Віхор, іскры лятуць: відэа ўчарашняй трагедыі на Мінскім моры
На Мінскім моры пранёсся моцны віхор, ёсць ахвяра і пацярпелыя