Restarany «Vkusno — i točka» nie traciać nadziei adkrycca ŭ Biełarusi
Rasijskaja sietka restaranaŭ chutkaha charčavańnia «Vkusno — i točka» moža źjavicca i ŭ Biełarusi. Prynamsi, sama jana nadziei nie tracić, raskazaŭ uładalnik brenda, jaki zamianiŭ «Makdonalds» u Rasii, Alaksandr Homan.
04.09.2023 / 16:36
Fota ilustracyjnaje
Jak zajaviŭ bizneśmien u intervju TASS, u najbližejšy čas «Vkusno — i točka» płanuje adkryć restarany ŭ Kitai. Taksama kampanija, pavodle Homana, nie hublaje nadziei adkrycca i ŭ Biełarusi.
«Napisali list u Amieryku, u karparacyju. Kali dazvolać, z zadavalnieńniem zrobim, choć dziesiać punktaŭ zaŭtra ž adkryjem. Jak i ŭ blizkaj mnie pa kryvi Biełarusi ci ŭ toj ža Abchazii», — padzialiŭsia płanami Homan.
Pra toje, što suśvietny brend fast-fudu «Makdonalds» pakinie biełaruski rynak, stała viadoma ŭ listapadzie 2022 hoda. Ale historyja z adychodam kampanii ŭ vyniku akazałasia davoli zabłytanaj. Spačatku zajaŭlałasia, što na miescy restaranaŭ sietki ŭ Biełarusi pavinien byŭ adkrycca rasijski brend «Vkusno — i točka», ale hetaha nie adbyłosia. Šyldy na restaranach spačatku zamianili na «My adkrylisia», a paśla sietka stała nazyvacca Mak.by.
Raniej sietka restaranaŭ «Makdonalds» u Biełarusi pracavała pa franšyzie i na 90% naležała kazachstanskamu bizneśmienu Kajratu Baranbajevu. Ciapier Kazachstan amierykanskaja sietka taksama pakinuła: pra heta stała viadoma ŭ studzieni 2023 hoda.
Čytajcie taksama:
U byłym «Makdonaldsie» ŭ centry Minska prybiralnia ciapier tolki dla naviedvalnikaŭ