Pamiatajecie mužčynu, jaki dva miesiacy žyvie ŭ minskim aeraporcie? Voś što pra jaho stała viadoma
U pasažyra, jaki bolš za dva miesiacy žyvie ŭ aeraporcie Minsk, znajšlisia svajaki. Akazałasia, što heta nie pieršy vypadak, kali mužčyna padoŭhu zatrymlivaŭsia ŭ terminałach, piša Onliner.
28.09.2023 / 09:54
Tydzień tamu my raskazali historyju Juryja. Jamu 50 hadoŭ, jon hramadzianin Rasii. Pavodle jaho słoŭ, u biełaruskim aeraporcie zastavacca nie płanavaŭ: kupiŭ bilet, ale taryf nie praduhledžvaŭ vialikaha bahažu. Dapłacić roźnicu mužčynu nie ŭdałosia.
Tak jon zatrymaŭsia ŭ aeraporcie na niekalki miesiacaŭ. Uvieś hety čas z charčavańniem dapamahali supracoŭniki aeraporta i pracaŭnica carkoŭnaj kramy.
Infarmacyju ab niezvyčajnym pasažyru supracoŭniki aeraporta pieradali ŭ Minski adździeł unutranych spraŭ na pavietranym transparcie. Žurnalisty źviarnulisia pa kamientar.
— Supracoŭniki rehularna praviarajuć dakumienty, z pašpartam u pasažyra ŭsio ŭ paradku, jon nie parušaje hramadskaha paradku, — rastłumačyła načalnik adździeła infarmacyi i hramadskich suviaziaŭ MUS Natalla Hanusievič. — U Biełarusi z Rasijaj padpisana pahadnieńnie, jakoje dazvalaje rasijanam znachodzicca ŭ našaj krainie 90 dzion biez rehistracyi. Ale kali inšaziemiec zachoča pieravysić hety termin, jamu nieabchodna atrymać dazvoł na časovaje abo pastajannaje pražyvańnie ŭ zaležnaści ad met ujezdu. Hramadzianam Rasii dazvoł vydajecca na ruki, tam ukazvajecca proźvišča, imia, imia pa baćku zamiežnika, jaho data naradžeńnia, asnoŭnyja danyja i adras, dzie jon pavinien žyć. Dazvoł na časovaje pražyvańnie ŭ Biełarusi praduhledžvaje, što hramadzianin lehalna znachodzicca ŭ krainie bolš za 90 sutak, adnak nie bolš za 1 hod.
Paźniej stała viadoma, što supracoŭniki MUS zmahli źviazacca sa svajakami Juryja.
Jany paabiacali pieravieści hrošy na bilet i dapamahčy viarnucca dadomu. Sa słoŭ siamji, mužčyna i raniej lataŭ u inšyja krainy, ale zamiest ekskursij pa słavutaściach addavaŭ pieravahu zastavacca ŭ aeraporcie i žyć tam miesiacami.