Затрымалі доктара санаторыя «Пралеска» і супрацоўнікаў «Беллакта»
Працяг маштабнай аблавы ў Ваўкавыску — сілавікі паведамілі пра новых затрыманых.
28.09.2023 / 15:07
На фота злева направа: Андрэй Тарасевіч, Аксана Шырынга, Дзяніс Арцістаў. Фота з іхніх старонак Укантакце
Сярод затрыманых — намеснік галоўнага доктара па медыцынскай частцы філіяла №6 санаторыя «Пралеска» Андрэй Тарасевіч. Сёння мужчыне споўнілася 53 гады. Калі верыць сацсеткам, ён скончыў Санкт-Пецярбургскую Ваенна-медыцынскую акадэмію ў 1993 годзе. Доўгі час працуе доктарам у Ваўкавыску. Яму закідаюць «распаўсюд экстрэмісцкіх матэрыялаў» (што цяпер звычайна азначае рэпосты з незалежных каналаў).
Другі з затрыманых — Ягор Данько. Працуе ён на «Беллакце». Яго вінавацяць у «паведамленнях у падтрымку Украіны ў тэлеграме». Затрыманая і яшчэ адна супрацоўніца «Беллакта», 39-гадовая Аксана Шырынга, за «распаўсюд экстрэмісцкіх матэрыялаў».
Ягор Данько. Фота: ягоная старонка «УКантакце» (архіўная копія)
У відэа з затрыманымі паказалі таксама 38-гадовага Дзяніса Арцістава. Яго таксама вінавацяць у «распаўсюдзе экстрэмізму».
Скрыншот з тэлеграм-канала гродзенскага ГУБАЗіК
Імаверна, лік затрыманых у Ваўкавыску падчас нядаўніх аблаў ідзе на дзясяткі — губазікаўцы ўчора паказвалі пяць затрыманых, але абяцаюць «працяг гісторыі».
Праваабаронцы звязваюць актыўнасць сілавікоў у Ваўкавыску з інцыдэнтам, які адбыўся днямі ў горадзе. Па інфармацыі «Вясны», на адным з выклікаў (бытавая сітуацыя, не звязаная з палітычным пераследам) быў збіты супрацоўнік міліцыі. Пасля гэтага ў горад адправілі сілавікоў з Мінска і Гродна, якія і пачалі «зачыстку».
Чытайце таксама:
Як засцерагчы сябе ў VK, Facebook і «Аднакласніках» — падрабязны гайд
Чарговая аблава на Гомельшчыне — ГУБАЗіК паказаў яшчэ дзевяць затрыманых