Ministerstva infarmacyi razbłakavała sajt haziety «Priessboł»
Pra razbłakavańnie sajta vydańnie paviedamiła ŭ svaim telehram-kanale.
23.10.2023 / 20:51
U červieni Mininfarm błakavaŭ sajt «Priessboła», tamu što ŭ adnoj z navin na sajcie źjaviłasia archiŭnaje fota hulca nacyjanalnaj zbornaj pa plažnym futbole, jaki znachodzicca ŭ čornym śpisie Ministerstva sportu.
Paśla taho vydańnie sprabavała adnavić pracu sajta pad novym damienam, ale i jaho Ministerstva infarmacyi zabłakavała ŭžo na druhi dzień.
«Priessboł» — najstarejšaje niezaležnaje biełaruskaje spartyŭnaje vydańnie z bolš čym 30-hadovaj historyjaj. Na fonie dramatyčnych padziej 2020-ha hazieta apublikavała adkryty list spartoŭcaŭ za sumlennyja vybary i suprać hvałtu siłavikoŭ.
Vyraznaja hramadzianskaja pazicyja stała padstavaj da kadravych ratacyj, u vyniku Biełaruskaja fiederacyja futboła, jak hałoŭny akcyjanier, damahłasia źmieny hałoŭnaha redaktara na byłoha karespandenta dziaržaŭnaha telekanała ANT Siarhieja Lisičkina. Niahledziačy na toje, što žurnalist nie mieŭ dośviedu administracyjnaj pracy, rašeńnie ŭchvalili ŭ abychod redakcyjnaha kalektyvu.
U vyniku tady praktyčna ŭsie viadučyja supracoŭniki pakinuli «Priessboł» na znak pratestu suprać «zachopu vydańnia».
Tyja ž žurnalisty, što zastalisia pracavać u vydańni, śviadoma pryniali rašeńnie, jak vykazaŭsia adzin ź jaho zasnavalnikaŭ Juryj Arłoŭ, «zatupicca», dystancyjavaŭšysia ad hramadska-palityčnaj tematyki i zasiarodziŭšysia na aśviatleńni ŭłasna spartyŭnych navin ź niejtralnaj pazicyi. Ale, jak pakazała žyćcio, u ciapierašnich umovach heta ŭsio adno nie ratuje ad represiŭnych zachadaŭ z boku dziaržavy, dla jakoj prosta niejtralnaści i apalityčnaści ŭžo niedastatkova.
Apošnim časam «Priessboł» zaznaŭ surjoznyja finansavyja ciažkaści, u pieršuju čarhu z-za błakavańnia ŭładami dostupu da sajta ŭ červieni. Da taho ž u žniŭni hetaha hoda raptoŭna pamior jaho hałoŭny redaktar Siarhiej Lisičkin. Niadaŭna źjaviłasia infarmacyja, što drukavanaja viersija vydańnia naohuł moža spynić isnavańnie. Usie nadziei byli na Biełaruskuju fiederacyju futboła.
Ale paśla pierachodu vydańnia pad kantrol ABFF stała viadoma, što jaho supracoŭnikam nie płaciać zarobkaŭ.
Čytajcie taksama:
Biełarusam z «čornaha śpisa» nie dazvolili zhulać za rasijski «Urał» u Barysavie — Trybuna
Ministr sportu stvaraje alternatyŭnuju fiederacyju futboła, bo nie moža ŭpłyvać na ABFF — Trybuna
Čamu apošni kiejs z dahavarniakami ŭ biełaruskim futbole — lutaja hańba