Čamu apošni kiejs z dahavarniakami ŭ biełaruskim futbole — lutaja hańba

Pad niebyvałaje pakarańnie trapiŭ topavy biełaruski kłub

«Šachcior» doŭhi čas byŭ adnym ź lidaraŭ biełaruskaha futboła, a ŭ minułyja dva hady — 2020-y i 2021-y — uvohule braŭ čempijonstva. Zhadajem taksama čempijonstva 2005 hoda, šeść srebranych miedaloŭ i vosiem bronz biełaruskaha čempijanatu — i heta tolki ŭ historyi niezaležnaj Biełarusi. Saliharčanie rehularna ŭdzielničali ŭ jeŭrakubkach, chacia apošni na siońnia dla ich pieramožny jeŭrakubkavy matč i datujecca letam 2019 hoda — heta była hulnia z dackim «Esbjerham» u druhim adboračnym raŭndzie Lihi Jeŭropy.

Adno z pakarańniaŭ «Šachciora» — minus 30 ačkoŭ u čempijanacie krainy-2023. To-bok ciapier kamanda z Salihorska znachodzicca na apošnim miescy turnirnaj tablicy z admoŭnym bałansam u minus 17 ačkoŭ.

Vierahodna, «Šachcior» budzie vymušany ŭ biahučym siezonie zmahacca nie za čarhovaje čempijonstva, a za toje, kab nie pravalicca ŭ nižejšy dyvizijon — pieršuju lihu. U historyi niezaležnaj Biełarusi salihorskaja kamanda tam jašče nie byvała.

Maštab historyi ŭražvaje

Adłup ad biełaruskaj futbolnaj fiederacyi (ABFF) atrymaŭ nie tolki «Šachcior», ale i jašče dva kłuby — «RCAR-BDU» (raniej viadomy jak «Enierhietyk-BDU») i «Biełšyna».

Pieršaja kamanda zorak ź nieba nie chapała, ale ž u apošnija hady stała sapraŭdnaj siensacyjaj u biełaruskim futbole (kali jon jašče zdolny ich naradžać). Kłub bieź vialikich hrašovych ulivańniaŭ, zatoje z poŭnymi entuzijazmu hulcami, druhi raz u svajoj historyi ŭźlacieŭ u vyšejšuju lihu ŭ 2018 hodzie. Nastupnyja niekalki siezonaŭ kamanda boŭtałasia ŭ nižniaj častcy tablicy, zatoje ŭ 2022 hodzie «studenty», jak ich nazyvali, zavajavali srebra čempijanatu i simpatyi tych niešmatlikich zaŭziataraŭ, jakija jašče jość u biełfutboła. Ciapier niama ni srebra, ni pieršaha ŭ historyi prava na jeŭrakubki (jakoje vyciakaje z atrymanaha srebra), dy i ź simpatyjami, vidać, dalej budzie nie tak prosta.

Što da babrujskaj «Biełšyny», hety kłub užo dabiraŭsia i da čempijonstva (2001 hod), i da pieramohi ŭ biełaruskim futbolnym Kubku (1997, 1999, 2001 hady), i da jeŭrakubkaŭ. Tym nie mienš, u apošnija hady «Biełšyna» boŭtajecca na miažy vyšejšaj i pieršaj lih i nie zapaminajecca ŭ vyšcy roŭna ničym.

U dadatak, kłub nie ŭ najlepšym finansavym stanoviščy: naprykład, uzimku kamanda źniałasia z turnira «Biełazaviec» pa pryčynie ekanomii hrošaj. Uniosak za turnir składaŭ 1500 rubloŭ, plus ad kamandy patrabavałasia dajechać z Babrujska da Žodzina — i navat heta dla ich doraha.

Ciapier ža kłub, jak i «RCAR-BDU», musić znajści na štrafy našmat bolšuju sumu — 2 tysiačy bazavych (74 tysiačy rubloŭ). U «Biełšyny» taksama dyskvalifikavanaja (chacia pakul što i ŭmoŭna) bolšaja častka kamandy, u tym liku i hałoŭny trenier.

Adnu z najvialikšych dyskvalifikacyj — ažno na piać hadoŭ! — atrymaŭ Anatol Jurevič. I heta taksama šakujučaja detal, bo Jurevič — adna z kultavych asobaŭ biełaruskaha futboła i adzin ź ludziej, adkaznych za ŭźlot tady jašče «Enierhietyka-BDU» ŭ kancy 2010-ch. Niadaŭna Jureviča pryznačyli dziaržaŭnym trenieram pa futbole, to-bok zrabili hałoŭnym kurataram hetaha vidu sportu ŭ Biełarusi, i jaho pryznačeńnie ŭzhodnienaje z Alaksandram Łukašenkam. Vychodzić, na hetuju pasadu nie znajšli bolš nadziejnaj asoby?

Dadadzim, što historyja z hetymi dahavarniakami naŭrad ci skončycca pakarańniem ad ABFF, bo jaje ŭdzielniki mohuć atrymać i kryminalnuju spravu za damoŭnyja matčy ad biełaruskaha suda (darečy, na adnaho z pradstaŭnikoŭ «Šachciora» jana ŭžo zaviedzienaja). Zastajecca tolki zdahadvacca, jaki nasamreč pamier industryi dahavarniakoŭ u Biełarusi.

Skandał takoha pamieru, vidać, pieršy ŭ biełaruskim futbole, dy i ŭ suśvietnym futbole anałahičnyja vypadki byvajuć redka.

Zhadajem padobnuju historyju ź italjanskaha futboła, jakaja atrymała nazvu «Kalčopali». Heta karupcyjny skandał 2006 hoda, u jakim byli zamazanyja piać kamand ź pieršaj i druhoj lih čempijanatu krainy: «Miłan», «Fijarencina», «Juvientus», «Łacya» i «Redžyna». Vierahodna, samy hučny jaho vynik — pieravod adnaho z hrandaŭ jeŭrapiejskaha futboła, «Juvientusa», u lihu na ŭzrovień nižej.

Kłub z Turyna heta, adnak, vytrymaŭ, a voś ci vytrymajuć «Šachcior», «RCAR-BDU» i «Biełšyna» balučyja aplavuchi ad ABFF?

U salihorskaha «Šachciora» zabrali čempijonstva 2022 hoda, a taksama 30 ačkoŭ u hetym siezonie

Śledčy kamitet zavioŭ kryminalnuju spravu suprać pradstaŭnika salihorskaha «Šachciora» za dahavorny matč

Čornaja buchhałteryja, nazapašanyja daŭhi, sumnieŭnyja tranśfiery. Jak pracujuć kałamutnyja schiemy ŭ salihorskim «Šachciory»

• 3
• 0
• 6
• 12
• 8
• 3
• 5
• 0