Rasijskija vebkam-madeli vydajuć siabie za biełarusak i ŭkrainak, kab paźbiahać chejtu z-za vajny
Vydańnie Deutsche Welle pahutaryła z rasijskimi dziaŭčatami i chłopcami, jakija zarablajuć na servisach eratyčnych veb-tranślacyj i sutyknulisia ź niehatyvam z-za svajoj nacyjanalnaści. Tyja raspaviali pra svaje siońniašnija zarobki i pra toje, jak paźbiahajuć chejtu padčas vajny.
30.10.2023 / 17:34
Fota: NurPhoto / Contributor Getty Images
Niekatoryja rasijskija vebkam-madeli na ŭmovach ananimnaści pahadzilisia raskazać vydańniu Deutsche Welle pra svaju pracu na fonie vajny va Ukrainie i niehatyŭnaha staŭleńnia da hramadzian Rasii.
Pa słovach madelaŭ, va ŭmovach sankcyj praca ŭ vebkam-industryi prynosić zarobak vyšejšy za siaredni pa krainie. Ciapier siaredni rasijski zarobak aficyjna składaje 745 jeŭra, tym časam dachod ad eratyčnych tranślacyj, pavodle niekatorych prapanoŭ ad servisaŭ i studyj, składaje minimum 1000—1200 jeŭra za miesiac.
«Novaja vebkam-madel moža zarabić kala 20 jeŭra ŭ pieršy dzień pracy, da 75 jeŭra z bazavym viedańniem anhlijskaj movy, a dla tych, chto vałodaje pryhožaj źniešnaściu i jakasnaj videatechnikaj z seks-cackami, zarobak moža skłaści da 200 jeŭra za dzień», — piša Deutsche Welle sa spasyłkaj na rasijskich vebkam-madelaŭ.
Pry hetym z-za vajny va Ukrainie i masavaj emihracyi rasijan u inšyja krainy, častka ź jakich nie znachodzić tam sabie pracu i ŭ tym liku idzie ŭ vebkam, kankurencyja ŭ industryi značna vyrasła, a vypadki z prajavami nianaviści da rasijskich madelaŭ stali zdaracca čaściej.
Tak, vebkam-madeli Anžalika i Kaciaryna (imiony źmienienyja) raspaviali, što paśla pačatku vajny byli vymušanyja šukać novyja płatformy dla pracy z-za błakiroŭki papularnaha brytanskaha servisu OnlyFans. Taksama madeli sutyknulisia z abrazami pa nacyjanalnaj prykmiecie, a pad ich profilami ładzilisia palityčnyja sprečki, što adpužvała klijentaŭ i źnižała ŭzrovień dachodu.
«Kab paźbiehnuć chejtu, madeli časta śćviardžali, što viaduć tranślacyju ź Biełarusi ci Ukrainy. Pry hetym byli tyja, chto ŭ pieršyja miesiacy vajny naŭmysna vystaŭlaŭ siabie za ŭkrainak, kab atrymać bolš hrošaj na chvali papularnaści i žalu, ale takija akaŭnty servisy potym chutka stali błakavać», — paviedamili rasijskija vebkam-madeli vydańniu Deutsche Welle.
Jašče adna vebkam-madel, rasijanin Aleh (imia taksama źmieniena), adznačyŭ, što ciapier niehatyŭnaha staŭleńnia da hramadzian Rasii ŭ industryi trochi pamienšała, bo ludzi stali razumieć roźnicu pamiž rasijskim kiraŭnictvam i zvyčajnymi ludźmi.
Deutsche Welle sa spasyłkaj na ekśpiertaŭ dadaje, što siońnia industryja eratyčnych tranślacyj u Rasii zakonam nie zabaroniena, ale madelaŭ i arhanizataraŭ servisaŭ i studyj mohuć pieraśledavać za raspaŭsiudžvańnie parnahrafičnych materyjałaŭ abo, kali kantent tyčycca adnapołych adnosin, za prapahandu ŁHBT.
Čytajcie taksama:
Tinder Matchmaker zrobić spatkańni kamandnym vidam sportu
Žonka Kamisaranki: Šmat hadoŭ tamu padzarablała vebkam-madellu, ale daravała sabie hetu pamyłku
Z basiejna — u 200-chvilinny pornafilm. Jak spartsmienki zarablajuć u CHCHCH-industryi