«Muž sam papaŭniaje kalekcyju». Biełaruski raskazali, jak u ich łožku źjavilisia seks-cacki i jakija
«Nijakaha soramu nie adčuvaju, u maim razumieńni dziŭna seksam nie zajmacca i nie chacieć», — kaža adna ź dziaŭčat, jakaja lubić seks-cacki. Biełaruski padzialilisia, jak vyrašyli raznastaić intymnaje žyćcio i čym karystajucca.
Fota: asabisty archiŭ adnoj z hieraiń
«Abmiarkoŭvali heta z partnioram jašče da pačatku adnosin»
Karystacca seks-cackami Volha pačała ŭ 18 hadoŭ paśla pačatku pałavoha žyćcia. Tady jana nabyła sabie viaroŭki dla šybary (japonskaje mastactva eratyčnaha źviazvańnia).
«Mianie heta cikaviła, ale pierad tym, jak heta sprabavać, treba šmat pračytać, jak karystacca takimi viaroŭkami, — tłumačyć dziaŭčyna (ciapier joj 23). — Jość roznaha rodu vibratary, u tym liku dziłda, ale nie bijałahičnaj formy. Adzin z maich lubimych — ź miakkaha silikonu, fłuarescentny, napaŭprazrysty. Kali jaho pakinuć na śviatle, to jon potym u ciemry śviecicca. Lublu šklanyja cacki, tamu što ź imi možna źmianiać tempieraturu. I roznyja formy — heta važna.
Karystajusia analnymi šarykami, vakuumna-chvalevymi vibratarami i tymi cackami, jakimi možna razam z partnioram. Naprykład, vibrakolca. U partniora — masturbatary.
Jość viaroŭki, śpiecyjalny skotč dla BDSM, kremy-stymulatary, blaski dla vusnaŭ, śviečki dla masažu. Heta, musić, asnoŭnaje», — raskazvaje jana.
Volha tłumačyć, što niejkaha styhmatyzavanaha ŭjaŭleńnia pra seks-cacki ŭ jaje nikoli nie było. Jana była vielmi adkrytaj da hetaj temy.
«Asobnaj seks-aśviety ad baćkoŭ u mianie nie było. Prosta šmat čytała navukovaj litaratury ab ciele, seksałohii. U cełym ludzi ŭsprymajuć seks praz styhmatyzacyju z-za patryjarchalnaha hramadstva. I čaściej za ŭsio heta ŭ žančyn, jany bajacca kazać pra seks-cacki, tamu što dumajuć, što pavinny być miłymi, dobrymi, niavinnymi. U patryjarchalnym hramadstvie niavinnaść vielmi šanujecca.
Dla mianie seks u pieršuju čarhu — zadavalnieńnie i naturalny praces, jak kali ty znachodzišsia adzin, tak i z partnioram», — kaža dziaŭčyna.
U Biełarusi (ciapier Volha žyvie ŭ Polščy) dziaŭčyna pracavała ŭ seks-šopie.
«Paśla pracy tam mnie jašče praściej stała razmaŭlać na temu seksu navat ź nieznajomymi ludźmi, — kaža jana. — Niejak pračytała tekst ab tym, jak dziaŭčyna ŭładkavałasia pracavać u seks-šop. Padumała, što kłasny dośvied. Vyrašyła taksama pajści.
Schadziła ŭ seks-šop, u jakim ja raniej pracavała, kupić padarunki siabram. Daviedałasia, što jany šukajuć supracoŭnika. Adhuknułasia, zrabiła testavaje zadańnie — prezientacyju seks-cacki budučyni. I mianie ŭziali.
Maja mama była ŭ šoku, kali daviedałasia, kudy ja pajšła pracavać. Baćka nie viedaŭ i, dumaju, nie daviedajecca».
Volha raskazvaje, što ŭ seks-šop časta prychodzili ludzi, jakija navat bajalisia ŭziać seks-cacki ŭ ruki.
«Ličyła svaju pracu vielmi karysnaj i važnaj, bo treba było schilić ludziej, dać im zrazumieć, što ja chaču dapamahčy», — tłumačyć jana.
Partnior Volhi vykarystańnie seks-cacak u łožku padtrymlivaje. Jany dorać ich adno adnamu na śviaty.
«Naohuł abmiarkoŭvali heta z partnioram jašče da pačatku adnosin. Raspaviadała, jak ja da hetaha staŭlusia i jakoje heta maje dla mianie značeńnie.
Nakolki ja viedaju, časam mužčyny drenna reahujuć na seks-cacki, tamu što im zdajecca, što heta zamianiaje ich u žančyny. Ale heta tak nie pracuje. Partnior — heta čałaviek, da jakoha ty adčuvaješ pačućci. Seks-cacki dapamahajuć vam atrymać arhazm. Treba, musić, prosta pryjści da taho, što vy sa svaim partnioram budziecie razmaŭlać na hetuju temu adkryta», — raić jana.
U seks-šop, pa słovach dziaŭčyny, čaściej prychodziać žančyny, čym mužčyny.
«Z-za styhmatyzacyi jany bajacca kazać partnioru, što nie atrymlivajuć zadavalnieńnia da kanca. Patryjarchalnaje hramadstva prosta naviazvaje, što žančyna nibyta pavinna i moža atrymlivać arhazm tolki ad praniknieńnia. Ale tolki ad hetaha žančynam składana dajści da arhazmu, bolšaści patrebna klitaralnaja stymulacyja. Cacki ŭ hetym pracesie dapamahajuć.
Važna sam-nasam karystacca imi. Asabliva dziaŭčatam, jakija nie mohuć atrymać arhazm z partnioram u pracesie. Kali vy robicie heta sama z saboj, razumiejecie, što vam treba. Kali hetaha razumieńnia niama, to jak inšy čałaviek moža adhadać?» — tłumačyć jana.
Volha prapanoŭvaje spačatku dadać padčas seksu z partnioram, naprykład, paviazki na vočy, jak-niebudź vykarystać lod, miakkija tkaniny, ciopłuju vadu.
«Nie skažu, što seks-cacki — heta panaceja. Treba razumieć, jak imi karystacca, viedać, što vam padabajecca, a što nie. Treba sprabavać. Niejkaja cacka moža nie padyści prosta tamu, što heta nie vaš vid stymulacyi. Naprykład, vam padabajecca nie vibracyja, a pulsacyja.
Mahu paraić žančynam mieć vakuumna-chvalevy vibratar, jon sapraŭdy zmoža dastavić zadavalnieńnie. Rekamienduju jaho kuplać z funkcyjaj vibracyi, šyrokim nosikam», — kaža jana.
Dziaŭčyna adznačaje, što ŭ Polščy vybar seks-cacak bolšy. Tam lepš raźvitaja heta industryja, čym u Biełarusi.
«U kramach kštałtu «Miły» pradajucca vibratary, preziervatyvy, zmazki. Sam vybar našmat bolš raznastajny, — raskazvaje jana. — Nie mahu skazać, što ŭ nas jość niejkaja pieryjadyčnaść, ź jakoj my kuplajem seks-cacki. Možam z partnioram razam schadzić, kupić adrazu niekalki štuk. Ceny na seks-cacki vielmi roznyja. Jość jak darahija, tak i tannyja».
«Nijakaha soramu nie adčuvała»
Dla Vieraniki pieršuju seks-cacku — vibratar — piać hadoŭ tamu nabyŭ muž.
«Ciapier jašče karystajusia vahinalnymi šarykami, fałaimitatarami, roznymi vibratarami. Vyrašyli takim čynam raznastaić naša intymnaje žyćcio. Vyłučyć mahu vibratary i fałaimitatary — heta adny z samych lubimych.
Nijakaha soramu nie adčuvała, u maim razumieńni dziŭna seksam nie zajmacca i nie chacieć. Dla mianie heta, chutčej, adchileńnie, a voś aktyŭnaje seksualnaje žyćcio, asabliva pry najaŭnaści stałaha partniora, — heta norma. Muž na seks-cacki ŭ łožku reahuje vydatna, sam papaŭniaje kalekcyju», — raskazvaje 34-hadovaja žančyna.
Z mužam Vieranika «na adnoj chvali ŭ seksie», tamu pra ŭsio razmaŭlaje ź im adkryta.
«Ale kali b mianie spytali, jak lepš padnieści abo skazać, ja, napeŭna, paraiła b bieź źbiantežanaści havaryć pra svaje žadańni i nie saromiecca, asabliva kali vy daviarajecie svajmu partnioru. Urešcie, heta ž dziela ahulnaha zadavalnieńnia.
U cełym seks-cacki mocna raznastaili adčuvańni padčas seksu, tamu nie varta niedaaceńvać ich ci ŭsprymać jak pryładu vyklučna dla samazadavalnieńnia», — raić Vieranika.
«Kali abirajecie, praviercie jašče ŭ kramie, kab jon pracavaŭ»
Pieršuju seks-cacku 35-hadovaja Kaciaryna paprasiła ŭ muža ŭ jakaści padarunka.
«Heta byŭ fałaimitatar, — raskazvaje jana. — Pradavačka ŭ jaho zapytałasia, u padarunak jamu ci sabie. Jon razhubiŭsia, padumaŭ, što jon taksama budzie ŭdzielničać u hetym pracesie. Skazaŭ, što dla siabie. I jamu pradali cacku dla mužčyny. Heta byŭ mietaličny fałaimitatar, jon byŭ vielmi chałodny, ćviordy. Z hetaha pačałasia ŭsia historyja».
Raniej u Kaciaryny z papiarednim partnioram byli hulni ŭ łožku.
«Naprykład, vykarystoŭvali kajdanki dla anturažu,
— kaža jana. — Kali ja pierajechała va Ukrainu, ja ŭsio pakinuła ŭ Biełarusi. Było trošački sumna z hetaj nahody. Ja tam nabyvała fałaimitatar. Dumała taksama abnavić svaju kalekcyju, ale pačałasia vajna. Pierajechali ŭ Polšču. Pryjšli maje siabry raźbirać našy rečy, nie viedaju, jak jany heta ŭsio składvali. Nie pytałasia.
U Polščy mnie muž padaryŭ fałaimitatar. I pakul heta ŭsio, što jość».
U muža Kaciaryny byli svaje seks-cacki.
«Kali ja čakała dzicia, vielmi pierajmałasia, što dva čałavieki ŭ maim ciele heta zašmat. Tady jon kupiŭ sabie štučnuju pochvu.
Kali ty dla hetaha karystaješsia padručnymi rečami, jakija dla takoha nie praduhledžany, to paśla z seks-cackami lahčej. Ź imi praściej», — kaža jana.
Kaciaryna raić zamović dastaŭku, kali vy saromiejeciesia iści ŭ seks-šop.
«Pry vybary fałaimitatara dla žančyn važna źviartać uvahu nie na daŭžyniu, a na šyryniu. Kali vybirajecie, praviercie jašče ŭ kramie, kab jon pracavaŭ. U mienia była historyja, što nabyła cacku, a jana nie pracuje.
Jašče jość klitaralnaja cacka, jakaja padobnaja da birulki. Kłasnaja pachodnaja reč.
Taksama mnie padabajucca pryłady, jakija stymuluć klitar pavietram. Kali vy lubicie hulacca z dušam, a jon nie pad rukoj, to takaja reč padydzie.
Raju vielmi padumać, kali vy abirajecie klap albo kolca ŭ rot. Kaniečnie, heta vielmi pryhoža ŭ filmach, ale nasamreč paśla padniabieńnie razarvanaje. Padčas hulni heta cikava, ale paśla harbatu papić niemahčyma», — raskazvaje žančyna.
Jašče adzin plus seks-cacak, jaki nazyvaje Kaciaryna, — jany dapamahajuć, kali ŭ vas z partnioram ci partniorkaj roznaja seksualnaja aktyŭnaść.
«Byvaje, što kamuści chočacca časta, a inšamu redka, — kaža jana. — Kali chtości nie moža zadavolić takuju svaju patrebu, to pačynajucca svarki na pustym miescy. Kali ŭ nas hetyja chvali razychodziacca, to kožny sam karystajecca svaimi cackami».
«Naša Niva» — bastyjon biełaruščyny
PADTRYMAĆČytajcie taksama:
U ciažkija časy žančynam padabajucca inšyja mužčyny, a seksualnyja pieravahi mužčyn taksama źmianiajucca
Chočacie palepšyć adnosiny z kachanym? Čaściej zhadvajcie byłoha partniora
Dzicia ŭbačyła seks baćkoŭ: heta narmalna?
-
Valaryna Kustava pra byłoha muža: Kali skłaści aficyjnyja pieraliki ad jaho na dzicia, to atrymajecca kala $1 na dzień
-
Dopis biełaruski-psichołaha pra seks z hruzinam-Apałonam vyklikaŭ mižhiendarnuju svarku
-
«Za adno pryvitańnie mohuć zakinuć 200 dalaraŭ». Biełarus raskazaŭ pra asablivaści pracy na «Onlifans»
U Biełarusi nazirajucca prablemy ź internetam. Voś što pišuć pra heta ludzi3
Kamientary