Павел Латушка — пра ператрусы ў яго і іншых чальцоў НАУ
Сёння з ператрусамі прыйшлі да прадстаўнікоў Народнага антыкрызіснага ўпраўлення і Каардынацыйнай рады. Прыходзілі з вобшукам і да Паўла Латушкі. Палітык пракаментаваў «Нашай Ніве», з чым звязвае гэтыя падзеі.
28.11.2023 / 14:27
Павел Латушка. Фота: «Наша Ніва»
На думку Латушкі, цікавасць да яго асобы і іншых чальцоў НАУ звязаная з іх актыўнай дзейнасцю на міжнароднай арэне.
«Наша дзейнасць накіраваная на тое, каб прыцягнуць рэжым Лукашэнкі і яго прадстаўнікоў да крымінальнай адказнасці, як за злачынствы супраць чалавечнасці супраць беларускага народа, так і ваенныя злачынствы, звязаныя з незаконным вывазам украінскіх дзяцей», — кажа Латушка.
З яго слоў, ён разам з камандай працягвае рыхтаваць адпаведныя матэрыялы, частка з якіх ужо перададзена ў міжнародны крымінальны суд, генеральную пракуратуру Украіны і ў праваахоўныя органы еўрапейскіх краін. Апроч гэтых пытанняў, у НАУ актыўна займаюцца пытаннямі санкцый.
«Я думаю, што гэтыя дзеянні (ператрусы. — НН) накіраваныя на тое, каб дэматываваць нашу дзейнасць. Але гэта не паўплывае на нашу мэтанакіраванасць у барацьбе за дэмакратычную Беларусь і за прыцягненне да адказнасці ўсіх вінаватых у злачынствах», — падкрэслівае Павел Латушка.
Палітык згадаў, што раней на адной з прэс-канферэнцый Лукашэнка прапанаваў абмяняць яго і чальцоў каманды НАУ на палітзняволенага журналіста, прадстаўніка польскай меншасці Анджэя Пачобута.
Тады Павел Латушка выступіў з сустрэчнай прапановай.
«Ад свайго імя і ад імя мужчынскай часткі каманды НАУ: мы згодныя на абмен.
Але ў нас свая прапанова: мы гатовы правесці абмен Паўла Латушкі і мужчынскай часткі каманды НАУ на ўсіх палітзняволеных Беларусі», — адказаў тады палітык на прапанову ад Лукашэнкі.
Чытайце таксама:
Прыйшлі да Латушкі, Чалага. Масавыя ператрусы ў людзей, звязаных з Каардынацыйнай радай апазіцыі
Латушка заявіў пра гатоўнасць на прапанаваны Лукашэнкам абмен. Але з трохі змененымі ўмовамі
НАУ перадало ў Міжнародны крымінальны суд дадатковыя дакументы, датычныя вывазу ў Беларусь украінскіх дзяцей