«Avatary, jakija dychajuć ahniom». Hałahramnaja technałohija ABBA padoryć nieŭmiručaść hurtu Kiss
U hetyja vychadnyja lehiendarny rok-hurt Kiss syhraŭ svoj raźvitalny kancert u Medysan-Skvier-Harden u Ńju-Jorku, ale dziakujučy novym technałohijam ich raźvitańnie sa scenaj nie kančatkovaje.
05.12.2023 / 11:44
Vystup Kiss u Medysan-Skvier-Harden u Ńju-Jorku. Photo by Kevin Mazur / Getty Images for Live Nation
Jak tolki muzyki pajšli za kulisy, na scenie źjavilisia ich hałahramy, jakija vykanali adzin z chitoŭ hurta — God Gave Rock 'n' Roll to You, piša Bi-bi-si.
Hetaja technałohija była pieršapačatkova raspracavana dla ABBA Voyage, suśvietnaha turne šviedskaj hrupy ABBA. Z dapamohaj hałahram udzielniki hurta byli adnoŭleny na scenie takimi, jakimi jany byli ŭ pačatku karjery ŭ 1970-ch.
Džyn Simans, adzin z zasnavalnikaŭ Kiss, skazaŭ, što dziakujučy najnoŭšym technałohijam jaho hurt taksama budzie «viečna maładym i nazaŭždy kultavym».
«Toje, čaho my dasiahnuli, — cudoŭna, ale hetaha niedastatkova. Hrupa zasłuhoŭvaje taho, kab žyć dalej, bo jana bolš, čym my», — skazaŭ inšy vykanaŭca Kiss Poł Stenli.
Ličbavaja nieŭmiručaść — vielmi važnaja staronka ŭ žyćci i historyi hurta, kažuć muzyki.
U čym sutnaść hałahramnaj nieŭmiručaści
Hałahramy dla Kiss byli raspracavany kampanijaj pa stvareńni śpiecefiektaŭ Industrial Light & Magic (ILM). Prajekt prafinansavany šviedskim kanhłamieratam Pophouse Entertainment, saŭładalnikam jakoha źjaŭlajecca Bjorn Ulvieus z ABBA.
Hetyja ž kampanii pracavali nad šou ABBA Voyage, u jakim adnoŭleny kancert šviedskaj čaćviorki 1970-ch hadoŭ.
Na padrychtoŭku prahramy syšło šeść hadoŭ — z 2016 hoda da premjery ŭ Łondanie ŭ mai 2022-ha, jakuju ŭdzielniki ABBA hladzieli, siedziačy ŭ łožy.
Pry pracy nad šou muzykanty na praciahu niekalkich tydniaŭ u kaściumach adpracoŭvali ruchi, jakija skanavali 160 kamier, uklučajučy nie tolki pazicyju cieła, ale i vyraz tvaraŭ.
Na druhim etapie animatary i mastaki pa vizualnych efiektach pa danych z kamier stvaryli avatary muzykaŭ u rańni pieryjad ich karjery, jakija źjaŭlajucca na vielizarnym ekranie z 65 miljonami piksielaŭ, z padśvietkaj i inšymi efiektami, ścirajuć miežy pamiž ličbavymi elemientami i realnaściu na scenie.
Dvuchmietrovyja vohniennyja avatary
Avatary muzykaŭ Kiss nie takija realistyčnyja. Tyja, što lotali pa scenie i nad publikaj paśla raźvitalnaha kancerta, byli vyšynioj u dva z pałovaj mietry, dychali ahniom i stralali elektryčnaściu z palcaŭ.
Jany byli zrobleny na asnovie danych, zapisanych na śpiecyjalnyja kamiery padčas vystupu hurta ŭ pačatku hetaha hoda.
Heta značyć, u adroźnieńnie ad ABBA, udzielniki Kiss, miarkujučy pa ŭsim, atrymajuć ličbavuju nieŭmiručaść takimi, jakimi stali da kanca karjery.
Hrupa pakul nie raskryvaje svaje płany adnosna ličbavych šou.
«Mahčyma, heta budzie kancert Kiss u budučyni. Mahčyma, rok-opiera abo miuzikł. A moža, historyja, pryhoda? — skazaŭ vykanaŭčy dyrektar Pophouse Entertainment Pier Sundzin.
Kancerty rok-hurta Kiss ź ich nievierahodnymi kaściumami, makijažam i niečuvanymi vychadkami stali adnymi z samych zapaminalnych kancertaŭ 1970-80-ch.
Siarod samych mocnych chitoŭ Kiss možna adznačyć Rock And Roll All Nite, Black Diamond, I Was Made For Lovin' You i Crazy Crazy Nights.
Ale rana ci pozna nadychodzić čas sychodzić, i ŭ 2001 hodzie jany zładzili svajo pieršaje raźvitalnaje turne. Kab potym jašče šmat razoŭ davać hastroli, u jakich brali ŭdzieł dvoje baćkoŭ-zasnavalnikaŭ Stenli i Simans, a taksama hitaryst Tomi Tejer i bubnač Eryk Sinhier.
Pry hetym pa ahulnym mierkavańni, byłyja ŭdzielniki hrupy nakštałt Pitera Krysa i Ejsa Frejli naŭrad ci ŭdastojacca ułasnych avataraŭ u novym šou.
Jašče minułym letam Simans (jakomu ŭžo 74) skazaŭ, što Kiss, mahčyma, praciahnie svajo isnavańnie i paśla finalnaha kancerta ŭ takim vyhladzie, što navat jon sam nie moh hetaha ŭjavić.
Tady ž prahučała prapanova nabrać zusim novy skład, jaki b vyhladaŭ jak aryhinalnaja hrupa i hraŭ by jaje najlepšyja chity.
«U mianie niama nijakich prablem z tym, kab čaćviorka hodnych 20-hadovych chłopcaŭ schavała svaje tvary pad makijažam, kab nichto ich nie paznavaŭ», — zajaviŭ Simans.
Čytajcie taksama:
Tejłar Śvift stała miljarderkaj
Ed Šyran niečakana pryjšoŭ na viasielle nieznajomcaŭ i zaśpiavaŭ novuju pieśniu «Magical»
Źnikłuju bas-hitaru Poła Mak-Kartni buduć šukać pa ŭsim śviecie. Jana źnikła ŭ 1969 hodzie