Źnikłuju bas-hitaru Poła Mak-Kartni buduć šukać pa ŭsim śviecie. Jana źnikła ŭ 1969 hodzie
Vyšuk viadziecca ŭ ramkach prajekta Lost Bass («Zhubleny bas»), jaki źbiraje infarmacyju ab patencyjnym miescaznachodžańni instrumienta. Jaho nazvali «samym važnym basam u historyi».
Pačaŭsia suśvietny pošuk adnaho z samych viadomych muzyčnych instrumientaŭ — bas-hitary Poła Mak-Kartni firmy Karl Höfner, piša Bi-bi-si.
Vyšuk viadziecca ŭ ramkach prajekta Lost Bass («Zhubleny bas»), jaki źbiraje infarmacyju ab patencyjnym miescaznachodžańni instrumienta. Jaho nazvali «samym važnym basam u historyi».
Mak-Kartni kupiŭ hitaru ŭ 1961 hodzie ŭ Hamburhu za 38 dalaraŭ ZŠA (bolš za 1000 dalaraŭ u sučasnym ekvivalencie), ale praz vosiem hadoŭ jana tajamniča źnikła.
Palavańnie na źnikłuju hitaru pačałosia paśla taho, jak Mak-Kartni paprasiŭ firmu Karl Höfner adšukać jaho lubimy instrumient, i kampanija arhanizavała pošuk. Apošni raz hitaru bačyli pierad raspadam «Bitłz» 50 hadoŭ tamu.
«Ja kupiŭ hetuju bas-hitaru Chiofniera prykładna za 30 funtaŭ, —skazaŭ 81-hadovy Mak-Kartni. — I dla mianie, tak jak ja laŭšun, jana była bolš zručnaj, bo była simietryčnaj. Ja palubiŭ jaje adrazu ž paśla kupli».
Źnikły instrumient možna pačuć u pieršych zapisach takich chitoŭ, jak Love Me Do, She Loves You i Twist and Shout.
«Choć nichto nasamreč nie viedaje, što zdaryłasia z basam, chutčej za ŭsio, hitaru skrali. Pa siońnia heta zastajecca zahadkaj, — kaža Nik Vas, jaki 12 hadoŭ prapracavaŭ mieniedžaram pa markietynhu i raspracoŭščykam elektrahitar u firmie Karl Höfner. — Ale chtości dzieści napeŭna viedaje, što ź joj zdaryłasia i dzie jana ciapier znachodzicca. I hetaja infarmacyja moža stać dastupnaj, kali joju zachoča padzialicca daśviedčany čałaviek».
U dapamohu «palaŭničym» firma apublikavała fatahrafii bas-hitary, a taksama infarmacyju pra toje, dzie i kali znachodziŭsia hety instrumient z dnia kupli da dnia źniknieńnia, a taksama instrukcyi, jak raspaznać padrobku.
«Ja viedaju, jak ja havaryŭ ź im pra heta, što Poł byŭ by vielmi ščaślivy, kali b hety bas viarnuŭsia da jaho», — skazaŭ Vas, jaki viadzie pošuki. Jon aktyŭna supracoŭničaŭ z Mak-Kartni i navat napisaŭ knihu pra źnikłuju bas-hitaru. Jon kaža, što «mienavita hety bas stvaryŭ «Bitłz».
U pošukach Vasu dapamahajuć muž i žonka Skot i Naomi Džons.
Los hitary zacikaviŭ Skota ŭ 2022 hodzie, kali jon ubačyŭ vystup Mak-Kartni na Hłastanbieryjskim fiestyvali.
«Poł skazaŭ pradstaŭnikam firmy, što kali chtości i zmoža znajści hetuju hitaru, to heta vy», — raspavioŭ Skot.
«Ciapier my pracujem nad hetym razam. U Nika bolš techničnych viedaŭ ab hetaj hitary, čym u kaho-niebudź na płaniecie, a ja i Naomi vykarystoŭvajem niekatoryja daśledčyckija navyki», — rastłumačyŭ jon.
Kali hetaja hitara budzie znojdzienaja i jaje zachočuć potym pradać na aŭkcyjonie, to ciažka navat vykazać zdahadku, za jakuju canu jana moža pajści, choć niekatoryja precedenty jość.
Skradzienaja hitara Džona Lenana była pradadzienaja za 2,4 miljona dalaraŭ, kali jana znoŭ źjaviłasia na śviet praz paŭstahodździa paśla źniknieńnia, a akustyčnaja hitara Kurta Kabiejna, na jakoj jon hraŭ padčas kultavaha vystupu MTV Unplugged, była pradadzienaja za 6 miljonaŭ dalaraŭ.
Bas Mak-Kartni, jaki možna ličyć simvałam pačatku novaj muzyčnaj epochi, vierahodna, akazaŭsia b jašče daražejšy, ale kamanda «zhublenaha basa» kaža, što ŭ hetaha prajekta niama nijakaj kamiercyjnaj matyvacyi.
Pakul što Skot Džons ličyć, što toj, u kaho jość važnaja infarmacyja, mahčyma, navat nie padazraje, jakim skarbam jon vałodaje.
«Było b vydatna, kali b adnojčy hitaru možna było vystavić na ŭsieahulny ahlad, ale kali toj, chto viedaje pra jaje miescaznachodžańnie, hatovy padzialicca infarmacyjaj tolki dziela taho, kab zarabić trochi hrošaj, to chaj tak i budzie, bo ŭ lubym vypadku jana budzie znojdzienaja», — skazaŭ jon.
Ale hałoŭnaja meta pošukaŭ — viarnuć Mak-Kartni jaho hitaru, jakuju jon daŭno chacieŭ znajści.
Infarmacyja ab prajekcie źjaviłasia ŭsiaho dva dni tamu, ale kamanda ŭžo atrymała «cikavyja źviestki», jakija ciapier vyvučaje.
Jak raspaznać bas-hitaru Mak-Kartni?
Jość niekalki charakternych prykmiet, pra jakija pavinien viedać luby amatar, sprabujučy adroźnić padrobku ad aryhinała.
Jarkaja charakternaja prykmieta — łahatyp firmy Höfner, raźmieščany na hryfie viertykalna. U paźniejšych madelach, na jakich hraŭ i Mak-Kartni, jon byŭ haryzantalnym.
Źnikły bas taksama vyhladaŭ zusim inakš, čym na pieršych fotazdymkach, bo jaho pryjšłosia ramantavać paśla praciahłych hastrolaŭ.
Akramia taho, jon pafarbavany ŭ bolš ciomny koler, nakładka žamčužnaha koleru była vydalenaja, a dva hukazdymalniki byli ŭstalavanyja ŭ adnym kavałku čornaha dreva.
Što za studentka Uljana, ź jakoj na bali valsiravaŭ Łukašenka?9
Kamientary