Суд адхіліў скаргу Вольгі Карач — яна павінна пакінуць Літву
У сераду Галоўны адміністрацыйны суд Літвы прыняў рашэнне пакінуць у сіле рашэнне аб адмове ў прадастаўленні прытулку беларускай актывістцы і кіраўніку арганізацыі «Наш дом» Вользе Карач, піша LRT.
10.01.2024 / 15:19
Калегія ў складзе трох суддзяў разгледзела апеляцыю Карач на рашэнне суда аб адмове Дэпартамента міграцыі ў прадастаўленні ёй прытулку ў Літве.
Рашэнне Галоўнага адміністрацыйнага суда Літвы з'яўляецца канчатковым і абскарджанню не падлягае. Прадстаўнік суда не стала каментаваць рашэнне, спаслаўшыся на тое, што справы аб прадастаўленні прытулку не разглядаюцца публічна.
У жніўні мінулага года Дэпартамент міграцыі прыняў рашэнне не даваць Карач прытулак, паколькі, на думку Дэпартамента дзяржаўнай бяспекі, яе пражыванне ў Літве ўяўляе пагрозу нацыянальнай бяспецы з-за яе сувязяў з расійскай разведкай.
Карач атрымлівала від на жыхарства ў Літве з 2014 года, а ў мінулым годзе падала прашэнне аб прадастаўленні прытулку.
У 2022 годзе Мінск прызнаў арганізацыю «Наш дом» экстрэмісцкай, а ў 2021 годзе беларускі КДБ унёс яе ў спіс тэрарыстаў.