У Самалі захапілі верталёт ААН з экіпажам і пасажырамі
Захоп вертолета правялі ўдзельнікі ўзброенай ісламісцкай арганізацыі «Аш-Шабаб», якая вядзе баявыя дзеянні з урадавымі сіламі, паведаміла Reuters.
10.01.2024 / 23:27
Фота ілюстрацыйнае
Верталёт ААН вылецеў з горада Беледуэйне ў цэнтральнай частцы Самалі і накіроўваўся ў горад Вісіў, размешчаны недалёка ад лініі баявога судакранання ўрадавых сіл і атрадаў «Аш-Шабаб». Неўзабаве пасля ўзлёту ён зрабіў вымушаную пасадку з-за тэхнічнай няспраўнасці ў раёне, які кантралюе ўзброеная групоўка.
Верталёт перавозіў медыкаменты і павінен быў забраць параненых салдат. На яго борце знаходзіліся двое самалійцаў і некалькі іншаземцаў, гаворыцца ў публікацыі Reuters.
Крыніца агенцтва Reuters у ААН паведаміла, што верталёт належаў місіі арганізацыі па садзейнічанні Самалі, членамі яго экіпажа былі пяць іншаземцаў. Яшчэ дзве крыніцы Reuters у ААН заявілі, што ўсяго на борце знаходзіліся дзевяць пасажыраў.
BBC News піша, што ў верталёце было восем чалавек: чальцы экіпажа і пасажыры. Іх лёс невядомы.
Чытайце таксама:
Асноўныя пагрозы, якія чакаюць свет у 2024-м
У Эквадоры злачынныя групоўкі захапілі вядоўцаў тэленавін у жывым эфіры