U minskim krutym hateli ŭžo bolš za try hady žyvie italjaniec. I źjazdžać nie źbirajecca
Italjanski biznesmien Žan-Pol pryjechaŭ u Biełaruś čatyry hady tamu, u razhar kavidnaj pandemii. Voś užo try hady jon zdymaje numary ŭ minskim čatyrochzorkavym hateli «Viktoryja Spa». Vypadak, kali ŭ hateli hość bieśpierapynku žyvie na praciahu troch hadoŭ, nazyvajuć unikalnym dla Biełarusi, piša Tochka.by.
26.01.2024 / 22:47
Fota: Tochka.by
Ad apartamientaŭ da bolš ścipłaha numara
Za čas žyćcia ŭ hateli Žan-Pol źmianiŭ niekalki numaroŭ. Pačynaŭ z arendy najlepšaha — apartamientaŭ. Paśla pierajšoŭ na «Luks», a ciapier kala hoda žyvie ŭ bolš prostym dvuchmiesnym numary.
Paličyć, kolki italjaniec vydatkavaŭ na pražyvańnie ŭ hateli, dosyć ciažka: za try hady taryfy na numary ŭ hateli nie raz mianialisia. Choć, biezumoŭna, suma «nabiehła» prystojnaja.
Tak, pasutačna arenda troch typaŭ numaroŭ u «Viktoryi Spa» pry peŭnych umovach dasiahaje 260 dalaraŭ (816 rubloŭ), 160 dalaraŭ (502 rubloŭ) i 120 dalaraŭ (377 rubloŭ) adpaviedna.
Fota: Tochka.by
Niahledziačy na heta, prablem z apłataj u italjanskaha hościa nie ŭźnikaje, śćviardžajuć u «Viktoryi Spa». Zasialiŭsia Žan-Pol padčas pandemii, kali spravy ŭ biełaruskich hatelaŭ išli, miakka kažučy, nie vielmi. Tamu italjaniec arandavaŭ numar pa vielmi vyhadnych cenach. U toj čas źnižki na doŭhaje pražyvańnie ŭ niekatorych numarach hatela dachodzili da 70%.
Spadabalisia raźmiaščeńnie i servis
U Biełarusi Žan-Pol raźvivaje ŭłasny biźnies, źviazany ź miedycynaj. Svojeasablivym stymułam pryjechać siudy stała pandemija, kali mnohija punkty na karcie śvietu byli ŭ stanie poŭnaha łakdaŭnu, a ŭ Biełarusi žyćcio było adnosna aktyŭnym.
Fota: Tochka.by
Kali prykinuć, kolki Žan-Pol vydatkavaŭ na arendu numara ŭ minskim hateli, uźnikaje pytańnie: ci nie bolš vyhadna było b kupić (nu ci arandavać) kvateru ŭ hetym samym rajonie. Italjaniec na heta adkazvaje niezvyčajna:
«Ja caniu svoj čas i kožny momant žyćcia. A tut mnie kamfortna: dobry servis, vietlivyja mieniedžary. Viedajecie, heta ciažka — źjechać adsiul ciapier».
Tamu źjazdžać Žan-Pol pakul nie źbirajecca. Jon płanuje raźvivać spravy, źviazanyja z traktarnaj technikaj, pramysłovym abstalavańniem, miedycynaj i handlem zołatam. Napramki dla prasoŭvańnia kłasičnyja dla Biełarusi — Kitaj i AAE.
Čytajcie taksama:
Pažyć karalami. Kolki kaštujuć luksy ŭ krutych biełaruskich hatelach?
U Biełarusi zapracavaŭ novy servis anłajn-braniravańnia hatelaŭ
Turystaŭ u Biełarusi mienšaje, navat rasijanie znachodziać novyja kirunki