Pamiatajecie aktyvistaŭ BRSM, jakija nakinulisia na Ordu padčas pikieta za Łukašenku ŭ 2020-m? Voś dzie jany ciapier
Mnohija pajšli na pavyšeńnie, adna stała namieśnicaj Volhi Čamadanavaj. A inšaja dziaŭčyna pracavała ŭ pradziusarskaj kamandzie Ułada Bumahi.
24.02.2024 / 13:17
Adnoj z samych kamičnych pieradvybarčych historyj — 2020 byŭ pikiet u padtrymku Alaksandra Łukašenki kala HC «Dana Moł». Deputat-kamunist Siarhiej Kliševič pryciahnuŭ tudy aktyvistaŭ BRSM, kab atakavać karespandenta «Radyjo Svaboda», jaki vioŭ strym ź mierapryjemstva. Ale jany pamyłkova nakinulisia na kiraŭnika Fiederacyi prafsajuzaŭ Michaiła Ordu, jaki ŭznačalvaje inicyjatyŭnuju hrupu Alaksandra Łukašenki
Telehram-kanał Niechta tady identyfikavaŭ usiu hrupu aktyvistaŭ, jakuju pryciahnuŭ Kliševič. Ludzi stali pisać słovy abureńnia hetym chłopcam i dziaŭčatam. Hałoŭnaja aktyvistka, Iłona Iłaryjonava, tady pastaviła spravu na patok — patrabavała ad ludziej hrošy ŭ jakaści «kampiensacyi», inačaj išła ŭ sud.
Jak skłalisia losy maładzionaŭ paśla pikieta? Spojler: bolšaści ź ich udałosia ŭskočyć u sacyjalnyja lifty i zrabić karjeru ŭ kalaŭładnych strukturach.
Iłona Iłaryjonava
Joj 25 hadoŭ i jana ź Minska. Raniej była «moładzievym pasłom metaŭ ustojlivaha raźvićcia» i aktyvistkaj BRSM u Biełaruskim dziaržaŭnym univiersitecie kultury i mastactvaŭ.
Iłona Iłaryjonava ŭ pieršym šerahu ŭ mascy. Skrynšot sa stryma Radyjo Svaboda
Hetaja dziaŭčyna była ŭ «avanhardzie» hrupy i pieršaj zadavała pytańni. Praŭładnym miedyja jana skardziłasia na ckavańnie ŭ internecie, ale pracavać zastałasia.
Paśla ŭdziełu ŭ prapahandysckich mierapryjemstvach jaje karjera pajšła ŭharu — Iłonu navat zaprasili na «Respublikanski bał vypusknikoŭ» u 2020-m, dzie byŭ i Łukašenka. I pavysili da hałoŭnaha śpiecyjalista departamienta infarmacyjna-ideałahičnaj i arhanizacyjna-kadravaj raboty ŭ minskim BRSM.
Iłona Iłaryjonava i Natalla Ejsmant. Fota sa staronki Iłony Ukantakcie
Taksama jana była ŭ tak zvanym moładzievym parłamiencie dy moładzievaj pałacie pry parłamienckim schodzie Biełarusi i Rasii. I rehularna jeździła ŭ Rasiju na roznyja schody — naprykład, u honar «dnia adzinstva narodaŭ Biełarusi i Rasii». Pryznačyli jaje i ŭ stvorany Łukašenkam Usiebiełaruski narodny schod.
Iłona Iłaryjonava ŭ Rasii. Fota ź jaje staronki Ukantakcie
Ale niadaŭna Iłaryjonava atrymała čarhovaje pavyšeńnie. Ciapier jana namieśnica načalnicy hałoŭnaha ŭpraŭleńnia pa ideałahičnaj pracy i spravach moładzi Minharvykankama. Jaje pramaja kiraŭnica — byłaja pres-sakratarka MUS Volha Čamadanava.
Iłona Iłaryjonava na STV
Viktoryja Lubamirava
Viktoryi 25 hadoŭ. Jana taksama minčanka i daŭniaja aktyvistka BRSM.
Viktoryja Lubamirava
U 2019-m jana atrymała premiju «Za spravu», jakuju vydajuć udarnikam ź liku siabroŭ arhanizacyi.
U 2020-m dziaŭčyna dvojčy raskazała dziaržSMI adno i toje ž — što jaje kałaciła praz toje, što joj vielmi šmat pisali paśla ŭdziełu ŭ pikiecie. A na STB jašče zajaviła, što aktyvisty BRSM stajali ŭ łahiery vałancioraŭ pad Akreścina ŭ žniŭni 2020-ha.
Viktoryja Lubamirava na STV
Paśla zakančeńnia ŭniviersiteta jana pajšła pa «partyjnaj» linii i stała hałoŭnaj śpiecyjalistkaj Centra infarmacyjnych i sacyjalnych technałohijaŭ CK BRSM. Ale niadaŭna pierajšła na inšuju pracu — ciapier jana ivent-mieniedžar chakiejnaha kłuba «Dynama Minsk».
Viktoryja Lubamirava ŭ efiry «Biełaruś-1»
Varvara Ihnatovič
Varvary Ihnatovič taksama 25. Dziaŭčyna rodam sa Słucka, vučyłasia ŭ BDUKM na śpiecyjalnaści «Kulturałohija».
Varvara Ihnatovič. Fota ź jaje instahrama
U adroźnieńnie ad inšych, jana nie zaŭvažanaja ŭ praŭładnych mierapryjemstvach. My nie adšukali ŭzhadak pra jaje aktyŭnaść i na sajcie BRSM.
Dziaŭčyna pracavała ivent-mieniedžaram i pradziusaram. Naprykład, u 2018 i 2019 hadach jana pracavała nad fiestyvalem «Pasternak», jaki prachodziŭ u Minsku, a ź vieraśnia 2020 pa žnivień 2022-ha była pradziusaram u kamandzie Ułada Bumahi.
Varvara Ihnatovič i Uład Bumaha. Fota ź instahrama dziaŭčyny
Miarkujučy pa instahramie, jana šmat padarožničaje pa śviecie. Śfieraj pracy Varvary ŭ Linkedin paznačany «pradziusar YouTube».
Uładzisłaŭ Dubicki
Uładzisłavu Dubickamu 25 hadoŭ. Jon vučyŭsia ŭ BDUKM i byŭ tam u aktyvie BRSM.
Paśla taho, jak zaśviaciŭsia na akcyi, Uładzisłaŭ pajšoŭ na pavyšeńnie. Ciapier jon zahadčyk adździeła prajektnaj dziejnaści CK BRSM.
Raman Bandaruk
Chłopcu 28 hadoŭ. Rodam jon z Bresta. Nieviadoma, dzie jon vučyŭsia, ale adrazu pačaŭ budavać karjeru ŭ BRSM.
Raman Bandaruk. Fota ź jahonaj staronki Ukantakcie
Na momant skandalnaha pikieta Raman byŭ druhim sakratarom Minskaha haradskoha kamiteta BRSM. U 2021-m jaho pavysili da pieršaha sakratara.
Siarhiej Šyrko
Siarhieju Šyrko 23 hady, jon naradziŭsia ŭ Miadzielskim rajonie. Uznačalvaŭ BRSM u Biełaruskim dziaržaŭnym technałahičnym univiersitecie, jaki skončyŭ u 2021-m hodzie.
Siarhiej Šyrko. Fota: STV
Jaho taksama pavysili — da pieršaha sakratara jačejki BRSM Zavodskaha rajona Minska. Šyrko — kamunist. Jon namieśnik kiraŭnika «Lihi kamunistyčnaj moładzi», jakoj kiruje Siarhiej Kliševič.
Čytajcie taksama:
«Pa sutnaści, prosta tak addała hrošy». Školniki raskazali, čamu jany (nie) chočuć ustupać u BRSM