Pravasłaŭny kamunist i vatnik z Rasii. Što viadoma pra dvuch samych maładych kandydataŭ u Minharsaviet
«Naša Niva» źviarnuła ŭvahu na samych maładych staličnych kandydataŭ. Hetyja chłopcy nie majuć šancaŭ na pieramohu, ale dobra ilustrujuć, jakija ludzi vyłučajucca ad kišennych partyj, kali ŭ dziaržavie nie zastałosia nijakaj kankurentnaj palityki.
Rasijanin z partyi Hajdukieviča
Kiryłu Harškovu 18 hadoŭ. Naradziŭsia jon u rasijskim Vałhahradzie, ale dziacinstva pravioŭ u Babrujsku. Tam byŭ aktyvistam BRSM i siabram moładzievaha parłamienta.
Ciapier chłopiec, miarkujučy pa śpisach abituryjentaŭ, vučycca na płatnym adździaleńni ŭ Mižnarodnym instytucie «MITSO» pa śpiecyjalnaści «Ekanamičnaje prava» (praŭda, u śpisach kandydataŭ jon paznačany jak biespracoŭny, tamu moh užo i adličycca). Ale i praŭładnyja aktyŭnaści nie zakinuŭ — na staronkach u sacsietkach publikuje «patryjatyčnyja» fota z čyrvona-zialonym ściaham.
Miarkujučy pa padpiskach chłopca ŭ sacyjalnaj sietcy «Ukantakcie», jon zajmaje prarasijskuju pazicyju. Siarod jahonych padpisak — «Ja žyvu ŭ Rasii i mnie nie soramna», «Infarmacyjnaja padtrymka Pucina», «Armija Z» dy jašče dziasiatki pablikaŭ takoha kštałtu.
Praŭda, i adpačynak u Jeŭropie chłopcu padabajecca. Na jahonaj staroncy «Ukantacie» jość fota z šerahu krain Jeŭrasajuza, siarod jakich Italija i Hiermanija.
Chłopiec bałatujecca ad partyi ŁDPB, jakuju ŭznačalvaje Aleh Hajdukievič, pa Karžanieŭskaj akruzie ŭ Kurasoŭščynie.
Pravasłaŭny kamunist Dźmitryj Šamonin
Dźmitryj Šamonin — druhi pa ŭzroście siarod kandydataŭ u miascovyja deputaty. Chłopcu 20 hadoŭ.
Jon minčuk i vypusknik liceja №1 Minska, jaki zakryli z padačy byłoha ministra adukacyi Ihara Karpienki ŭ śniežni 2021-ha. Apošni vypusk ź liceja adbyŭsia ŭ mai 2023-ha.
Ciapier Dźmitryj vučycca na trecim kursie miechanika-matematyčnaha fakulteta BDU.
Šamonin — uzorny małady jabaćka. Jon vinšuje padpisantaŭ svaich staronak z rasijskimi i kamunistyčnymi śviatami dy ŭdzielničaje va ŭsich mahčymych akcyjach prarasijskich siłaŭ. Naprykład, asabliva adznačaje Dzień adzinstva narodaŭ Rasii i Biełarusi, a taksama anałahičnyja daty.
Ale pohlady Dźmitryja vielmi supiarečlivyja, razabracca ŭ ich niaprosta. Jon zajmaje adkryta prarasijskuju pazicyju. Ź inšaha boku, pazicyjanuje siabie jak antyfašyst i prychilnik kamunistyčnych pohladaŭ.
Jość u jaho ŭ sacsietkach i antyŭkrainskija pasažy.
A taksama sardečnaje vinšavańnie Stalinu z dniom narodzinaŭ.
Pry hetym chłopiec nie zabyvaje vinšavać padpisantaŭ z pravasłaŭnymi śviatami.
Siarod dopisaŭ na staronkach Dźmitryja, naprykład, jość adnačasova zakliki zmahacca ź biełaruskaj movaj (i asabliva z łacinkaj) i vinšavańni z Dniom rodnaj movy.
I mudrahielistyja cytaty ŭłasnaha vyrabu.
A taksama cytata Łukašenki, jakuju niepadrychtavany čytač moža ŭspryniać jak kramolnuju.
Dźmitryj Šamonin bałatujecca ŭ miascovyja deputaty ad Kamunistyčnaj partyi pa minskaj Viaśnianskaj vybarčaj akruzie. Heta mikrarajony Viaśnianka i Ržaviec, žyllo top-čynoŭnikaŭ.
«Naša Niva» — bastyjon biełaruščyny
PADTRYMAĆAleksijevič narešcie vykazałasia pra Izrail i Paleścinu5
Kamientary