Va Ukrainie ŭšanoŭvajuć hierojaŭ Niabiesnaj sotni, jakija zahinuli 10 hadoŭ tamu. Siarod ich dva biełarusy
Druhi hod zapar ušanavańnie pamiaci hierojaŭ Niabiesnaj sotni adbyvajecca va ŭmovach poŭnamaštabnaj vajny Rasii suprać Ukrainy.
20.02.2024 / 13:22
Alena i Uładzimir Zialenskija. Fota: president.gov.ua
Va Ukrainie 20 lutaha — dzień pamiaci hierojaŭ, jakija zahinuli dziesiać hadoŭ tamu ŭ časie masavych akcyj pratestu suprać admovy ŭładaŭ ad jeŭrapiejskaj intehracyi, piša Radyjo Svaboda.
U hety dzień dziesiać hadoŭ tamu ŭ vyniku šturmu siłaviki rasstralali 47 hramadzian. Usiaho achviarami stali 88 pratestoŭcaŭ, u tym liku dva biełarusy — hramadzianin Biełarusi Michaś Žyźnieŭski (zahinuŭ 22 studzienia 2014 hodu) i hramadzianin Ukrainy, etničny biełarus, kolišni deputat parłamienta Jakaŭ Zajko (pamior 18 lutaha 2014 hoda ad infarktu, kali ŭciakaŭ ad bierkutaŭcaŭ na vulicy Instytuckaj u Kijevie).
Ranicaj 20 lutaha prezident Ukrainy Uładzimir Zialenski razam sa svajoj žonkaj Alenaj pryjšli da Kryža na alei Hierojaŭ Niabiesnaj sotni ŭ Kijevie i pastavili svaje źničy ŭ pamiać zahinułych. U cyrymonii ŭziali ŭdzieł akredytavanyja va Ukrainie zamiežnyja dypłamaty.
Kryž na miescy hibieli pratestoŭcaŭ na vulicy Instytuckaj (ciapier aleja Hierojaŭ Niabiesnaj sotni) pastavili pa inicyjatyvie hramadskaści. U budučyni jon stanie častkaj Nacyjanalnaha miemaryjalnaha kompleksu hierojaŭ Niabiesnaj sotni — Muzieja Revalucyi Hodnaści.
Kožny hod na miesca hibieli aktyvistaŭ u 2013—2014 hadach zvyčajnyja hramadzianie niasuć svaje kvietki i staviać źnički. Anałahičnyja mierapryjemstvy 20 lutaha adbyvajucca va ŭsich rehijonach Ukrainy.
Čytajcie taksama:
10 hadoŭ tamu na Majdanie ŭ Kijevie zahinuŭ Michaił Žyźnieŭski
Ułady Kijeva paćvierdzili, što pomnik Žyźnieŭskamu źnieśli pavodle ichniaha rasparadžeńnia
Sprava ab zabojstvie Michaiła Žyźnieŭskaha: śledčyja vyznačyli mierkavanaje koła datyčnych asobaŭ