Sprava ab zabojstvie Michaiła Žyźnieŭskaha: śledčyja vyznačyli mierkavanaje koła datyčnych asobaŭ
U Michaiła Žyźnieŭskaha, Siarhieja Nihajana (abodva zahinuli 22 studzienia 2014 hoda) i Ramana Sienika (zahinuŭ 25 studzienia 2014 hoda) na Majdanie ŭ Kijevie stralali kulami dla prymusovaha spynieńnia transpartu, jakija vykarystoŭvali tolki padraździeły Ministerstva ŭnutranych spraŭ Ukrainy.
U Ofisie hienieralnaha prakurora Ukrainy zajavili, što śledčyja, jakija rasśledujuć złačynstvy ŭ časie masavych akcyj pratestu ŭ Kijevie ŭ 2013-2014 hadach, vyznačyli koła asobaŭ, datyčnych da zabojstva biełarusa Michaiła Žyźnieŭskaha, piša Radyjo Svaboda.
«Datyčna [Ramana] Sienika i [Michaiła] Žyźnieŭskaha jość kancavyja vyniki ekśpiertyz, adnak jašče praciahvajecca kompleksnaja ekśpiertyza, pryznačanaja na padstavie pieršych daśledavańniaŭ. Taksama datyčna [Siarhieja] Nihajana, Sienika i Žyźnieŭskaha vyznačana koła asobaŭ, jakich praviarajuć na datyčnaść da złačynstva. Nie vyklučaju, što im nieŭzabavie ŭručać padazreńni», — skazaŭ namieśnik kiraŭnika departamienta ŭ «spravach Majdanu» Ofisu hienprakurora Ukrainy Dzianis Ivanoŭ u intervju ŭkrainskamu ahienctvu «Ukrinform».
U Michaiła Žyźnieŭskaha, Siarhieja Nihajana (abodva zahinuli 22 studzienia 2014 hoda) i Ramana Sienika (zahinuŭ 25 studzienia 2014 hodu) stralali kulami dla prymusovaha spynieńnia transpartu, jakija vykarystoŭvali tolki padraździeły Ministerstva ŭnutranych spraŭ Ukrainy. Pieršyja ekśpiertyzy pakazali, što ŭ ich stralali z adlehłaści 20 metraŭ.
U Ofisie hienprakurora Ukrainy paviedamili, što zhodna z ukrainskim zakanadaŭstvam, termin daŭnaści ŭ spravach ab ciažkich złačynstvach składaje 10 hadoŭ, a heta aznačaje, što paśla hetaha adkaznyja za złačynstvy mohuć paźbiehnuć adkaznaści.
«Vyklučeńniem zjaŭlajucca tyja spravy, dzie abvinavačanyja chavajucca ad orhanaŭ dasudovaha rasśledavańnia. U ich termin daŭnaści prypyniajecca. Adnak spravy pavodle faktaŭ zabojstvaŭ, za jakija praduhledžana pakarańnie ŭ vyhladzie pažyćciovaha pazbaŭleńnia voli, a taksama złačynstvaŭ suprać dziaržaŭnaści terminu daŭnaści nie majuć», — udakładniŭ jašče adzin namieśnik kiraŭnika departamientu ŭ «spravach Majdanu» Ofisu hienprakurora Ukrainy Ivan Babienka.
Michaił Žyźnieŭski zahinuŭ 22 studzienia 2014 hoda padčas Jeŭramajdana ŭ Kijevie. U 2017 hodzie jaho ŭšanavali zvańniem Hieroja Ukrainy i pierad hetym paśmiarotna nadali ŭkrainskaje hramadzianstva. Zorku Hieroja Ukrainy tahačasny prezident Piatro Parašenka pieradaŭ baćkam Michasia. Zabojca dahetul nie znojdzieny.
U 2021 hodzie ŭłady Kijeva demantavali pomnik Michaiłu Žyźnieŭskamu, jaki byŭ ustalavany ŭ listapadzie 2014 hodu niedaloka ad mierkavanaha miesca jahonaj hibieli ŭ Kijevie — na rahu Piatroŭskaj alei i vulicy Hrušeŭskaha. Sioleta ŭ kastryčniku demantavany pomnik znajšli ŭ kustach niedaloka ad taho miesca, dzie jon znachodziŭsia.
Pomnik Michaiłu Žyźnieŭskamu demantavali tamu, što na hetym miescy mer Kijeva Vital Kličko inicyjavaŭ ustalavańnie miemaryjalnaha kompleksu hierojam-kijaŭlanam, jakija zahinuli ŭ časie antyterarystyčnaj apieracyi na ŭschodzie Ukrainy.
«Ciabie b baćka praklaŭ»: maci fihuranta «małočnaj spravy» prabiłasia na spatkańnie ź im, kab ślozna paprasić nie supracoŭničać sa śledstvam3
Kamientary