Jak biełarusy ledź nie stracili ŭ Prazie mahiły prezidentaŭ BNR i śpievaka Zabejdy-Sumickaha
Były žurnalist Radyjo Svaboda i pieršy namieśnik staršyni Rady BNR Siarhiej Navumčyk u svaim fejsbuku raskazaŭ pra asablivaść apieki nad mohiłkami ŭ zachodnich krainach.
12.03.2024 / 08:52
Fota z fejsbuka Siarhieja Navumčyka
«Pražskija biełarusy (a mienavita, češski siektar Rady BNR i supołka «Skaryna») apłacili arendu mahiłaŭ prezidenta BNR Piotry Krečeŭskaha i śpiavaka Michasia Zabejdy-Sumickaha na Alšanach na nastupnyja 10 hadoŭ (maksimalny termin, potym jaho možna praciahnuć).
«Arenda mahiły» — u našym, biełaruskim usprymańni, hučyć, miakka kažučy, niazvykła. Ale ŭ šmat jakich krainach Jeŭropy taki zakon: miesca pad pachavańnie kuplajecca na peŭny termin, i kali pa jaho zaviaršeńni apłata nie ŭnosicca iznoŭ — jano moža być pradadzienaje pad inšaje pachavańnie.
U vypadku z prezidentami BNR Krečeŭskim i Zacharkam krychu bolš jak dziesiać hod tamu padobnaje ledź nie zdaryłasia — ludzi, jakija ŭ svoj čas afarmlali dakumienty, źjechaŭšy z Prahi, zabylisia ich pieradać i nie paviedamili pra termin zaviaršeńnia damovy.
U vyniku, biełarusy zhubili prava ŭłasnaści na nadmahilnyja pomniki — praŭda, nam prapanavali ich vykupić u administracyi, ale za takija vialikija hrošy, jakich u nas paprostu nie było», — napisaŭ Siarhiej Navumčyk.
Jon kaža, što daviałosia vieści pieramovy z administracyjaj mohiłak, šukać niejkaje kampramisnaje rašeńnie. Im pajšli nasustrač, ale voś užo dziesiać hadoŭ heta, stroha kažučy, nie arenda, a šefstva nad mahiłami, za jakoje da taho ž pavinny płacić.
«Taksama, my zabrukavali za svoj košt davoli praciahłuju ściažynu da adnoj z mahiłaŭ — takaja była ŭmova.
Ale zatoje ciapier my peŭnyja, što mahiły zastanucca. I štohod, na Dziady i na Dzień Voli, možna pryjści da ich i pakłaści kvietki».
«Sotni, tysiačy mahiłaŭ biełarusaŭ u dziasiatkach krainaŭ na roznych kantynientach — stračanyja. Ambasady RB jany nie cikavili i nie cikaviać — tady jak ukrainskija, polskija, litoŭskija dypmisii apiekvajucca miescami supakajeńnia svaich surodzičaŭ. Heta i nie dziŭna: RB nie zjaŭlajecca biełaruskaj dziaržavaj, jaje kiraŭnictva źniščaje ŭsio biełaruskaje, źniščaje paśladoŭna i metanakiravana.
Viadoma, u emihrantaŭ, asabliva novych, chapaje kłopataŭ. I ŭsio ž my pavinny pamiatać i pra tych, chto byŭ da nas — bo nichto inšy pra ich pamiać nie pakłapocicca», — reziumuje Siarhiej Navumčyk.
Čytajcie taksama:
Roŭna 106 hadoŭ tamu była abvieščana Biełaruskaja Narodnaja Respublika
$5000 za miesca na mohiłkach, $330 za śviatara. Na što chłopiec Lizy patracić sabranyja hrošy?