Tramp i Bajden pieramahli na prajmieryz respublikancaŭ i demakrataŭ. Jany buduć vyłučanyja ŭ prezidenty ZŠA
Apošni vypadak u historyi, kali adna ź dźviuch viadučych amierykanskich partyj vyłučała ŭ prezidenty kandydata, jaki ŭžo adzin raz prajhraŭ na vybarach, mieŭ miesca ŭ 1968 hodzie
13.03.2024 / 09:32
Fota: Fota: Evan Vucci i Chris Carlson / AP
Były prezident ZŠA Donald Tramp i ciapierašni haspadar Biełaha doma Džo Bajden pieramahli na prajmieryz respublikancaŭ i demakrataŭ, paviedamlajuć amierykanskija ŚMI. Takim čynam jany nieŭzabavie buduć aficyjna vyłučanyja ŭ prezidenty ZŠA ad svaich partyj — i vybary 2024 hoda stanuć faktyčnym paŭtoram kampanii 2020 hoda, kali Bajden pieramoh Trampa, piša Bi-bi-si.
Vyłučeńnie Bajdena ŭ prezidenty ZŠA ad Demakratyčnaj partyi było farmalnaściu, pakolki dziejučy lidar krainy, jaki vyrašyŭ iści na druhi termin, jak praviła, nie sutykajecca z surjoznaj kankurencyjaj.
U respublikancaŭ bitva za vyłučeńnie była całkam surjoznaj, choć Tramp z samaha pačatku kampanii mieŭ vielizarnuju pieravahu i ŭ jaho najbližejšaj kankurentki, byłoj stałaj pradstaŭnicy ZŠA ŭ AAN Niki Chejli, amal nie było realnych šancaŭ na vyłučeńnie.
U aŭtorak respublikanskija prajmieryz prajšli ŭ čatyroch štatach: u Džordžyi, na Havajach, a taksama ŭ Misisipi i Vašynhtonie.
Paśla taho, jak Chejli vyjšła z honki na fonie paražeńniaŭ u «supieraŭtorak», Trampu nie chapała ŭsiaho 137 delehataŭ na partyjnaj kanfierencyi, jakaja nieŭzabavie aficyjna vyłučyć kandydata ŭ prezidenty.
Jak pieradaje ABC News, eks-prezident atrymaŭ nieabchodnyja hałasy paśla pieramohi ŭ Vašynhtonie.
Apošni vypadak u historyi, kali adna ź dźviuch viadučych amierykanskich partyj vyłučała ŭ prezidenty kandydata, jaki ŭžo adzin raz prajhraŭ na vybarach, mieŭ miesca ŭ 1968 hodzie, adznačaje centr Pew Research. Tady respublikancy vyłučyli ŭ prezidenty Ryčarda Niksana, jaki sastupiŭ Džonu Kienedzi na vybarach 1960 hoda.
A situacyja, pry jakoj tyja ž dva kandydaty znoŭ sustrakajucca na vybarach prezidenta, apošni raz adbyvałasia ŭ 1950-ch. U 1952 hodzie i 1956 hadach na vybarach syšlisia Duajt Ejzenchaŭer i Edłaj Styviensan. Abodva razy pieramahaŭ hienierał Ejzenchaŭer.
Novy pajadynak Trampa z Bajdenam stanie siomym takim vypadkam u historyi. Pry hetym vynik pieršych čatyroch «matčaŭ-revanšaŭ» adroźnivaŭsia ad pieršapačatkovaha, a ŭ apošnich dvuch akazvaŭsia takim ža, jak padčas pieršaha hałasavańnia.
Prezidenckija vybary ŭ ZŠA adbuducca 5 listapada 2024 hoda.
Kali Tramp pieramoža, jon stanie druhim u historyi prezidentam, jaki zajmaŭ kiraŭničuju pasadu dvojčy z propuskam u čatyry hady. U 1885—1889 i 1893—1897 hadach 22-m i 24-m prezidentam ZŠA byŭ Hrovier Kliŭlend.
Čytajcie taksama:
Niki Chejli abjaviła ab vychadzie z vybarčaj honki
Tramp upeŭniena pieramoh na prajmieryz u 14 štatach u «supieraŭtorak»
Prezident Bajden — Pucinu i Trampu: My nie kiniem sajuźnikaŭ
Viarchoŭny sud ZŠA dazvoliŭ Trampu ŭdzielničać u vybarach prezidenta