«Vyjšaŭ ź lohkim škadavańniem». Biełarusy raskazali, jak prymali novaje hramadzianstva i što rabili sa starym
Vydańnie Devby.io raspytała biełarusaŭ, jakija atrymali zamiežnyja pašparty, što jany zrabili z biełaruskim hramadzianstvam/pašpartam — i čamu?
21.03.2024 / 23:32
Prylacieła z Kanady, kab «praciahnuć» pašpart
— Ź Biełarusi ja źjechała jašče ŭ 2012 hodzie. Doŭha žyła ŭ Narviehii (atrymlivała druhuju vyšejšuju adukacyju), da hetaha trochi pažyła ŭ Šviecyi i Niderłandach. Paźniej pierajechała ŭ Kanadu i tam atrymała kanadski pašpart. Ciapier žyvu ŭ ZŠA, u Kalifornii.
Biełaruski pašpart u mianie taksama zastaŭsia, i ja nie źbirajusia ad jaho admaŭlacca. Tam baćki, babuli, da jakich ja chaču pryjazdžać, kali zachaču, bieź vizy i zastavacca na luby termin. Biez pašparta treba rabić vizu, ale ŭ hetym vypadku termin znachodžańnia taksama budzie abmiežavany. Plus pryjdziecca zrabić šmat ruchaŭ cieła dla atrymańnia vizy.
Praŭda, tak vyjšła, što letaś termin dziejańnia biełaruskaha pašparta skončyŭsia. Usie, kaho ja viedaju ŭ Kanadzie i ZŠA, zvyčajna prylatajuć mianiać pašpart za 6 miesiacaŭ da zakančeńnia terminu. Ale ŭ mianie była vialikaja zahružanaść na pracy, i ja nie mahła zahadzia sarvacca śpiecyjalna dla zamieny pašparta.
Apošni raz ja była ŭ Biełarusi prajezdam u 2018 hodzie, tak što nijakaha dačynieńnia da padziej apošnich hadoŭ nie mieła. Sioleta ŭ mianie źjaviłasia mahčymaść prabavić čas z rodnymi i zaadno abnavić dakumient. Načytaŭšysia ŭsich hetych žachaŭ z zatrymańniami [na miažy] i ŭsim astatnim, vyrašyła: «dy nu nafih hetyja prablemy» — lepš zrabić usio, jak taho patrabuje biełaruskaje zakanadaŭstva. Heta zatratniej, čym prosta «aj, pajedu i na miescy raźbiarusia». Ale mnie nie chaciełasia paśla bolš jak 18 hadzin u pavietry vyrašać niejkija pytańni na miažy.
Pierš za ŭsio treba było ŭ ZŠA aformić paśviedčańnie na viartańnie (z pryčyny zakančeńnia terminu dziejańnia pašparta) i zarehistravać druhoje hramadzianstva.
Paśviedčańnie na viartańnie vydajecca, u pryvatnaści, hramadzianam Biełarusi ŭ vypadku straty (kradziažu) pašparta hramadzianina Respubliki Biełaruś abo zakančeńnia terminu jaho dziejańnia padčas ich znachodžańnia pa-za miežami Biełarusi. Paśviedčańnie na viartańnie vydajecca dla adnarazovaha ŭjezdu na terytoryju Biełarusi.
Aformić paśviedčańnie na viartańnie možna było tolki ŭ biełaruskim konsulstvie — jano ŭ Vašynhtonie. Tamu pa dakumient daviałosia lacieć u inšy štat.
Daroha tudy-nazad u Vašynhton abyšłasia mnie ŭ 2 tysiačy dołaraŭ, jašče 25 dołaraŭ daviałosia zapłacić za samo paśviedčańnie. U konsulstvie skazali, što dakumient dadadzieny ŭ bazu i na miažy nie maje ŭźniknuć pytańniaŭ. Tam ža zapoŭniła ankietu pra toje, dzie žyvu, kim pracuju i kolki zarablaju.
Faktyčna ź pierasiačeńniem miažy nijakich prablem nie było.
Atrymaŭ novy pašpart, nie pakidajučy Biełarusi (i ciapier nie patrebnyja vizy ŭ ES)
— Ja žyvu ŭ Biełarusi. Letaś atrymaŭ pašpart adnoj z krain, jakaja daje mahčymaść biaźvizavaha ŭjezdu na terytoryju ES.
Novy pašpart atrymaŭ, nie pakidajučy Biełarusi, praz ambasadu novaj krainy. Zrabiŭ heta na budučyniu, dla «biaźvizu». I, chutčej za ŭsio, kali daviadziecca rezka pakinuć Biełaruś, to pajedu ŭ hetuju krainu. Biełaruski pašpart u mianie zastaŭsia. Dla atrymańnia pašparta hramadzianina novaj krainy admaŭlacca ad biełaruskaha hramadzianstva było nie abaviazkova.
Dla atrymańnia pašparta mnie spatrebiłasia padać daviedku pra niesudzimaść i dakumienty, jakija dajuć padstavy / paćviardžajuć prava atrymać pašpart. U maim vypadku asnoŭnym takim dakumientam było paśviedčańnie ab naradžeńni adnaho z baćkoŭ.
Ad idei da atrymańnia pašparta inšaj krainy na ruki prajšło mienš za hod. U teoryi možna było atrymać jašče chutčej, kali b, naprykład, ja asabista naviedaŭ hetuju krainu. Praz ambasadu pracedura była raściahnutaja.
Ja nie adrazu paviedamiŭ MUS, što atrymaŭ pašpart inšaj krainy. Byŭ čas padumać, ci rabić heta, ci nie. U vyniku vyrašyŭ paviedamić praz partał elektronnych pasłuh, zapoŭniŭšy śpiecyjalnuju formu. Zrabiŭ heta, bo atrymać vizu pa biełaruskim pašparcie vielmi prablematyčna, a novy pašpart staŭ praktyčna adzinaj mahčymaściu vyjechać za miažu, nie pierapłačvajučy vielizarnyja hrošy za kruh praz Turcyju abo krainy Paŭdniovaha Kaŭkaza.
Fota: Unsplash
Chacieŭ «nadziejna prykryć svaje dasiahnieńni i majomaść» u Niderłandach
— U Niderłandy ja pierajechaŭ jašče ŭ 2012 hodzie pa pracy, atrymaŭšy kantrakt u miascovaj kampanii. Pašpart Niderłandaŭ zapytaŭ paśla žniŭnia 2020-ha. Naohuł heta nie było vostraj nieabchodnaściu — bolš žadańnie nadziejna prykryć svaje dasiahnieńni i majomaść u Niderłandach, paźbiehnuŭšy luboj ryzyki departacyi jak hramadzianina Biełarusi.
Atrymaŭ pašpart u 2022 hodzie. Ciapier znachodžusia ŭ pracesie admovy ad biełaruskaha hramadzianstva: heta patrabavańnie imihracyjnych uładaŭ Niderłandaŭ.
Dla admovy ad biełaruskaha hramadzianstva treba było źviarnucca ŭ pasolstva i padać zajavu ab afarmleńni pastajannaha miesca žycharstva pa-za miežami Biełarusi.
Zapisacca na pryjom u biełaruskuju ambasadu ŭ Niderłandach niaprosta. Dla hetaha treba telefanavać u apošni paniadziełak miesiaca ad 14:00 da 16:00, šaniec datelefanavacca vielmi mały: albo pastajanna «zaniata», albo trubku nie zdymajuć. Paśla 15:00 trubku mohuć brać, ale miescaŭ užo niama. Praź miesiac davodzicca paŭtarać.
U vyniku, kab zapisacca na pryjom, mnie pryjšłosia dazvońvacca 5 miesiacaŭ zapar.
Paśla taho jak zajavu zadavolać, treba stać na konsulski ŭlik. I adnačasova z hetym možna padać zajavu na pazbaŭleńnie hramadzianstva na imia prezidenta Biełarusi, što maralna niaprosta.
Razhlad zajavy zajmaje kala hoda. Zatym, vidać, treba budzie pryvieźci pašpart u ambasadu Biełarusi ŭ Niderłandach.
Pakul dla admovy ad hramadzianstva niama nieabchodnaści pryjazdžać u Biełaruś. Kali niešta źmienicca, pryjdziecca sudzicca z IND (imihracyjny orhan Niderłandaŭ), dakazvać, što pajezdka niebiaśpiečnaja. Bo jany pahražajuć pazbavić niderłandskaha hramadzianstva za toje, što nie admoviŭsia ad biełaruskaha.
Pražyŭ u Hiermanii 15 hadoŭ, ale pa pašpart pajšoŭ tolki paśla 2020-ha
— Ź Biełarusi ŭ Hiermaniju ja źjechaŭ jašče ŭ 2005 hodzie ŭ pošukach pracy. Paźniej atrymaŭ PMŽ. Heta dało mahčymaść spakojna pracavać i žyć biez abmiežavańniaŭ u Hiermanii. Usio ŭklučana, akramia prava hołasu i mahčymaści źjechać na PMŽ u inšuju krainu.
Ja moh daŭno vyrašyć pytańnie z atrymańniem niamieckaha pašparta, ale nie chacieŭ, bo ŭ hetym vypadku treba było admovicca ad biełaruskaha pašparta. A admaŭlacca nie źbiraŭsia, byli spadzievy, što ŭ krainie, moža być, niešta źmienicca da lepšaha.
U studzieni 2024-ha Hiermanija dazvoliła mieć hramadzianstva inšych krain pry atrymańni niamieckaha pašparta.
Apošni raz ja byŭ u Biełarusi ŭ studzieni 2020-ha. Užo pry kancy 2020-ha ja ŭsio ž taki zapytaŭ niamiecki pašpart, a potym zapuściŭ praceduru admovy ad biełaruskaha hramadzianstva.
Pracedura:
- Pastanoŭka na konsulski ŭlik — dzień.
- Paćviardžeńnie aficyjnaha statusu pražyvańnia za miažoj i PMŽ.
- Atrymańnie ad niemcaŭ paćviardžeńnia pryjomu ŭ hramadzianstva — hod.
- Padača dakumientaŭ na vychad ź biełaruskaha hramadzianstva i čakańnie vychadu — amal hod.
- Paćviardžeńnie vychadu ź biełaruskaha hramadzianstva i pieradača infarmacyi niemcam.
- Čakańnie atrymańnia niamieckaha pašparta.
Na ŭsie pracedury vydatkavaŭ bolš za 2 tysiačy jeŭra, uklučajučy pasłuhi pierakładčyka, nataryusaŭ. Biełaruś pryznaje tolki svaich pierakładčykaŭ, niemcy — svaich, niekatoryja dakumienty daviałosia pierakładać dvojčy.
U vyniku ź biełaruskaha hramadzianstva ja vyjšaŭ u 2022-m (ź lohkim škadavańniem), a niamiecki pašpart atrymaŭ u 2023-m.
Čytajcie taksama:
Biełarusam z praterminavanymi pašpartami za miažoj čynoŭniki pahražajuć štrafami. Ci varta bajacca?
Nie Cimafiej, a Cimatejuš. Biełarus choča źmianić imia dla zručnaści zamiežnikaŭ