«Z dazvołu nacystaŭ sijanisty naviedvali kancłahiery i adbirali pravilnych jaŭrejaŭ». Źlitaja zasakrečanaja dysiertacyja kiraŭnika Paleściny, napisanaja ŭ Maskvie
Amierykanskaje analityčnaje ahienctva pa daśledavańni Blizkaha Uschodu MEMRI zmahło atrymać poŭny tekst zasakrečanaj doktarskaj dysiertacyi prezidenta Paleścinskaj aŭtanomii Machmuda Abasa, jakaja była napisana ŭ SSSR i ŭ jakoj inicyjatarami Chałakostu vystaŭlalisia sami jaŭrei. Asnoŭnyja tezy z hetaj «navukovaj pracy» pryvodzić vydańnie Israel Hayom.
15.04.2024 / 08:34
Prezident Paleścinkaj aŭtanomii Machmud Abas na fonie svajoj doktarskaj dysiertacyi pad nazvaj «Suviazi pamiž sijanizmam i nacyzmam». Foty: MEMRI / Israel Hayom, Wikimedia Commons. Kałaž: «Naša Niva»
Jak piša vydańnie Israel Hayom, u jaho rasparadžeńni akazaŭsia poŭny tekst doktarskaj dysiertacyi ciapierašniaha prezidenta Paleścinskaj aŭtanomii Machmuda Abasa, jakaja była napisanaja im u Maskvie ŭ 1982 hodzie i adrazu ž zasakrečanaja savieckim KDB (sakretnaść pracy Abasa zachoŭvajecca i ŭ siońniašniaj Rasii).
Tekst byŭ pieradadzieny izrailskamu vydańniu z boku amierykanskaha ahienctva pa daśledavańni Blizkaha Uschodu MEMRI, jakoje zdoleła atrymać jaho z rasijskich archivaŭ, adznačaje Israel Hayom.
U svajoj doktarskaj dysiertacyi na 119 staronak Machmud Abas, jaki ŭ tyja časy nasiŭ partyjny psieŭdanim «Abu Mazien» i byŭ dadatkova zavierbavany KDB pad kodavym imiem «Krotaŭ», śćviardžaŭ, što «pamiž sijanizmam i nacyzmam isnavali tryvałyja suviazi», i što ŭ jakaści inicyjataraŭ Chałakosta vystupali sami jaŭrei.
Sam Abas paśpiachova abaraniŭ svaju pracu ŭ Instytucie ŭschodaznaŭstva Akademii navuk SSSR, jaki na toj momant uznačalvaŭ viadomy prafiesar i ahient KDB Jaŭhien Prymakoŭ, jaki paśla razvału SSSR paśpieŭ pabyvać dyrektaram Słužby źniešniaj raźviedki Rasii, ministram zamiežnych spraŭ i navat premjeram.
«Hałoŭnaja vysnova, da jakoj prychodzić Machmud Abas, zaklučajecca ŭ tym, što Chałakost jaŭrejaŭ byŭ sumiesnym prajektam nacystaŭ i sijanisckaha ruchu, jaki Abas mocna nienavidzić. Ciapierašni kiraŭnik Paleścinskaj aŭtanomii rabiŭ usio, kab poŭny tekst jaho pracy nidzie nie ŭspłyŭ, ale my ŭsio roŭna jaho atrymali», — zajaviŭ vydańniu Israel Hayom prezident ahienctva MEMRI Ihal Karman.
Pa słovach Karmana, asnoŭnuju dumku Abasa ŭ jaho pracy možna padzialić na niekalki pramych cytat z tezami, raskryćciu jakich aŭtar bolš za ŭsio nadzialaje ŭvahu ŭ tekście.
Voś tolki niekatoryja ź ich.
-
«Sijanisckija emisary atrymali svabodny dostup da kancentracyjnych łahieraŭ, kab adbirać patrebnych dla zasialeńnia Izraila ludziej i pakidać tam inšych, nieprydatnych, jakija nie pavinny byli vyjści z kancłahieraŭ žyvymi».
-
«Sijanisty naŭmysna zabivali jaŭrejaŭ, jakija ŭ ramkach niezakonnaj mihracyi biehli ad ułady nacystaŭ u ziemli Izraila (u toj čas padmandatnaja Brytanii Paleścina. — «NN»). Zabivali ich z-za taho, što jany, na dumku sijanistaŭ, byli niapravilnyja i nieprydatnyja dla zasialeńnia Izraila».
- «Lidary sijanisckich centraŭ imknulisia schavać ad mižnarodnaj supolnaści fakty supracivu nacystam z boku inšych jaŭrejskich frakcyj i ruchaŭ, kab samim asabista pryniać udzieł u paślavajennych mirnych pieramovach. Ich metaj było zapatrabavać doli trafiejaŭ ad pieramohi sajuźnikaŭ».
-
«U 1943 hodzie ŭźnikła mahčymaść adpravić ježu, leki i pasyłki ŭ jaŭrejskija hieta ŭ Jeŭropie, ale sijanisty sarvali hetuju inicyjatyvu, niahledziačy na toje, što Mižnarodny Čyrvony Kryž byŭ hatovy jaje raspačać».
-
«Absalutna ŭsio nasielnictva akupavanych nacystami terytoryj, a nie tolki adny jaŭrei, znachodziłasia pad raŭnaznačnym upłyvam žorstkaj nacysckaj vajennaj mašyny. Niama dakładnych statystyčnych danych ab kolkaści jaŭrejskich achviar, ale ich naŭmysna zavyšajuć sijanisty. U realnaści zahinuła mienš za miljon».
Datyčna apošniaj cytaty prezident MEMRI asabliva padkreśliŭ, što Machmud Abas u svaim naratyvie pra «nacystaŭ, jakija stavilisia da ŭsich adnolkava» mocna abapiraŭsia na aficyjnuju savieckuju prapahandu i adyjoznych savieckich myślaroŭ-antysiemitaŭ, jakija naŭmysna prymianšali nastupstvy Chałakosta ci ŭvohule jaho admaŭlali, kažučy «pra ahulnuju pakutu savieckaha naroda».
«Adnak savieckaja prapahanda ŭ adroźnieńnie ad Machmuda Abasa, prynamsi, nie sprabavała śćviardžać, što jaŭrei razduli kolkaść achviar, jakich zahinuła bolš za 6 miljonaŭ», — adznačaje Ihal Karman.
Karman miarkuje, što «navukovaja praca» Abasa akazałsia zanadta taksičnaj navat dla savieckaha kiraŭnictva, tamu jany, kaniešnie, nadali jamu stupień doktara navuk, ale i zahadali KDB schavać hetuju dysiertacyju kudy dalej.
Čytajcie taksama:
Pahromy na Biełarusi. Chto za imi stajaŭ
MZS Izraila asudziŭ pryznačeńnie Hihina ŭ Nacyjanalnuju biblijateku