Biełaruskaja naftapierapracoŭka niasie vializnyja straty
Niekali samy prybytkovy Mazyrski NPZ ciahnie ekanomiku na dno. Takuju vysnovu možna zrabić z apublikavanych 29 krasavika źviestak Biełstata ab finansavych pakazčykach asobnych rajonaŭ Biełarusi pa vynikach pieršych dvuch miesiacaŭ 2024 hoda, zaŭvažyŭ «Fłahštok».
30.04.2024 / 10:35
Mazyrski NPZ. Fota: sajt pradpryjemstva
Čystyja straty pradpryjemstvaŭ Mazyrskaha rajona za studzień-luty 2024 hoda skłała 182,8 młn rubloŭ. U minułym hodzie za taki ž pieryjad tut byŭ atrymany čysty prybytak u pamiery 21,6 młn rubloŭ. Udzielnaja vaha stratnych arhanizacyj rajona składaje ŭsiaho 14,3 pracenta, u suviazi z čym vializnyja straty možna źviazać z najbolš bujnym pradpryjemstvam rajona — Mazyrskim NPZ.
Pavodle infarmacyi krynicy, źviazanaj z MNPZ, pieršyja miesiacy 2024 hoda dziejnaść zavoda pryniesła straty. Dla pracaŭnikoŭ pradpryjemstva byli prypynienyja vypłaty, jakija rehulavalisia kalektyŭnaj damovaj, pakolki jany vypłačvalisia z prybytku pradpryjemstva.
Pra toje, što heta nie adzinkavy vypadak, a ahulnaja situacyja ŭ biełaruskaj naftapierapracoŭcy, śviedčać finansavaja statystyka Navapołacku, dzie raźmieščany inšy biełaruski naftapierapracoŭščyk Naftan. Tut čystyja straty jašče bolšyja — 324,5 młn rubloŭ.
Prablemy naftapieraapracoŭki niehatyŭna adbivajucca na ŭsioj ekanomicy rehijona. U paraŭnańni ź minułym hodam čysty prybytak usich arhanizacyj Homielskaj vobłaści skaraciŭsia amal u 2 razy z 234,2 da 128,2 młn rubloŭ. Ekspart tavaraŭ za toj ža pieryjad źniziŭsia na 4,8%.
U 2023 hodzie Mazyrski NPZ nazyvaŭsia ŭ liku troch najbujniejšych padatkapłacielščykaŭ Homielskaj vobłaści. Z druhoha kvartała 2021 hoda pradpryjemstva pierastała publikavać finansavuju infarmacyju ab svajoj dziejnaści. U 2020 hodzie Mazyrski NPZ byŭ samym prybytkovym pradpryjemstvam siarod usich akcyjaniernych tavarystvaŭ Homielskaj vobłaści.