Samaja pryjaznaja dla biełaruskaha biznesu Polšča, u krainach Bałtyi ŭsio horš. Apublikavanyja novyja danyja
Tolki 24% biełaruskich pradprymalnikaŭ, jakija zarehistravali biznes u krainach Jeŭraźviazu, zadavolenyja padtrymkaj krain, jakija ich pryniali. Samaja pryjaznaja — Polšča. U krainach Bałtyi ŭmovy rełakacyi, lehalizacyi biełarusaŭ istotna pahoršylisia, sa spasyłkaju na biznes-asacyjacyju AVVA piša «Svaboda».
23.05.2024 / 08:23
Na pačatku 2023 hoda były akcior RTBD Ilja Jasinski razam z paplečnikami adkryŭ u centry Vilni Karčma 1863. Fota: «Naša Niva»
Asacyjacyja biełaruskaha biznesu za miažoj (AVVA) praviała daśledavańnie: kolki biełaruskaha biznesu pracuje ŭ Eŭraźviazie; jakija biznes-nastroi ŭ pradprymalnikaŭ; jak jany abirajuć krainu dla biznesu i jakaja kraina najbolš papularnaja; ci karystajucca biełaruskija biznesoŭcy dziaržaŭnymi prahramami padtrymki biznesu ŭ krainach EZ.
Było apytana 125 pradprymalnikaŭ, jakija znachodziacca na etapie zapusku, stanaŭleńnia ci stałaści pradpryjemstvaŭ na rynkach EZ.
Na pytańni ankiety adkazvali mienavita ŭładalniki biznesu (95%) — ludzi pieravažna va ŭzroście da 54 hadoŭ, z vyšejšaj adukacyjaj.
Žančyn zaŭvažna mienš za mužčyn, adznačyli ŭ AVVA.
Dla 41% respandentaŭ biznes byŭ mienavita relakavany ź Biełarusi, astatnija pačali ci pačynajuć dziejnaść z nula.
Na 184 kampanii mienš
Pavodle stanu na 1 studzienia 2024 hodu ŭ krainach Eŭraźviazu zarehistravanyja 8623 kampanii ź biełaruskimi beneficyjarami. Ź ich pieravažnaja bolšaść u Polščy — 75%. 10% — u Litvie, 7% — u Estonii, 4% — u Łatvii, i jašče 4% u inšych krainach.
U 2023 hodzie biełarusy zarehistravali 1761 kampaniju (u 2022 hodzie było 1945). U Polščy źjavilisia 1694 novyja firmy, 58 — u Litvie, 9 — u Estonii.
Vice-prezydent AVVA Sierž Naŭrodski adznačaje, što kolkaść kampanij ciapier raście nia tak chutka, jak raniej.
«2022 hod byŭ pikavy, i asnoŭnyja ličby pryrostu dała Polšča, jak i ŭ papiarednija hady. Usie inšyja krainy ŭžo nie źjaŭlajucca pryvabnymi dla biznesu. Asabliva krainy Bałtyi. Umovy relakacyi, umovy lehalizacyi pahoršylisia, adpaviedna, košty dla pierajezdu pavialičylisia.
Niama ŭpeŭnienaści, što biznes, jaki biełarusy hatovyja zarehistravać, možna budzie praciahvać i tabie daduć dazvoł na žycharstva bolš jak na 3 hady. Vielmi vysokija ryzyki ŭ krainach Bałtyi. Kolkaść kampanij tam zusim nievialikaja», — kaža Sierž Naŭrodski.
A voś kolki kampanij i IP začynilisia, pakul nieviadoma. Spadar Naŭrodski nie admaŭlaje, što prablema isnuje.
«My nie padličvali asobna, kolki začyniłasia, heta asobnaja statystyka. Heta praces narmalny i nie źjaŭlajecca čymści admietnym dla biełaruskaha biznesu. Nie pajšło, nie atrymałasia, niama hrošaj, rynak nia toj, pamyłki pry stratehii, reklamie — heta byvaje. Dakładnaj statystyki niama», — kaža vice-prezydent AVVA. Ale abiacaje padličyć.
75% kampanij i IP abrali Polšču
Bolšaść apytanych byli vymušanymi mihrantami, tamu spačatku vybirałasia kraina dla chutkaha pierajezdu, a potym tam adkryvaŭsia biznes, havorycca ŭ daśledavańni.
Asnoŭnyja pryčyny vybaru krainy, pavodle AVVA, takija:
- lohkaść lehalizacyi dla hramadzian Biełarusi;
- padobnaje myśleńnie i kultura, dastupny košt žyćcia;
- prastata viadzieńnia biznesu i hieahrafičnaje stanovišča.
Polšča vyhladaje našmat bolš vyhadna ŭ paraŭnańni ź inšymi krainami: dziełavuju atmasferu tut acanili jak pryjaznuju 70% respandentaŭ, a siarod respandentaŭ ź inšych krain — tolki 49%.
«Ale i ŭ Polščy taksama skaračeńnie biznesaŭ, jakija rehistrujucca. Pryčyna — skaraciłasia płyń mihrantaŭ. U IT-sfery, lahistycy, handli rehistrujecca ŭsio mienš kampanij», — kaža vice-prezydent AVVA spadar Naŭrodski.
Adnak i ŭ Polščy, i ŭ astatnich krainach značnaja častka apytanych biznesoŭcaŭ (24%) razhladajuć mahčymaść dalejšaha pieranosu svajho biznesu, dadaje jon.
Padtrymkaj zadavolenyja tolki 24%
63% apytanych adznačyli, što atrymlivali peŭnuju padtrymku z boku dziaržavy znachodžańnia (padatkovyja lhoty, vizy, infarmacyjnuju padtrymku), ale tolki 24% zastalisia joju zadavolenyja. Značnaja častka apytanych vykazali neŭtralnaje staŭleńnie abo dali acenku ź ciažkaściu.
Na dumku Sierža Naŭrodskaha, zastajucca dźvie asnoŭnyja prablemy. Pieršaja — dostup da finansavańnia.
«Kožnaja druhaja kampanija adznačaje, što chacieła b mieć bolš hrošaj dla raźvićcia. Kredyt atrymać niaprosta, asabliva kali ty maładaja firma i nia maješ kredytnaj historyi.
Ale jość admysłovyja dziaržaŭnyja prahramy, lakalnyja prahramy ŭradaŭ — hetym možna skarystacca, treba tolki viedać pra ich. Možna atrymać na starcie hrant na stvareńnie pracoŭnych miescaŭ», — kaža vice-prezydent.
AVVA zaraz viadzie pieramovy z donarami, siarod jakich Eŭrakamisija. Asacyjacyja prosić, kab byŭ stvorany admysłovy fond dla finansavańnia biełaruskich kampanij.
«Pieramovy viaducca paŭtara hoda, i zaraz my vielmi blizkija da taho, što fond, jaki budzie skiravany na pradprymalnikaŭ ź biełaruskim pašpartam, pačnie pracu ŭžo ŭ 2024 hodzie», — miarkuje spadar Naŭrodski.
Druhaja prablema, pavodle jaho słovaŭ, — dostup da rynkaŭ. U mnohich biznesoŭcaŭ mała dakładnych viedaŭ pra lakalnyja rynki, jany sutykajucca z prablemaj, jak zaniać miascovyja nišy albo kantaktavać z klijentami. 41% kampanij vykazvaje zakłapočanaść hetaj prablemaj.
Chto samyja talenavityja ŭ ekanamičnym błoku Łukašenki?
U Minsku bankrutuje sietka fitnes-kłubaŭ
Knyrovič jak biznes-anioł ukłaŭ u startapy sotni tysiač dalaraŭ. Nie streliŭ nivodzin